4. Mettagūmāṇavapucchā
1055.
‘‘ Pucchāmi
V0.234T0.534 taṃ bhagavā brūhi me taṃ ,( iccāyasmā mettagū )Maññāmi taṃ vedaguṃ bhāvitattaṃ ;
Kuto nu dukkhā samudāgatā ime , ye keci lokasmimanekarūpā ’’.
1056.
‘‘ Dukkhassa
M0.437P0.202 ve maṃ pabhavaṃ apucchasi ,( mettagūti bhagavā )Taṃ te pavakkhāmi yathā pajānaṃ ;
Upadhinidānā pabhavanti dukkhā , ye keci lokasmimanekarūpā .
1057.
‘‘ Yo ve avidvā upadhiṃ karoti , punappunaṃ dukkhamupeti mando ;
Tasmā pajānaṃ upadhiṃ na kayirā , dukkhassa jātippabhavānupassī ’’.
1058.
‘‘ Yaṃ taṃ apucchimha akittayī no , aññaṃ taṃ pucchāma [ pucchāmi ( sī . pī .)] tadiṅgha brūhi ;
Kathaṃ nu dhīrā vitaranti oghaṃ , jātiṃ jaraṃ sokapariddavañca ;
Taṃ me muni sādhu viyākarohi , tathā hi te vidito esa dhammo ’’.
1059.
‘‘ Kittayissāmi
T0.535 te dhammaṃ ,( mettagūti bhagavā )Diṭṭhe dhamme anītihaṃ ;
Yaṃ viditvā sato caraṃ , tare loke visattikaṃ ’’.
1060.
‘‘ Tañcāhaṃ abhinandāmi , mahesi dhammamuttamaṃ ;
Yaṃ viditvā sato caraṃ , tare loke visattikaṃ ’’.
1061.
‘‘ Yaṃ kiñci sampajānāsi ,( mettagūti bhagavā )
Uddhaṃ adho tiriyañcāpi majjhe ;
Etesu
P0.203 nandiñca nivesanañca , panujja viññāṇaṃ bhave na tiṭṭhe . 1062.
‘‘ Evaṃvihārī
V0.235 sato appamatto , bhikkhu caraṃ hitvā mamāyitāni ;Jātiṃ jaraṃ sokapariddavañca , idheva vidvā pajaheyya dukkhaṃ ’’.
1063.
‘‘ Etābhinandāmi
M0.438 vaco mahesino , sukittitaṃ gotamanūpadhīkaṃ ;Addhā hi bhagavā pahāsi dukkhaṃ , tathā hi te vidito esa dhammo .
1064.
‘‘ Te cāpi nūnappajaheyyu dukkhaṃ , ye tvaṃ muni aṭṭhitaṃ ovadeyya ;
Taṃ taṃ namassāmi samecca nāga , appeva maṃ bhagavā aṭṭhitaṃ ovadeyya ’’.
1065.
‘‘ Yaṃ
T0.536 brāhmaṇaṃ vedagumābhijaññā , akiñcanaṃ kāmabhave asattaṃ ;Addhā hi so oghamimaṃ atāri , tiṇṇo ca pāraṃ akhilo akaṅkho .
1066.
‘‘ Vidvā ca yo [ so ( sī . syā . pī .)] vedagū naro idha , bhavābhave saṅgamimaṃ visajja ;
So
P0.204 vītataṇho anīgho nirāso , atāri so jātijaranti brūmī ’’ ti .Mettagūmāṇavapucchā catutthī niṭṭhitā .