14. Dhammikasuttaṃ

Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Atha kho dhammiko upāsakoT0.399 pañcahi upāsakasatehi saddhiṃ yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinno kho dhammiko upāsako bhagavantaṃ gāthāhi ajjhabhāsi –

378.

‘‘ Pucchāmi taṃ gotama bhūripañña , kathaṃkaro sāvako sādhu hoti ;

Yo vā agārā anagārameti , agārino vā panupāsakāse .

379.

‘‘ Tuvañhi lokassa sadevakassa , gatiṃ pajānāsi parāyaṇañca ;

Na catthi tulyo nipuṇatthadassī , tuvañhi buddhaṃ pavaraṃ vadanti .

380.

‘‘ Sabbaṃ tuvaṃ ñāṇamavecca dhammaṃ , pakāsesi satte anukampamāno ;

Vivaṭṭacchadosi samantacakkhu , virocasi vimalo sabbaloke .

381.

‘‘ ĀgañchiP0.67 te santike nāgarājā , erāvaṇo nāma jinoti sutvā ;

Sopi tayā mantayitvājjhagamā , sādhūti sutvāna patītarūpo .

382.

‘‘ RājāpiM0.336V0.140T0.400 taṃ vessavaṇo kuvero , upeti dhammaṃ paripucchamāno ;

Tassāpi tvaṃ pucchito brūsi dhīra , so cāpi sutvāna patītarūpo .

383.

‘‘ Ye kecime titthiyā vādasīlā , ājīvakā vā yadi vā nigaṇṭhā ;

Paññāya taṃ nātitaranti sabbe , ṭhito vajantaṃ viya sīghagāmiṃ .

384.

‘‘ Ye kecime brāhmaṇā vādasīlā , vuddhā cāpi brāhmaṇā santi keci ;

Sabbe tayi atthabaddhā bhavanti , ye cāpi aññe vādino maññamānā .

385.

‘‘ Ayañhi dhammo nipuṇo sukho ca , yoyaṃ tayā bhagavā suppavutto ;

Tameva sabbepi [ sabbe mayaṃ ( syā .)] sussūsamānā , taṃ no vada pucchito buddhaseṭṭha .

386.

‘‘ Sabbepi me bhikkhavo sannisinnā , upāsakā cāpi tatheva sotuṃ ;

Suṇantu dhammaṃ vimalenānubuddhaṃ , subhāsitaṃT0.401 vāsavasseva devā ’’.

387.

‘‘ Suṇātha me bhikkhavo sāvayāmi vo , dhammaṃ dhutaṃ tañca carātha sabbe ;

IriyāpathaṃP0.68 pabbajitānulomikaṃ , sevetha naṃ atthadaso mutīmā .

388.

‘‘ No ve vikāle vicareyya bhikkhu , gāme ca piṇḍāya careyya kāle ;

Akālacāriñhi sajanti saṅgā , tasmā vikāle na caranti buddhā .

389.

‘‘ RūpāM0.337 ca saddā ca rasā ca gandhā , phassā ca ye sammadayanti satte ;

Etesu dhammesu vineyya chandaṃ , kālena so pavise pātarāsaṃ .

390.

‘‘ Piṇḍañca bhikkhu samayena laddhā , eko paṭikkamma raho nisīde ;

Ajjhattacintī na mano bahiddhā , nicchāraye saṅgahitattabhāvo .

391.

‘‘ Sacepi so sallape sāvakena , aññena vā kenaci bhikkhunā vā ;

DhammaṃT0.402 paṇītaṃ tamudāhareyya , na pesuṇaṃ nopi parūpavādaṃ .

392.

‘‘ VādañhiV0.141 eke paṭiseniyanti , na te pasaṃsāma parittapaññe ;

Tato tato ne pasajanti saṅgā , cittañhi te tattha gamenti dūre .

393.

‘‘ Piṇḍaṃ vihāraṃ sayanāsanañca , āpañca saṅghāṭirajūpavāhanaṃ ;

Sutvāna dhammaṃ sugatena desitaṃ , saṅkhāya seve varapaññasāvako .

394.

‘‘ Tasmā hi piṇḍe sayanāsane ca , āpe ca saṅghāṭirajūpavāhane ;

EtesuP0.69 dhammesu anūpalitto , bhikkhu yathā pokkhare vāribindu .

395.

‘‘ Gahaṭṭhavattaṃ pana vo vadāmi , yathākaro sāvako sādhu hoti ;

Na hesa [ na heso ( sī .)] labbhā sapariggahena , phassetuṃ yo kevalo bhikkhudhammo .

396.

‘‘ PāṇaṃM0.338 na hane [ na hāne ( sī .)] na ca ghātayeyya , na cānujaññā hanataṃ paresaṃ ;

SabbesuT0.403 bhūtesu nidhāya daṇḍaṃ , ye thāvarā ye ca tasā santi [ tasanti ( sī . pī .)] loke .

397.

‘‘ Tato adinnaṃ parivajjayeyya , kiñci kvaci sāvako bujjhamāno ;

Na hāraye harataṃ nānujaññā , sabbaṃ adinnaṃ parivajjayeyya .

398.

‘‘ Abrahmacariyaṃ parivajjayeyya , aṅgārakāsuṃ jalitaṃva viññū ;

Asambhuṇanto pana brahmacariyaṃ , parassa dāraṃ na atikkameyya .

399.

‘‘ Sabhaggato vā parisaggato vā , ekassa veko [ ceto ( sī . syā .)] na musā bhaṇeyya ;

Na bhāṇaye bhaṇataṃ nānujaññā , sabbaṃ abhūtaṃ parivajjayeyya .

400.

‘‘ Majjañca pānaṃ na samācareyya , dhammaṃ imaṃ rocaye yo gahaṭṭho ;

Na pāyaye pivataṃ nānujaññā , ummādanantaṃ iti naṃ viditvā .

401.

‘‘ Madā hi pāpāni karonti bālā , kārenti caññepi jane pamatte ;

EtaṃP0.70T0.404 apuññāyatanaṃ vivajjaye , ummādanaṃ mohanaṃ bālakantaṃ .

402.

‘‘ PāṇaṃV0.142 na hane na cādinnamādiye , musā na bhāse na ca majjapo siyā ;

Abrahmacariyā virameyya methunā , rattiṃ na bhuñjeyya vikālabhojanaṃ .

403.

‘‘ MālaṃM0.339 na dhāre na ca gandhamācare , mañce chamāyaṃ va sayetha santhate ;

Etañhi aṭṭhaṅgikamāhuposathaṃ , buddhena dukkhantagunā pakāsitaṃ .

404.

‘‘ Tato ca pakkhassupavassuposathaṃ , cātuddasiṃ pañcadasiñca aṭṭhamiṃ ;

Pāṭihāriyapakkhañca pasannamānaso , aṭṭhaṅgupetaṃ susamattarūpaṃ .

405.

‘‘ Tato ca pāto upavutthuposatho , annena pānena ca bhikkhusaṅghaṃ ;

Pasannacitto anumodamāno , yathārahaṃ saṃvibhajetha viññū .

406.

‘‘ Dhammena mātāpitaro bhareyya , payojaye dhammikaṃ so vaṇijjaṃ ;

EtaṃT0.405 gihī vattayamappamatto , sayampabhe nāma upeti deve ’’ ti .

Dhammikasuttaṃ cuddasamaṃ niṭṭhitaṃ .

Cūḷavaggo dutiyo niṭṭhito .

TassuddānaṃP0.71 –

Ratanāmagandho hiri ca , maṅgalaṃ sūcilomena ;

Dhammacariyañca brāhmaṇo [ kapilo brāhmaṇopi ca ( syā . ka .)], nāvā kiṃsīlamuṭṭhānaṃ .

Rāhulo puna kappo ca , paribbājaniyaṃ tathā ;

Dhammikañca viduno āhu , cūḷavagganti cuddasāti .

Issues

Select Version

Suttanipātapāḷi

Suttanipātapāḷi