6. Gabbhinīsuttaṃ
16. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena aññatarassa paribbājakassa daharamāṇavikā pajāpati hoti gabbhinī
T0.91 upavijaññā .Atha kho sā paribbājikā taṃ paribbājakaṃ etadavoca –
‘‘ gaccha tvaṃ , brāhmaṇa , telaṃ āhara , yaṃ me vijātāya bhavissatī ’’ ti .
Evaṃ vutte , so paribbājako taṃ paribbājikaṃ etadavoca –
‘‘ kuto panāhaṃ , bhoti [ bhotiyā ( syā . pī . ka .)], telaṃ āharāmī ’’ ti ?
Dutiyampi kho sā paribbājikā taṃ paribbājakaṃ etadavoca –
‘‘ gaccha tvaṃ , brāhmaṇa , telaṃ āhara , yaṃ me vijātāya bhavissatī ’’ ti .
Dutiyampi kho so paribbājiko taṃ paribbājikaṃ etadavoca –
‘‘ kuto panāhaṃ , bhoti , telaṃ āharāmī ’’ ti ?
Tatiyampi kho sā paribbājikā taṃ paribbājakaṃ etadavoca –
‘‘ gaccha tvaṃ , brāhmaṇa , telaṃ āhara , yaṃ me vijātāya bhavissatī ’’ ti .
Tena
M0.92 kho pana samayena raññoP0.14 pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṃ pātuṃ dīyati [ diyyati ( sī . ka .)], no nīharituṃ .Atha kho tassa paribbājakassa etadahosi –
‘‘ rañño kho pana pasenadissa kosalassa koṭṭhāgāre samaṇassa vā brāhmaṇassa vā sappissa vā telassa vā yāvadatthaṃ pātuṃ dīyati , no nīharituṃ .
Yaṃnūnāhaṃ rañño pasenadissa kosalassa koṭṭhāgāraṃ gantvā telassa yāvadatthaṃ pivitvā gharaṃ āgantvā ucchadditvāna [ uggiritvāna ( sī . syā . pī .), ucchaditvā ( sī . syā . aṭṭha .), ucchaḍḍitvāna ( ka .)] dadeyyaṃ , yaṃ imissā vijātāya bhavissatī ’’ ti .
Atha
V0.84 kho so paribbājako rañño pasenadissa kosalassa koṭṭhāgāraṃ gantvā telassa yāvadatthaṃ pivitvā gharaṃ āgantvā nevaT0.92 sakkoti uddhaṃ kātuṃ , na pana adho .So dukkhāhi tibbāhi [ tippāhi ( syā .)] kharāhi kaṭukāhi vedanāhi phuṭṭho āvaṭṭati parivaṭṭati .
Atha kho bhagavā pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi .
Addasā kho bhagavā taṃ paribbājakaṃ dukkhāhi tibbāhi kharāhi kaṭukāhi vedanāhi phuṭṭhaṃ āvaṭṭamānaṃ parivaṭṭamānaṃ .
Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –
‘‘ Sukhino vata ye akiñcanā ,
Vedaguno hi janā akiñcanā ;
Sakiñcanaṃ passa vihaññamānaṃ ,
Jano janasmiṃ paṭibandhacitto ’’[ paṭibaddhacitto ( syā .), paṭibandharupo (?)] ti .
chaṭṭhaṃ ;