5. Māghasuttaṃ

မြန်မာဘာသာ

5. Māghasuttaṃ

කතුවරයා： _System_Pali_VRI_ @ Administrator

5. Māghasuttaṃ

Evaṃ me sutaṃ – eka samayaṃ bhagavā rājagahe viharati gijjhakūṭe pabbate .

Atha kho māgho māṇavo yena bhagavā tenupasaṅkami ;

upasaṅkamitvāM0.351 bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho māgho māṇavo bhagavantaṃP0.87 etadavoca –

‘‘ Ahañhi , bho gotama , dāyako dānapati vadaññū yācayogo ;

dhammena bhoge pariyesāmi ;

dhammena bhoge pariyesitvā dhammaladdhehi bhogehi dhammādhigatehi ekassapi dadāmi dvinnampiV0.154 tiṇṇampi catunnampi pañcannampi channampi sattannampi aṭṭhannampi navannampi dasannampi dadāmi , vīsāyapi tiṃsāyapi cattālīsāyapi paññāsāyapi dadāmi , satassapi dadāmi , bhiyyopi dadāmi .

Kaccāhaṃ , bho gotama , evaṃ dadanto evaṃ yajanto bahuṃ puññaṃ pasavāmī ’’ tiT0.421 ?

‘‘ Taggha tvaṃ , māṇava , evaṃ dadanto evaṃ yajanto bahuṃ puññaṃ pasavasi .

Yo kho , māṇava , dāyako dānapati vadaññū yācayogo ;

dhammena bhoge pariyesati ;

dhammena bhoge pariyesitvā dhammaladdhehi bhogehi dhammādhigatehi ekassapi dadāti … pe … satassapi dadāti , bhiyyopi dadāti , bahuṃ so puññaṃ pasavatī ’’ ti .

Atha kho māgho māṇavo bhagavantaṃ gāthāya ajjhabhāsi –

491.

‘‘ Pucchāmahaṃ gotamaṃ vadaññuṃ ,( iti māgho māṇavo )

Kāsāyavāsiṃ agahaṃ [ agihaṃ ( sī .), agehaṃ ( pī .)] carantaṃ ;

Yo yācayogo dānapati [ dānapatī ( sī . syā . pī .)] gahaṭṭho , puññatthiko [ puññapekho ( sī . pī . ka .)] yajati puññapekkho ;

DadaṃP0.88 paresaṃ idha annapānaṃ , kathaṃ hutaṃ yajamānassa sujjhe ’’.

492.

‘‘ Yo yācayogo dānapati gahaṭṭho ,( māghāti bhagavā )

Puññatthiko yajati puññapekkho ;

Dadaṃ paresaṃ idha annapānaṃ , ārādhaye dakkhiṇeyyebhi tādi ’’.

493.

‘‘ YoM0.352 yācayogo dānapati gahaṭṭho ,( iti māgho māṇavo )

Puññatthiko yajati puññapekkho ;

Dadaṃ paresaṃ idha annapānaṃ , akkhāhi me bhagavā dakkhiṇeyye ’’.

494.

‘‘ YeT0.422 ve asattā [ alaggā ( syā .)] vicaranti loke , akiñcanā kevalino yatattā ;

Kālena tesu habyaṃ pavecche , yo brāhmaṇo puññapekkho yajetha .

495.

‘‘ Ye sabbasaṃyojanabandhanacchidā , dantā vimuttā anīghā nirāsā ;

Kālena tesu habyaṃ pavecche , yo brāhmaṇo puññapekkho yajetha .

496.

‘‘ YeV0.155 sabbasaṃyojanavippamuttā , dantā vimuttā anīghā nirāsā ;

Kālena tesu habyaṃ pavecche , yo brāhmaṇo puññapekkho yajetha .

497.

‘‘ Rāgañca dosañca pahāya mohaṃ , khīṇāsavā vūsitabrahmacariyā ;

Kālena tesu habyaṃ pavecche , yo brāhmaṇo puññapekkho yajetha .

498.

‘‘ Yesu na māyā vasati na māno , khīṇāsavā vūsitabrahmacariyā ;

Kālena tesu habyaṃ pavecche , yo brāhmaṇo puññapekkho yajetha .

499.

‘‘ YeM0.353P0.89 vītalobhā amamā nirāsā , khīṇāsavā vūsitabrahmacariyā ;

Kālena tesu habyaṃ pavecche , yo brāhmaṇo puññapekkho yajetha .

500.

‘‘ YeT0.423 ve na taṇhāsu upātipannā , vitareyya oghaṃ amamā caranti ;

Kālena tesu habyaṃ pavecche , yo brāhmaṇo puññapekkho yajetha .

501.

‘‘ Yesaṃ taṇhā natthi kuhiñci loke , bhavābhavāya idha vā huraṃ vā ;

Kālena tesu habyaṃ pavecche , yo brāhmaṇo puññapekkho yajetha .

502.

‘‘ Ye kāme hitvā agahā caranti , susaññatattā tasaraṃva ujjuṃ ;

Kālena tesu habyaṃ pavecche , yo brāhmaṇo puññapekkho yajetha .

503.

‘‘ Ye vītarāgā susamāhitindriyā , candova rāhuggahaṇā pamuttā ;

Kālena tesu habyaṃ pavecche , yo brāhmaṇo puññapekkho yajetha .

504.

‘‘ Samitāvino vītarāgā akopā , yesaṃ gatī natthidha vippahāya ;

Kālena tesu habyaṃ pavecche , yo brāhmaṇo puññapekkho yajetha .

505.

‘‘ Jahitvā jātimaraṇaṃ asesaṃ , kathaṃkathiṃ sabbamupātivattā ;

Kālena tesu habyaṃ pavecche , yo brāhmaṇo puññapekkho yajetha .

506.

‘‘ YeM0.354V0.156 attadīpā vicaranti loke , akiñcanā sabbadhi vippamuttā ;

KālenaT0.424 tesu habyaṃ pavecche , yo brāhmaṇo puññapekkho yajetha .

507.

‘‘ Ye hettha jānanti yathā tathā idaṃ , ayamantimā natthi punabbhavoti ;

Kālena tesu habyaṃ pavecche , yo brāhmaṇo puññapekkho yajetha .

508.

‘‘ YoP0.90 vedagū jhānarato satīmā , sambodhipatto saraṇaṃ bahūnaṃ ;

Kālena tamhi habyaṃ pavecche , yo brāhmaṇo puññapekkho yajetha ’’.

509.

‘‘ Addhā amoghā mama pucchanā ahu , akkhāsi me bhagavā dakkhiṇeyye ;

Tvañhettha jānāsi yathā tathā idaṃ , tathā hi te vidito esa dhammo .

510.

‘‘ Yo yācayogo dānapati gahaṭṭho ,( iti māgho māṇavo )

Puññatthiko yajati puññapekkho ;

Dadaṃ paresaṃ idha annapānaṃ ,

Akkhāhi me bhagavā yaññasampadaṃ ’’.

511.

‘‘ Yajassu yajamāno māghāti bhagavā , sabbattha ca vippasādehi cittaṃ ;

Ārammaṇaṃ yajamānassa yañño , etthappatiṭṭhāya jahāti dosaṃ .

512.

‘‘ SoT0.425 vītarāgo pavineyya dosaṃ , mettaṃ cittaṃ bhāvayamappamāṇaṃ ;

Rattindivaṃ satatamappamatto , sabbā disā pharati appamaññaṃ ’’.

513.

‘‘ KoM0.355 sujjhati muccati bajjhatī ca , kenattanā gacchati [ kenatthenā gacchati ( ka .)] brahmalokaṃ ;

Ajānato me muni brūhi puṭṭho , bhagavā hi me sakkhi brahmajjadiṭṭho ;

TuvañhiP0.91 no brahmasamosi saccaṃ , kathaṃ upapajjati brahmalokaṃ jutima ’’.

514.

‘‘ Yo yajati tividhaṃ yaññasampadaṃ ,( māghāti bhagavā )

Ārādhaye dakkhiṇeyyebhi tādi ;

EvaṃV0.157 yajitvā sammā yācayogo ,

Upapajjati brahmalokanti brūmī ’’ ti .

Evaṃ vutte , māgho māṇavo bhagavantaṃ etadavoca –

‘‘ abhikkantaṃ , bho gotama … pe … ajjatagge pāṇupetaṃ saraṇaṃ gatan ’’ ti .

Māghasuttaṃ pañcamaṃ niṭṭhitaṃ .