8. Sallasuttaṃ
579.
Animittamanaññātaṃ
M0.371 , maccānaṃ idha jīvitaṃ ;Kasirañca parittañca , tañca dukkhena saṃyutaṃ .
580.
Na
P0.113 hi so upakkamo atthi , yena jātā na miyyare ;Jarampi
T0.448 patvā maraṇaṃ , evaṃdhammā hi pāṇino . 581.
Phalānamiva pakkānaṃ , pāto patanato [ papatato ( sī . pī . aṭṭha .)] bhayaṃ ;
Evaṃ jātāna maccānaṃ , niccaṃ maraṇato bhayaṃ .
582.
Yathāpi kumbhakārassa , katā mattikabhājanā ;
Sabbe bhedanapariyantā [ bhedapariyantā ( syā .)], evaṃ maccāna jīvitaṃ .
583.
Daharā ca mahantā ca , ye bālā ye ca paṇḍitā ;
Sabbe maccuvasaṃ yanti , sabbe maccuparāyaṇā .
584.
Tesaṃ maccuparetānaṃ , gacchataṃ paralokato ;
Na pitā tāyate puttaṃ , ñātī vā pana ñātake .
585.
Pekkhataṃ yeva ñātīnaṃ , passa lālapataṃ puthu ;
Ekamekova maccānaṃ , govajjho viya nīyati [ niyyati ( bahūsu )].
586.
Evamabbhāhato
V0.172 loko , maccunā ca jarāya ca ;Tasmā dhīrā na socanti , viditvā lokapariyāyaṃ .
587.
Yassa maggaṃ na jānāsi , āgatassa gatassa vā ;
Ubho ante asampassaṃ , niratthaṃ paridevasi .
588.
Paridevayamāno ce , kiñcidatthaṃ udabbahe ;
Sammūḷho hiṃsamattānaṃ , kayirā ce naṃ vicakkhaṇo .
589.
Na hi ruṇṇena sokena , santiṃ pappoti cetaso ;
Bhiyyassuppajjate dukkhaṃ , sarīraṃ cupahaññati .
590.
Kiso
P0.114 vivaṇṇo bhavati , hiṃsamattānamattanā ;Na
T0.449 tena petā pālenti , niratthā paridevanā . 591.
Sokamappajahaṃ
M0.372 jantu , bhiyyo dukkhaṃ nigacchati ;Anutthunanto kālaṅkataṃ [ kālakataṃ ( sī . syā .)], sokassa vasamanvagū .
592.
Aññepi passa gamine , yathākammūpage nare ;
Maccuno vasamāgamma , phandantevidha pāṇino .
593.
Yena yena hi maññanti , tato taṃ hoti aññathā ;
Etādiso vinābhāvo , passa lokassa pariyāyaṃ .
594.
Api vassasataṃ jīve , bhiyyo vā pana māṇavo ;
Ñātisaṅghā vinā hoti , jahāti idha jīvitaṃ .
595.
Tasmā arahato sutvā , vineyya paridevitaṃ ;
Petaṃ kālaṅkataṃ disvā , neso labbhā mayā iti .
596.
Yathā
V0.173 saraṇamādittaṃ , vārinā parinibbaye [ parinibbuto ( sī . ka .)];Evampi dhīro sapañño , paṇḍito kusalo naro ;
Khippamuppatitaṃ sokaṃ , vāto tūlaṃva dhaṃsaye .
597.
Paridevaṃ pajappañca , domanassañca attano ;
Attano sukhamesāno , abbahe sallamattano .
598.
Abbuḷhasallo asito , santiṃ pappuyya cetaso ;
Sabbasokaṃ atikkanto , asoko hoti nibbutoti .
Sallasuttaṃ aṭṭhamaṃ niṭṭhitaṃ .