7. Brāhmaṇadhammikasuttaṃ

EvaṃT0.381 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Atha kho sambahulā kosalakā brāhmaṇamahāsālā jiṇṇā vuḍḍhā mahallakā addhagatā vayoanuppattā yena bhagavā tenupasaṅkamiṃsu ;

upasaṅkamitvā bhagavatā saddhiṃ sammodiṃsu .

Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu .

Ekamantaṃ nisinnā kho te brāhmaṇamahāsālā bhagavantaṃ etadavocuṃ –

‘‘ sandissanti nu kho , bho gotama , etarahi brāhmaṇā porāṇānaṃ brāhmaṇānaṃ brāhmaṇadhamme ’’ ti ?

‘‘ Na kho , brāhmaṇā , sandissanti etarahi brāhmaṇā porāṇānaṃ brāhmaṇānaṃ brāhmaṇadhamme ’’ ti .

‘‘ Sādhu no bhavaṃ gotamo porāṇānaṃ brāhmaṇānaṃ brāhmaṇadhammaṃ bhāsatu , sace bhoto gotamassa agarū ’’ ti .

‘‘ Tena hi , brāhmaṇā , suṇātha , sādhukaṃ manasi karotha , bhāsissāmī ’’ ti .

‘‘ Evaṃ , bho ’’ ti kho te brāhmaṇamahāsālā bhagavato paccassosuṃ .

Bhagavā etadavoca –

286.

‘‘ Isayo pubbakā āsuṃ , saññatattā tapassino ;

Pañca kāmaguṇe hitvā , attadatthamacārisuṃ .

287.

‘‘ NaP0.51 pasū brāhmaṇānāsuṃ , na hiraññaṃ na dhāniyaṃ ;

Sajjhāyadhanadhaññāsuṃ , brahmaṃ nidhimapālayuṃ .

288.

‘‘ YaṃM0.323T0.382 nesaṃ pakataṃ āsi , dvārabhattaṃ upaṭṭhitaṃ ;

Saddhāpakatamesānaṃ , dātave tadamaññisuṃ .

289.

‘‘ NānārattehiV0.128 vatthehi , sayanehāvasathehi ca ;

Phītā janapadā raṭṭhā , te namassiṃsu brāhmaṇe .

290.

‘‘ Avajjhā brāhmaṇā āsuṃ , ajeyyā dhammarakkhitā ;

Na ne koci nivāresi , kuladvāresu sabbaso .

291.

‘‘ Aṭṭhacattālīsaṃ vassāni ,( komāra ) brahmacariyaṃ cariṃsu te ;

Vijjācaraṇapariyeṭṭhiṃ , acaruṃ brāhmaṇā pure .

292.

‘‘ Na brāhmaṇā aññamagamuṃ , napi bhariyaṃ kiṇiṃsu te ;

Sampiyeneva saṃvāsaṃ , saṅgantvā samarocayuṃ .

293.

‘‘ Aññatra tamhā samayā , utuveramaṇiṃ pati ;

Antarā methunaṃ dhammaṃ , nāssu gacchanti brāhmaṇā .

294.

‘‘ Brahmacariyañca sīlañca , ajjavaṃ maddavaṃ tapaṃ ;

Soraccaṃ avihiṃsañca , khantiñcāpi avaṇṇayuṃ .

295.

‘‘ YoP0.52 nesaṃ paramo āsi , brahmā daḷhaparakkamo ;

Sa vāpi methunaṃ dhammaṃ , supinantepi nāgamā .

296.

‘‘ Tassa vattamanusikkhantā , idheke viññujātikā ;

Brahmacariyañca sīlañca , khantiñcāpi avaṇṇayuṃ .

297.

‘‘ Taṇḍulaṃ sayanaṃ vatthaṃ , sappitelañca yāciya ;

Dhammena samodhānetvā , tato yaññamakappayuṃ .

298.

‘‘ UpaṭṭhitasmiṃT0.383 yaññasmiṃ , nāssu gāvo haniṃsu te ;

Yathā mātā pitā bhātā , aññe vāpi ca ñātakā ;

Gāvo no paramā mittā , yāsu jāyanti osadhā .

299.

‘‘ AnnadāV0.129 baladā cetā , vaṇṇadā sukhadā tathā [ sukhadā ca tā ( ka .)];

Etamatthavasaṃ ñatvā , nāssu gāvo haniṃsu te .

300.

‘‘ SukhumālāM0.324 mahākāyā , vaṇṇavanto yasassino ;

Brāhmaṇā sehi dhammehi , kiccākiccesu ussukā ;

Yāva loke avattiṃsu , sukhamedhitthayaṃ pajā .

301.

‘‘ Tesaṃ āsi vipallāso , disvāna aṇuto aṇuṃ ;

Rājino ca viyākāraṃ , nāriyo samalaṅkatā .

302.

‘‘ Rathe cājaññasaṃyutte , sukate cittasibbane ;

Nivesane nivese ca , vibhatte bhāgaso mite .

303.

‘‘ Gomaṇḍalaparibyūḷhaṃ , nārīvaragaṇāyutaṃ ;

Uḷāraṃ mānusaṃ bhogaṃ , abhijjhāyiṃsu brāhmaṇā .

304.

‘‘ Te tattha mante ganthetvā , okkākaṃ tadupāgamuṃ ;

PahūtadhanadhaññosiP0.53 , yajassu bahu te vittaṃ ;

Yajassu bahu te dhanaṃ .

305.

‘‘ Tato ca rājā saññatto , brāhmaṇehi rathesabho ;

Assamedhaṃ purisamedhaṃ , sammāpāsaṃ vājapeyyaṃ niraggaḷaṃ ;

EteT0.384 yāge yajitvāna , brāhmaṇānamadā dhanaṃ .

306.

‘‘ Gāvo sayanañca vatthañca , nāriyo samalaṅkatā ;

Rathe cājaññasaṃyutte , sukate cittasibbane .

307.

‘‘ Nivesanāni rammāni , suvibhattāni bhāgaso ;

Nānādhaññassa pūretvā , brāhmaṇānamadā dhanaṃ .

308.

‘‘ TeV0.130 ca tattha dhanaṃ laddhā , sannidhiṃ samarocayuṃ ;

Tesaṃ icchāvatiṇṇānaṃ , bhiyyo taṇhā pavaḍḍhatha ;

Te tattha mante ganthetvā , okkākaṃ punamupāgamuṃ .

309.

‘‘ Yathā āpo ca pathavī ca , hiraññaṃ dhanadhāniyaṃ ;

Evaṃ gāvo manussānaṃ , parikkhāro so hi pāṇinaṃ ;

Yajassu bahu te vittaṃ , yajassu bahu te dhanaṃ .

310.

‘‘ Tato ca rājā saññatto , brāhmaṇehi rathesabho ;

Nekā satasahassiyo , gāvo yaññe aghātayi .

311.

‘‘ NaM0.325 pādā na visāṇena , nāssu hiṃsanti kenaci ;

Gāvo eḷakasamānā , soratā kumbhadūhanā ;

Tā visāṇe gahetvāna , rājā satthena ghātayi .

312.

‘‘ TatoP0.54 devā pitaro ca [ tato ca devā pitaro ( sī . syā .)], indo asurarakkhasā ;

Adhammo iti pakkanduṃ , yaṃ satthaṃ nipatī gave .

313.

‘‘ Tayo rogā pure āsuṃ , icchā anasanaṃ jarā ;

Pasūnañca samārambhā , aṭṭhānavutimāgamuṃ .

314.

‘‘ EsoT0.385 adhammo daṇḍānaṃ , okkanto purāṇo ahu ;

Adūsikāyo haññanti , dhammā dhaṃsanti [ dhaṃsenti ( sī . pī .)] yājakā .

315.

‘‘ Evameso aṇudhammo , porāṇo viññugarahito ;

Yattha edisakaṃ passati , yājakaṃ garahatī [ garahī ( ka .)] jano .

316.

‘‘ Evaṃ dhamme viyāpanne , vibhinnā suddavessikā ;

Puthū vibhinnā khattiyā , patiṃ bhariyāvamaññatha .

317.

‘‘ KhattiyāV0.131 brahmabandhū ca , ye caññe gottarakkhitā ;

Jātivādaṃ niraṃkatvā [ nirākatvā (?) yathā anirākatajjhānoti ], kāmānaṃ vasamanvagun ’’ ti .

Evaṃ vutte , te brāhmaṇamahāsālā bhagavantaṃ etadavocuṃ –

‘‘ abhikkantaṃ , bho gotama … pe .

P0.55 … upāsake no bhavaṃ gotamo dhāretu ajjatagge pāṇupete saraṇaṃ gate ’’ ti .

Brāhmaṇadhammikasuttaṃ sattamaṃ niṭṭhitaṃ .

Issues

選擇版本

Suttanipātapāḷi

Suttanipātapāḷi