3. Subhāsitasuttaṃ

Author： _System_Pali_VRI_ @ Administrator

3. Subhāsitasuttaṃ

EvaṃM0.344V0.148 me sutaṃ – eka samayaṃ bhagavā sāvatthiyaṃ viharati jetavane anāthapiṇḍikassa ārāme .

Tatra kho bhagavā bhikkhūT0.411 āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

‘‘ Catūhi , bhikkhave , aṅgehi samannāgatā vācā subhāsitā hoti , na dubbhāsitā , anavajjā ca ananuvajjā ca viññūnaṃ .

Katamehi catūhi ?

Idha , bhikkhave , bhikkhu subhāsitaṃyeva bhāsati no dubbhāsitaṃ , dhammaṃyeva bhāsati no adhammaṃ , piyaṃyeva bhāsati no appiyaṃ , saccaṃyeva bhāsati no alikaṃ .

Imehi kho , bhikkhave , catūhi aṅgehi samannāgatā vācā subhāsitā hoti , no dubbhāsitā , anavajjā ca ananuvajjā ca viññūnan ’’ ti .

Idamavoca bhagavā .

Idaṃ vatvāna sugato athāparaṃ etadavoca satthā –

452.

‘‘ Subhāsitaṃ uttamamāhu santo , dhammaṃ bhaṇe nādhammaṃ taṃ dutiyaṃ ;

Piyaṃ bhaṇe nāppiyaṃ taṃ tatiyaṃ , saccaṃ bhaṇe nālikaṃ taṃ catutthan ’’ ti .

AthaP0.79 kho āyasmā vaṅgīso uṭṭhāyāsanā ekaṃsaṃ cīvaraṃ katvā yena bhagavā tenañjaliṃ paṇāmetvā bhagavantaṃ etadavoca –

‘‘ paṭibhāti maṃ bhagavā , paṭibhāti maṃ sugatā ’’ ti .

‘‘ Paṭibhātu taṃ vaṅgīsā ’’ ti bhagavā avoca .

Atha kho āyasmā vaṅgīso bhagavantaṃ sammukhā sāruppāhi gāthāhi abhitthavi –

453.

‘‘ Tameva vācaṃ bhāseyya , yāyattānaṃ na tāpaye ;

PareT0.412 ca na vihiṃseyya , sā ve vācā subhāsitā .

454.

‘‘ Piyavācameva bhāseyya , yā vācā paṭinanditā ;

Yaṃ anādāya pāpāni , paresaṃ bhāsate piyaṃ .

455.

‘‘ Saccaṃ ve amatā vācā , esa dhammo sanantano ;

Sacce atthe ca dhamme ca , āhu santo patiṭṭhitā .

456.

‘‘ YaṃM0.345V0.149 buddho bhāsati vācaṃ , khemaṃ nibbānapattiyā ;

Dukkhassantakiriyāya , sā ve vācānamuttamā ’’ ti .

Subhāsitasuttaṃ tatiyaṃ niṭṭhitaṃ .

Issues

Select Version

Suttanipātapāḷi

Suttanipātapāḷi