13. Udayamāṇavapucchā
1111.
‘‘ Jhāyiṃ
V0.243 virajamāsīnaṃ ,( iccāyasmā udayo ) katakiccaṃ anāsavaṃ ;Pāraguṃ sabbadhammānaṃ , atthi pañhena āgamaṃ ;
Aññāvimokkhaṃ pabrūhi , avijjāya pabhedanaṃ ’’.
1112.
‘‘ Pahānaṃ
T0.547 kāmacchandānaṃ ,( udayāti bhagavā ) domanassāna cūbhayaṃ ;Thinassa ca panūdanaṃ , kukkuccānaṃ nivāraṇaṃ .
1113.
‘‘ Upekkhāsatisaṃsuddhaṃ , dhammatakkapurejavaṃ ;
Aññāvimokkhaṃ pabrūmi , avijjāya pabhedanaṃ ’’.
1114.
‘‘ Kiṃsu
P0.215 saṃyojano loko , kiṃsu tassa vicāraṇaṃ ;Kissassa vippahānena , nibbānaṃ iti vuccati ’’.
1115.
‘‘ Nandisaṃyojano loko , vitakkassa vicāraṇaṃ ;
Taṇhāya vippahānena , nibbānaṃ iti vuccati ’’.
1116.
‘‘ Kathaṃ satassa carato , viññāṇaṃ uparujjhati ;
Bhagavantaṃ puṭṭhumāgamma , taṃ suṇoma vaco tava ’’.
1117.
‘‘ Ajjhattañca bahiddhā ca , vedanaṃ nābhinandato ;
Evaṃ satassa carato , viññāṇaṃ uparujjhatī ’’ ti .
Udayamāṇavapucchā terasamā niṭṭhitā .