10. Bhaddiyasuttaṃ

Author： _System_Pali_VRI_ @ Administrator

10. Bhaddiyasuttaṃ

20. Evaṃ me sutaṃ – ekaṃ samayaṃ bhagavā anupiyāyaṃ viharati ambavane .

Tena kho pana samayena āyasmā bhaddiyo kāḷīgodhāya putto araññagatopi rukkhamūlagatopi suññāgāragatopi abhikkhaṇaṃ udānaṃ udānesi –

‘‘ aho sukhaṃ , aho sukhan ’’ ti !

Assosuṃ kho sambahulā bhikkhū āyasmato bhaddiyassa kāḷīgodhāya puttassa araññagatassapi rukkhamūlagatassapi suññāgāragatassapi abhikkhaṇaṃ udānaṃ udānentassa –

‘‘ aho sukhaṃ , aho sukhan ’’ ti !

Sutvāna nesaṃ etadahosi –

‘‘ nissaṃsayaṃ kho , āvuso , āyasmā bhaddiyo kāḷīgodhāya putto anabhirato brahmacariyaṃ carati , yaṃsa pubbe agāriyabhūtassa [ agārikabhūtassa ( syā .)] rajjasukhaṃ , so tamanussaramāno araññagatopiP0.19 rukkhamūlagatopi suññāgāragatopiT0.100 abhikkhaṇaṃ udānaṃ udānesi –

‘ aho sukhaṃ , aho sukhan ’’’ ti !

Atha kho sambahulā bhikkhū yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ nisīdiṃsu .

Ekamantaṃ nisinnā kho te bhikkhū bhagavantaṃ etadavocuṃ –

‘‘ āyasmā , bhante , bhaddiyo kāḷīgodhāya putto araññagatopi rukkhamūlagatopi suññāgāragatopi abhikkhaṇaṃ udānaṃ udānesi –

‘ aho sukhaṃ , aho sukhan ’ ti !

Nissaṃsayaṃ kho , bhante , āyasmā bhaddiyo kāḷīgodhāya putto anabhirato brahmacariyaṃ carati .

Yaṃsa pubbe agāriyabhūtassa rajjasukhaṃ , so tamanussaramāno araññagatopi rukkhamūlagatopi suññāgāragatopi abhikkhaṇaṃ udānaṃ udānesi –

‘ aho sukhaṃ , aho sukhan ’’’ ti !

AthaM0.99V0.90 kho bhagavā aññataraṃ bhikkhuṃ āmantesi –

‘‘ ehi tvaṃ , bhikkhu , mama vacanena bhaddiyaṃ bhikkhuṃ āmantehi –

‘ satthā taṃ , āvuso bhaddiya , āmantetī ’’’ ti .

‘‘ Evaṃ , bhante ’’ ti kho so bhikkhu bhagavato paṭissutvā yenāyasmā bhaddiyo kāḷīgodhāya putto tenupasaṅkami ;

upasaṅkamitvā bhaddiyaṃ kāḷīgodhāya puttaṃ etadavoca –

‘‘ satthā taṃ , āvuso bhaddiya , āmantetī ’’ ti .

‘‘ Evamāvuso ’’ ti kho āyasmā bhaddiyo kāḷīgodhāya putto tassa bhikkhuno paṭissutvā yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinnaṃ kho āyasmantaṃ bhaddiyaṃ kāḷīgodhāya puttaṃ bhagavā etadavoca –

‘‘ Saccaṃ kira tvaṃ , bhaddiya , araññagatopi rukkhamūlagatopi suññāgāragatopi abhikkhaṇaṃ udānaṃ udānesi –

‘ aho sukhaṃ , aho sukhan ’’’ ti !

‘‘ Evaṃ , bhante ’’ ti .

‘‘ Kiṃ pana [ kaṃ pana ( syā pī .)] tvaṃ , bhaddiya , atthavasaṃ sampassamāno araññagatopi rukkhamūlagatopi suññāgāragatopiT0.101 abhikkhaṇaṃ udānaṃ udānesi –

‘ aho sukhaṃ , aho sukhan ’’’ ti !

‘‘ Pubbe me , bhante , agāriyabhūtassa rajjaṃ kārentassa antopi antepure rakkhā susaṃvihitā ahosi , bahipi antepure rakkhā susaṃvihitā ahosi , antopi nagare rakkhā susaṃvihitā ahosi , bahipi nagare rakkhā susaṃvihitā ahosi , antopi janapade rakkhā susaṃvihitā ahosi , bahipi janapade rakkhā susaṃvihitā ahosi .

So kho ahaṃ , bhante , evaṃ rakkhito gopito santo bhīto ubbiggo ussaṅkī utrāsī vihāsiṃ .

Etarahi kho panāhaṃ , bhante , araññagatopi rukkhamūlagatopi suññāgāragatopi eko [ ekako ( syā . pī .)] abhīto anubbiggo anussaṅkī anutrāsī appossukko pannalomo paradattavutto [ paradavutto ( ka . sī . syā . pī .)], migabhūtena cetasā viharāmi .

Imaṃ [ idaṃ ( sī . ka .)] kho ahaṃ , bhante , atthavasaṃ sampassamāno araññagatopiP0.20 rukkhamūlagatopi suññāgāragatopi abhikkhaṇaṃ udānaṃ udānesi [ udānemi ( ka .)]–

‘ aho sukhaṃ , aho sukhan ’’’ ti !

Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

‘‘ YassantaratoM0.100 na santi kopā ,

Itibhavābhavatañca vītivatto ;

TaṃV0.91 vigatabhayaṃ sukhiṃ asokaṃ ,

Devā nānubhavanti dassanāyā ’’ ti .

dasamaṃ ;

Mucalindavaggo dutiyo niṭṭhito .

Tassuddānaṃ –

MucalindoT0.102 rājā daṇḍena , sakkāro upāsakena ca ;

Gabbhinī ekaputto ca , suppavāsā visākhā ca ;

Kāḷīgodhāya bhaddiyoti .

Issues

Select Version

Udānapāḷi

Udānapāḷi