10. Āḷavakasuttaṃ
Evaṃ me sutaṃ – ekaṃ samayaṃ bhagavā āḷaviyaṃ viharati āḷavakassa yakkhassa bhavane .
Atha kho āḷavako yakkho yena bhagavā tenupasaṅkami ;
upasaṅkamitvā bhagavantaṃ etadavoca –
‘‘ nikkhama , samaṇā ’’ ti .
‘‘ Sādhāvuso ’’ ti
M0.306 bhagavā nikkhami .‘‘ Pavisa , samaṇā ’’ ti .
‘‘ Sādhāvuso ’’ ti bhagavā pāvisi .
Dutiyampi kho … pe … tatiyampi kho āḷavako yakkho bhagavantaṃ etadavoca –
‘‘ nikkhama , samaṇā ’’ ti .
‘‘ Sādhāvuso ’’ ti
T0.360 bhagavā nikkhami .‘‘ Pavisa , samaṇā ’’ ti .
‘‘ Sādhāvuso ’’ ti bhagavā pāvisi .
Catutthampi kho āḷavako yakkho bhagavantaṃ etadavoca –
‘‘ nikkhama , samaṇā ’’ ti .
‘‘ Na khvāhaṃ taṃ
P0.32 , āvuso , nikkhamissāmi .Yaṃ te karaṇīyaṃ , taṃ karohī ’’ ti .
‘‘ Pañhaṃ
V0.112 taṃ , samaṇa , pucchissāmi .Sace me na byākarissasi , cittaṃ vā te khipissāmi , hadayaṃ vā te phālessāmi , pādesu vā gahetvā pāragaṅgāya khipissāmī ’’ ti .
‘‘ Na khvāhaṃ taṃ , āvuso , passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo me cittaṃ vā khipeyya hadayaṃ vā phāleyya pādesu vā gahetvā pāragaṅgāya khipeyya .
Api ca tvaṃ , āvuso , puccha yadākaṅkhasī ’’ ti .
Atha kho āḷavako yakkho bhagavantaṃ gāthāya ajjhabhāsi –
183.
‘‘ Kiṃ sūdha vittaṃ purisassa seṭṭhaṃ , kiṃ su suciṇṇaṃ sukhamāvahāti ;
Kiṃ su [ kiṃ sū ( sī .)] have sādutaraṃ rasānaṃ , kathaṃ jīviṃ jīvitamāhu seṭṭhaṃ ’’.
184.
‘‘ Saddhīdha vittaṃ purisassa seṭṭhaṃ , dhammo suciṇṇo sukhamāvahāti ;
Saccaṃ have sādutaraṃ rasānaṃ , paññājīviṃ jīvitamāhu seṭṭhaṃ ’’.
185.
‘‘ Kathaṃ su tarati oghaṃ , kathaṃ su tarati aṇṇavaṃ ;
Kathaṃ
T0.361 su dukkhamacceti , kathaṃ su parisujjhati ’’. 186.
‘‘ Saddhā
P0.33 tarati oghaṃ , appamādena aṇṇavaṃ ;Vīriyena [ viriyena ( sī . syā . kaṃ . pī .)] dukkhamacceti , paññāya parisujjhati ’’.
187.
‘‘ Kathaṃ
M0.307 su labhate paññaṃ , kathaṃ su vindate dhanaṃ ;Kathaṃ su kittiṃ pappoti , kathaṃ mittāni ganthati ;
Asmā lokā paraṃ lokaṃ , kathaṃ pecca na socati ’’.
188.
‘‘ Saddahāno arahataṃ , dhammaṃ nibbānapattiyā ;
Sussūsaṃ [ sussūsā ( sī . pī .)] labhate paññaṃ , appamatto vicakkhaṇo .
189.
‘‘ Patirūpakārī dhuravā , uṭṭhātā vindate dhanaṃ ;
Saccena kittiṃ pappoti , dadaṃ mittāni ganthati .
190.
‘‘ Yassete
V0.113 caturo dhammā , saddhassa gharamesino ;Saccaṃ dhammo [ damo (?)] dhiti cāgo , sa ve pecca na socati .
191.
‘‘ Iṅgha aññepi pucchassu , puthū samaṇabrāhmaṇe ;
Yadi saccā damā cāgā , khantyā bhiyyodha vijjati ’’.
192.
‘‘ Kathaṃ nu dāni puccheyyaṃ , puthū samaṇabrāhmaṇe ;
Yohaṃ [ sohaṃ ( sī . pī .)] ajja pajānāmi , yo attho samparāyiko .
193.
‘‘ Atthāya vata me buddho , vāsāyāḷavimāgamā ;
Yohaṃ [ aṭṭhinhārūhi saṃyutto ( syā . ka .)] ajja pajānāmi , yattha dinnaṃ mahapphalaṃ .
194.
‘‘ So ahaṃ vicarissāmi , gāmā gāmaṃ purā puraṃ ;
Namassamāno sambuddhaṃ , dhammassa ca sudhammatan ’’ ti .
Āḷavakasuttaṃ dasamaṃ niṭṭhitaṃ .