5. Paramaṭṭhakasuttaṃ
802.
Paramanti
V0.203 diṭṭhīsu paribbasāno , yaduttari kurute jantu loke ;Hīnāti aññe tato sabbamāha , tasmā vivādāni avītivatto .
803.
Yadattanī passati ānisaṃsaṃ , diṭṭhe
T0.491 sute sīlavate [ sīlabbate ( syā .)] mute vā ;Tadeva so tattha samuggahāya , nihīnato passati sabbamaññaṃ .
804.
Taṃ
M0.404 vāpi ganthaṃ kusalā vadanti , yaṃ nissito passati hīnamaññaṃ ;Tasmā hi diṭṭhaṃ va sutaṃ mutaṃ vā , sīlabbataṃ bhikkhu na nissayeyya .
805.
Diṭṭhimpi
P0.157 lokasmiṃ na kappayeyya , ñāṇena vā sīlavatena vāpi ;Samoti attānamanūpaneyya , hīno na maññetha visesi vāpi .
806.
Attaṃ pahāya anupādiyāno , ñāṇepi so nissayaṃ no karoti ;
Sa ve viyattesu [ viyuttesu ( sī . aṭṭha .), dviyattesu ( ka .)] na vaggasārī , diṭṭhimpi [ diṭṭhimapi ( ka .)] so na pacceti kiñci .
807.
Yassūbhayante paṇidhīdha natthi , bhavābhavāya idha vā huraṃ vā ;
Nivesanā tassa na santi keci , dhammesu niccheyya samuggahītaṃ .
808.
Tassīdha diṭṭhe va sute mute vā , pakappitā
T0.492 natthi aṇūpi saññā ;Taṃ brāhmaṇaṃ diṭṭhimanādiyānaṃ , kenīdha lokasmiṃ vikappayeyya .
809.
Na kappayanti na purekkharonti , dhammāpi tesaṃ na paṭicchitāse ;
Na
P0.158 brāhmaṇo sīlavatena neyyo , pāraṅgato na pacceti tādīti .Paramaṭṭhakasuttaṃ pañcamaṃ niṭṭhitaṃ .