2. Guhaṭṭhakasuttaṃ
778.
Satto
V0.200T0.485 guhāyaṃ bahunābhichanno , tiṭṭhaṃ naro mohanasmiṃ pagāḷho ;Dūre
P0.152 vivekā hi tathāvidho so , kāmā hi loke na hi suppahāyā . 779.
Icchānidānā
M0.400 bhavasātabaddhā , te duppamuñcā na hi aññamokkhā ;Pacchā pure vāpi apekkhamānā , imeva kāme purimeva jappaṃ .
780.
Kāmesu giddhā pasutā pamūḷhā , avadāniyā te visame niviṭṭhā ;
Dukkhūpanītā paridevayanti , kiṃsū bhavissāma ito cutāse .
781.
Tasmā hi sikkhetha idheva jantu , yaṃ kiñci jaññā visamanti loke ;
Na tassa hetū visamaṃ careyya , appañhidaṃ jīvitamāhu dhīrā .
782.
Passāmi loke pariphandamānaṃ , pajaṃ imaṃ taṇhagataṃ bhavesu ;
Hīnā
T0.486 narā maccumukhe lapanti , avītataṇhāse bhavābhavesu . 783.
Mamāyite passatha phandamāne , maccheva appodake khīṇasote ;
Etampi disvā amamo careyya , bhavesu āsattimakubbamāno .
784.
Ubhosu antesu vineyya chandaṃ , phassaṃ pariññāya anānugiddho ;
Yadattagarahī tadakubbamāno , na lippatī [ na limpatī ( syā . ka .)] diṭṭhasutesu dhīro .
785.
Saññaṃ
P0.153 pariññā vitareyya oghaṃ , pariggahesu muni nopalitto ;Abbūḷhasallo caramappamatto , nāsīsatī [ nāsiṃsatī ( sī . syā . pī .)] lokamimaṃ parañcāti .
Guhaṭṭhakasuttaṃ dutiyaṃ niṭṭhitaṃ .