8. Sundarīsuttaṃ

38. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Tena kho pana samayena bhagavā sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃT0.138 .

Bhikkhusaṅghopi sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṃ .

Aññatitthiyā pana paribbājakā asakkatā honti agarukatā amānitā apūjitā anapacitā na lābhino cīvarapiṇḍapātasenāsanagilānapaccayabhesajjaparikkhārānaṃ .

Atha kho te aññatitthiyā paribbājakā bhagavato sakkāraṃ asahamānā bhikkhusaṅghassa caV0.118 yena sundarī paribbājikā tenupasaṅkamiṃsu ;

upasaṅkamitvāP0.44 sundariṃ paribbājikaṃ etadavocuṃ –

‘‘ ussahasi tvaṃ , bhagini , ñātīnaṃ atthaṃ kātun ’’ ti ?

‘‘ Kyāhaṃ , ayyā , karomi ?

Kiṃ mayā na sakkā [ kiṃ mayā sakkā ( syā . pī .)] kātuṃ ?

Jīvitampi me pariccattaṃ ñātīnaṃ atthāyā ’’ ti .

‘‘ Tena hi , bhagini , abhikkhaṇaṃ jetavanaṃ gacchāhī ’’ ti .

‘‘ Evaṃ , ayyā ’’ ti kho sundarī paribbājikā tesaṃ aññatitthiyānaṃ paribbājakānaṃ paṭissutvā abhikkhaṇaṃ jetavanaṃ agamāsi .

YadāM0.129 te aññiṃsu aññatitthiyā paribbājakā –

‘‘ vodiṭṭhā kho sundarī paribbājikā bahujanena abhikkhaṇaṃ jetavanaṃ gacchatī ’’ ti [ gacchatīti ( sī . syā . kaṃ . pī .)].

Atha naṃ jīvitā voropetvā tattheva jetavanassa parikhākūpe nikkhipitvā [ nikhanitvā ( sī . syā . pī .)] yena rājā pasenadi kosalo tenupasaṅkamiṃsu ;

upasaṅkamitvā rājānaṃ pasenadiṃ kosalaṃ etadavocuṃ –

‘‘ yā sā , mahārāja , sundarī paribbājikā ;

sā no na dissatī ’’ ti .

‘‘ Kattha pana tumhe āsaṅkathā ’’ tiT0.139 ?

‘‘ Jetavane , mahārājā ’’ ti .

‘‘ Tena hi jetavanaṃ vicinathā ’’ ti .

Atha kho te aññatitthiyā paribbājakā jetavanaṃ vicinitvā yathānikkhittaṃ parikhākūpā uddharitvā mañcakaṃ āropetvā sāvatthiṃ pavesetvā rathiyāya rathiyaṃ siṅghāṭakena siṅghāṭakaṃ upasaṅkamitvā manusse ujjhāpesuṃ –

‘‘ Passathāyyā samaṇānaṃ sakyaputtiyānaṃ kammaṃ !

Alajjino ime samaṇā sakyaputtiyā dussīlā pāpadhammā musāvādino abrahmacārino .

Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti !

Natthi imesaṃ sāmaññaṃ , natthi imesaṃ brahmaññaṃ .

Naṭṭhaṃ imesaṃ sāmaññaṃ , naṭṭhaṃ imesaṃ brahmaññaṃ .

Kuto imesaṃ sāmaññaṃ , kuto imesaṃ brahmaññaṃ ?

Apagatā ime sāmaññā , apagatā ime brahmaññā .

Kathañhi nāma puriso purisakiccaṃ karitvā itthiṃ jīvitā voropessatī ’’ ti !

Tena kho pana samayena sāvatthiyaṃ manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti –

‘‘ Alajjino ime samaṇā sakyaputtiyā dussīlā pāpadhammā musāvādino abrahmacārinoV0.119 .

Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti !

Natthi imesaṃ sāmaññaṃ , natthi imesaṃ brahmaññaṃ .

Naṭṭhaṃ imesaṃ sāmaññaṃ , naṭṭhaṃ imesaṃ brahmaññaṃ .

Kuto imesaṃ sāmaññaṃ , kuto imesaṃ brahmaññaṃ ?

Apagatā ime sāmaññā , apagatā imeT0.140 brahmaññā .

Kathañhi nāma puriso purisakiccaṃ karitvā itthiṃ jīvitā voropessatī ’’ ti !

Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisiṃsu .

SāvatthiyaṃP0.45 piṇḍāya caritvā pacchābhattaṃ piṇḍapātapaṭikkantāM0.130 yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ nisīdiṃsu .

Ekamantaṃ nisinnā kho te bhikkhū bhagavantaṃ etadavocuṃ –

‘‘ Etarahi , bhante , sāvatthiyaṃ manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti –

‘ alajjino ime samaṇā sakyaputtiyā dussīlā pāpadhammā musāvādino abrahmacārino .

Ime hi nāma dhammacārino samacārino brahmacārino saccavādino sīlavanto kalyāṇadhammā paṭijānissanti .

Natthi imesaṃ sāmaññaṃ , natthi imesaṃ brahmaññaṃ .

Naṭṭhaṃ imesaṃ sāmaññaṃ , naṭṭhaṃ imesaṃ brahmaññaṃ .

Kuto imesaṃ sāmaññaṃ , kuto imesaṃ brahmaññaṃ ?

Apagatā ime sāmaññā , apagatā ime brahmaññā .

Kathañhi nāma puriso purisakiccaṃ karitvā itthiṃ jīvitā voropessatī ’’’ ti !

‘‘ Neso , bhikkhave , saddo ciraṃ bhavissati sattāhameva bhavissati .

Sattāhassa accayena antaradhāyissati .

Tena hi , bhikkhave , ye manussā bhikkhū disvā asabbhāhi pharusāhi vācāhi akkosanti paribhāsanti rosanti vihesanti , te tumhe imāya gāthāya paṭicodetha –

‘‘‘ AbhūtavādīT0.141 nirayaṃ upeti ,

Yo vāpi [ yo cāpi ( sī . pī . ka .)] katvā na karomi cāha ;

Ubhopi te pecca samā bhavanti ,

Nihīnakammā manujā paratthā ’’’ ti .

Atha kho te bhikkhū bhagavato santike imaṃ gāthaṃ pariyāpuṇitvā ye manussā bhikkhū disvāV0.120 asabbhāhi pharusāhi vācāhi akkosanti paribhāsanti rosanti vihesanti te imāya gāthāya paṭicodenti –

‘‘ Abhūtavādī nirayaṃ upeti ,

Yo vāpi katvā na karomicāha ;

Ubhopi te pecca samā bhavanti ,

Nihīnakammā manujā paratthā ’’ ti .

ManussānaṃM0.131 etadahosi –

‘‘ akārakā ime samaṇā sakyaputtiyā .

Nayimehi kataṃ .

Sapantime samaṇā sakyaputtiyā ’’ ti .

Neva so saddo ciraṃ ahosi .

Sattāhameva ahosi .

Sattāhassa accayena antaradhāyi .

Atha kho sambahulā bhikkhū yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ nisīdiṃsu .

Ekamantaṃ nisinnā kho te bhikkhū bhagavato etadavocuṃ –

‘‘ Acchariyaṃ , bhante , abbhutaṃ , bhante !

Yāva subhāsitaṃ cidaṃ bhante bhagavatā –

‘ neso , bhikkhave , saddo ciraṃ bhavissati .

Sattāhameva bhavissati .

Sattāhassa accayenaT0.142 antaradhāyissatī ’ ti .

Antarahito so , bhante , saddo ’’ ti .

Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

‘‘ Tudanti vācāya janā asaññatā ,

Sarehi saṅgāmagataṃva kuñjaraṃ ;

Sutvāna vākyaṃ pharusaṃ udīritaṃ ,

Adhivāsaye bhikkhu aduṭṭhacitto ’’ ti .

aṭṭhamaṃ ;

Issues

Select Version

Udānapāḷi

Udānapāḷi