4. Sundarikabhāradvājasuttaṃ

Evaṃ me sutaṃ – ekaṃ samayaṃ bhagavā kosalesu viharati sundarikāya nadiyā tīre .

Tena kho pana samayena sundarikabhāradvājo brāhmaṇo sundarikāya nadiyā tīre aggiṃ juhati , aggihuttaṃ paricarati .

Atha kho sundarikabhāradvājo brāhmaṇo aggiṃ juhitvā aggihuttaṃ paricaritvā uṭṭhāyāsanā samantā catuddisā anuvilokesi –

‘‘ ko nu kho imaṃ habyasesaṃ bhuñjeyyā ’’ ti ?

Addasā kho sundarikabhāradvājoP0.80 brāhmaṇo bhagavantaṃ avidūre aññatarasmiṃ rukkhamūle sasīsaṃ pārutaṃ nisinnaṃ ;

disvāna vāmena hatthena habyasesaṃ gahetvā dakkhiṇena hatthena kamaṇḍaluṃ gahetvā yena bhagavā tenupasaṅkami .

Atha kho bhagavā sundarikabhāradvājassa brāhmaṇassa padasaddena sīsaṃT0.413 vivari .

Atha kho sundarikabhāradvājo brāhmaṇo –

‘‘ muṇḍo ayaṃ bhavaṃ , muṇḍako ayaṃ bhavan ’’ ti tatova puna nivattitukāmo ahosi .

Atha kho sundarikabhāradvājassa brāhmaṇassa etadahosi –

‘‘ muṇḍāpi hi idhekacce brāhmaṇā bhavanti , yaṃnūnāhaṃ upasaṅkamitvā jātiṃ puccheyyan ’’ ti .

Atha kho sundarikabhāradvājo brāhmaṇo yena bhagavā tenupasaṅkami ;

upasaṅkamitvā bhagavantaṃ etadavoca –

‘‘ kiṃjacco bhavan ’’ ti ?

Atha kho bhagavā sundarikabhāradvājaṃ brāhmaṇaṃ gāthāhi ajjhabhāsi –

457.

‘‘ Na brāhmaṇo nomhi na rājaputto , na vessāyano uda koci nomhi ;

Gottaṃ pariññāya puthujjanānaṃ , akiñcano manta carāmi loke .

458.

‘‘ SaṅghāṭivāsīM0.346V0.150 agaho carāmi [ agiho ( ka . sī . pī .) ageho ( katthaci )], nivuttakeso abhinibbutatto ;

Alippamāno idha māṇavehi , akallaṃ maṃ brāhmaṇa pucchasi gottapañhaṃ ’’.

459.

‘‘ PucchantiP0.81 ve bho brāhmaṇā , brāhmaṇebhi saha brāhmaṇo no bhavan ’’ ti .

460.

‘‘ Brāhmaṇo hi ce tvaṃ brūsi , mañca brūsi abrāhmaṇaṃ ;

Taṃ taṃ sāvittiṃ pucchāmi , tipadaṃ catuvīsatakkharaṃ .

461.

‘‘ KiṃT0.414 nissitā isayo manujā , khattiyā brāhmaṇā [ paṭhamapādanto ] devatānaṃ ;

Yaññamakappayiṃsu puthū idha loke [ dutiyapādanto ( sī .)].

462.

‘‘ Yadantagū vedagū yaññakāle , yassāhutiṃ labhe tassijjheti brūmi ’’.

463.

‘‘ Addhā hi tassa hutamijjhe ,( iti brāhmaṇo )

Yaṃ tādisaṃ vedagumaddasāma ;

Tumhādisānañhi adassanena , añño jano bhuñjati pūraḷāsaṃ ’’.

464.

‘‘ Tasmātiha tvaṃ brāhmaṇa atthena , atthiko upasaṅkamma puccha ;

Santaṃ vidhūmaṃ anīghaṃ nirāsaṃ , appevidha abhivinde sumedhaṃ ’’.

465.

‘‘ Yaññe ratohaṃ bho gotama , yaññaṃ yiṭṭhukāmo nāhaṃ pajānāmi ;

Anusāsatu maṃ bhavaṃ , yatthaP0.82 hutaṃ ijjhate brūhi me taṃ ’’.

‘‘ Tena hi tvaṃ , brāhmaṇa , odahassu sotaṃ ;

dhammaṃ te desessāmi –

466.

‘‘ MāM0.347 jātiṃ pucchī caraṇañca puccha , kaṭṭhā have jāyati jātavedo ;

NīcākulīnopiT0.415 munī dhitīmā , ājāniyo hoti hirīnisedho .

467.

‘‘ Saccena danto damasā upeto , vedantagū vūsitabrahmacariyo ;

Kālena tamhi habyaṃ pavecche , yo brāhmaṇo puññapekkho [ puññapekho ( sī . pī .)] yajetha .

468.

‘‘ YeV0.151 kāme hitvā agahā caranti , susaññatattā tasaraṃva ujjuṃ ;

Kālena tesu habyaṃ pavecche , yo brāhmaṇo puññapekkho yajetha .

469.

‘‘ Ye vītarāgā susamāhitindriyā , candova rāhuggahaṇā pamuttā ;

Kālena tesu habyaṃ pavecche , yo brāhmaṇo puññapekkho yajetha .

470.

‘‘ Asajjamānā vicaranti loke , sadā satā hitvā mamāyitāni ;

Kālena tesu habyaṃ pavecche , yo brāhmaṇo puññapekkho yajetha .

471.

‘‘ Yo kāme hitvā abhibhuyyacārī , yo vedi jātīmaraṇassa antaṃ ;

ParinibbutoP0.83 udakarahadova sīto , tathāgato arahati pūraḷāsaṃ .

472.

‘‘ SamoT0.416 samehi visamehi dūre , tathāgato hoti anantapañño ;

Anūpalitto idha vā huraṃ vā , tathāgato arahati pūraḷāsaṃ .

473.

‘‘ YamhiM0.348 na māyā vasati na māno , yo vītalobho amamo nirāso ;

Panuṇṇakodho abhinibbutatto , yo brāhmaṇo sokamalaṃ ahāsi ;

Tathāgato arahati pūraḷāsaṃ .

474.

‘‘ Nivesanaṃ yo manaso ahāsi , pariggahā yassa na santi keci ;

Anupādiyāno idha vā huraṃ vā , tathāgato arahati pūraḷāsaṃ .

475.

‘‘ Samāhito yo udatāri oghaṃ , dhammaṃ caññāsi paramāya diṭṭhiyā ;

Khīṇāsavo antimadehadhārī , tathāgato arahati pūraḷāsaṃ .

476.

‘‘ Bhavāsavā yassa vacī kharā ca , vidhūpitā atthagatā na santi ;

Sa vedagū sabbadhi vippamutto , tathāgatoT0.417 arahati pūraḷāsaṃ .

477.

‘‘ Saṅgātigo yassa na santi saṅgā , yo mānasattesu amānasatto ;

DukkhaṃP0.84 pariññāya sakhettavatthuṃ , tathāgato arahati pūraḷāsaṃ .

478.

‘‘ ĀsaṃV0.152 anissāya vivekadassī , paravediyaṃ diṭṭhimupātivatto ;

Ārammaṇā yassa na santi keci , tathāgato arahati pūraḷāsaṃ .

479.

‘‘ Paroparā [ parovarā ( sī . pī .)] yassa samecca dhammā , vidhūpitā atthagatā na santi ;

Santo upādānakhaye vimutto , tathāgato arahati pūraḷāsaṃ .

480.

‘‘ SaṃyojanaṃM0.349 jātikhayantadassī , yopānudi rāgapathaṃ asesaṃ ;

Suddho nidoso vimalo akāco [ akāmo ( sī . syā .)], tathāgatoT0.418 arahati pūraḷāsaṃ .

481.

‘‘ Yo attano attānaṃ [ attanāttānaṃ ( sī . syā .)] nānupassati , samāhito ujjugato ṭhitatto ;

Sa ve anejo akhilo akaṅkho , tathāgato arahati pūraḷāsaṃ .

482.

‘‘ Mohantarā yassa na santi keci , sabbesu dhammesu ca ñāṇadassī ;

Sarīrañca antimaṃ dhāreti , patto ca sambodhimanuttaraṃ sivaṃ ;

Ettāvatā yakkhassa suddhi , tathāgato arahati pūraḷāsaṃ ’’.

483.

‘‘ HutañcaP0.85 [ huttañca ( sī . ka .)] mayhaṃ hutamatthu saccaṃ , yaṃ tādisaṃ vedagunaṃ alatthaṃ ;

Brahmā hi sakkhi paṭigaṇhātu me bhagavā , bhuñjatu me bhagavā pūraḷāsaṃ ’’.

484.

‘‘ Gāthābhigītaṃ me abhojaneyyaṃ , sampassataṃ brāhmaṇa nesa dhammo ;

Gāthābhigītaṃ panudanti buddhā , dhamme satī brāhmaṇa vuttiresā .

485.

‘‘ Aññena ca kevalinaṃ mahesiṃ , khīṇāsavaṃ kukkuccavūpasantaṃ ;

Annena pānena upaṭṭhahassu , khettañhi taṃ puññapekkhassa hoti ’’.

486.

‘‘ SādhāhaṃM0.350T0.419 bhagavā tathā vijaññaṃ , yo dakkhiṇaṃ bhuñjeyya mādisassa ;

Yaṃ yaññakāle pariyesamāno , pappuyya tava sāsanaṃ ’’.

487.

‘‘ Sārambhā yassa vigatā , cittaṃ yassa anāvilaṃ ;

Vippamutto ca kāmehi , thinaṃ yassa panūditaṃ .

488.

‘‘ SīmantānaṃV0.153 vinetāraṃ , jātimaraṇakovidaṃ ;

Muniṃ moneyyasampannaṃ , tādisaṃ yaññamāgataṃ .

489.

‘‘ Bhakuṭiṃ [ bhūkuṭiṃ ( ka . sī .), bhākuṭiṃ ( ka . sī ., ma . ni .1.226)] vinayitvāna , pañjalikā namassatha ;

Pūjetha annapānena , evaṃ ijjhanti dakkhiṇā .

490.

‘‘ BuddhoP0.86 bhavaṃ arahati pūraḷāsaṃ , puññakhettamanuttaraṃ ;

Āyāgo sabbalokassa , bhoto dinnaṃ mahapphalan ’’ ti .

Atha kho sundarikabhāradvājo brāhmaṇo bhagavantaṃ etadavoca –

‘‘ abhikkantaṃ , bho gotama , abhikkantaṃ , bho gotama !

Seyyathāpi , bho gotama , nikkujjitaṃ vā ukkujjeyya , paṭicchannaṃ vā vivareyya , mūḷhassa vā maggaṃ ācikkheyya , andhakāre vā telapajjotaṃ dhāreyya – cakkhumanto rūpāni dakkhantīti ;

evamevaṃ bhotā gotamena anekapariyāyena dhammo pakāsito .

Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca .

Labheyyāhaṃ bhoto gotamassa santike pabbajjaṃ , labheyyaṃ upasampadan ’’ ti .

Alattha khoT0.420 sundarikabhāradvājo brāhmaṇo … pe … arahataṃ ahosīti .

Sundarikabhāradvājasuttaṃ catutthaṃ niṭṭhitaṃ .

Issues

Select Version

Suttanipātapāḷi

Suttanipātapāḷi