3. Maghadevasuttaṃ

308. EvaṃT2.415M2.262V2.272 me sutaṃ – ekaṃ samayaṃ bhagavā mithilāyaṃ viharati maghadevaambavane [ makhādevaambavane ( sī . pī .), magghadevaambavane ( ka .)].

Atha kho bhagavā aññatarasmiṃ padese sitaṃ pātvākāsi .

Atha kho āyasmato ānandassa etadahosi –

‘‘ ko nu kho hetu , ko paccayo bhagavato sitassa pātukammāya ?

Na akāraṇena tathāgatā sitaṃ pātukarontī ’’ ti .

Atha kho āyasmā ānando ekaṃsaṃ cīvaraṃ katvā yena bhagavā tenañjaliṃ paṇāmetvā bhagavantaṃ etadavoca –

‘‘ ko nu kho , bhante , hetu , ko paccayo bhagavato sitassa pātukammāya ?

Na akāraṇena tathāgatā sitaṃ pātukarontī ’’ ti .

‘‘ Bhūtapubbaṃ , ānanda , imissāyeva mithilāyaṃ rājā ahosi maghadevo nāma dhammiko dhammarājā dhamme ṭhito mahārājā ;

dhammaṃ carati brāhmaṇagahapatikesu negamesu ceva jānapadesu ca ;

uposathañca upavasati cātuddasiṃ pañcadasiṃP2.75 aṭṭhamiñca pakkhassa .

Atha kho , ānanda , rājā maghadevo bahūnaṃ vassānaṃ bahūnaṃ vassasatānaṃ bahūnaṃ vassasahassānaṃ accayena kappakaṃ āmantesi –

‘ yadā me , samma kappaka , passeyyāsi sirasmiṃ palitāni jātāni , atha me āroceyyāsī ’ ti .

‘ Evaṃ , devā ’ ti kho , ānanda , kappako rañño maghadevassa paccassosi .

Addasā kho , ānanda , kappako bahūnaṃ vassānaṃT2.416 bahūnaṃ vassasatānaṃ bahūnaṃ vassasahassānaṃ accayena rañño maghadevassa sirasmiṃ palitāni jātāni .

Disvāna rājānaṃ maghadevaṃ etadavoca –

‘ pātubhūtā kho devassa devadūtā , dissanti sirasmiṃ palitāni jātānī ’ ti .

‘ Tena hi , samma kappaka , tāni palitāni sādhukaṃ saṇḍāsena uddharitvā mama añjalismiṃ patiṭṭhāpehī ’ ti .

‘ Evaṃ , devā ’ ti kho , ānanda , kappako rañño maghadevassa paṭissutvā tāni palitāni sādhukaṃ saṇḍāsena uddharitvā rañño maghadevassa añjalismiṃ patiṭṭhāpesi .

309.‘‘ Atha kho , ānanda , rājā maghadevo kappakassa gāmavaraṃ datvā jeṭṭhaputtaṃ kumāraṃ āmantāpetvā etadavoca –

‘ pātubhūtā kho me , tāta kumāra , devadūtā ;

dissanti sirasmiṃ palitāni jātāni ;

bhuttā kho pana me mānusakā kāmā ;

samayo dibbe kāme pariyesituṃ .

EhiM2.263V2.273 tvaṃ , tāta kumāra , imaṃ rajjaṃ paṭipajja .

Ahaṃ pana kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissāmi .

Tena hi , tāta kumāra , yadā tvampi passeyyāsi sirasmiṃ palitāni jātāni , atha kappakassa gāmavaraṃ datvā jeṭṭhaputtaṃ kumāraṃ sādhukaṃ rajje samanusāsitvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajeyyāsi .

Yena me idaṃ kalyāṇaṃ vattaṃ nihitaṃ anuppavatteyyāsi , mā kho me tvaṃ antimapuriso ahosi .

Yasmiṃ kho , tāta kumāra , purisayuge vattamāne evarūpassa kalyāṇassa vattassaT2.417 samucchedo hoti so tesaṃ antimapuriso hoti .

Taṃ tāhaṃ , tāta kumāra , evaṃ vadāmi – yena me idaṃ kalyāṇaṃ vattaṃP2.76 nihitaṃ anuppavatteyyāsi , mā kho me tvaṃ antimapuriso ahosī ’ ti .

Atha kho , ānanda , rājā maghadevo kappakassa gāmavaraṃ datvā jeṭṭhaputtaṃ kumāraṃ sādhukaṃ rajje samanusāsitvā imasmiṃyeva maghadevaambavane kesamassuṃ ohāretvā kāsāyāni vatthāni acchādetvā agārasmā anagāriyaṃ pabbaji .

So mettāsahagatena cetasā ekaṃ disaṃ pharitvā vihāsi , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena [ abyāpajjhena ( sī . syā . kaṃ . pī .), abyāpajjena ( ka .)] pharitvā vihāsi .

Karuṇāsahagatena cetasā … muditāsahagatena cetasā … upekkhāsahagatena cetasā ekaṃ disaṃ pharitvā vihāsi , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā vihāsi .

‘‘ Rājā kho panānanda , maghadevo caturāsītivassasahassāni kumārakīḷitaṃ kīḷi , caturāsītivassasahassāni oparajjaṃ kāresi , caturāsītivassasahassāni rajjaṃ kāresi , caturāsītivassasahassāni imasmiṃyeva maghadevaambavane agārasmā anagāriyaṃ pabbajito brahmacariyamacari .

So cattāro brahmavihāre bhāvetvāT2.418 kāyassa bhedā paraṃ maraṇā brahmalokūpago ahosi .

310.‘‘ AthaM2.264 kho rañño , ānanda , maghadevassa putto bahūnaṃ vassānaṃ bahūnaṃ vassasatānaṃ bahūnaṃ vassasahassānaṃ accayena kappakaṃ āmantesi –

‘ yadā me , samma kappaka , passeyyāsiV2.274 sirasmiṃ palitāni jātāni , atha kho āroceyyāsī ’ ti .

‘ Evaṃ , devā ’ ti kho , ānanda , kappako rañño maghadevassa puttassa paccassosi .

Addasā kho , ānanda , kappako bahūnaṃ vassānaṃ bahūnaṃ vassasatānaṃ bahūnaṃ vassasahassānaṃ accayena rañño maghadevassa puttassa sirasmiṃ palitāni jātāni .

Disvāna rañño maghadevassa puttaṃ etadavoca –

‘ pātubhūtā kho devassa devadūtā ;

dissanti sirasmiṃ palitāniP2.77 jātānī ’ ti .

‘ Tena hi , samma kappaka , tāni palitāni sādhukaṃ saṇḍāsena uddharitvā mama añjalismiṃ patiṭṭhāpehī ’ ti .

‘ Evaṃ , devā ’ ti kho , ānanda , kappako rañño maghadevassa puttassa paṭissutvā tāni palitāni sādhukaṃ saṇḍāsena uddharitvā rañño maghadevassa puttassa añjalismiṃ patiṭṭhāpesi .

‘‘ Atha kho , ānanda , rañño maghadevassa putto kappakassa gāmavaraṃ datvā jeṭṭhaputtaṃ kumāraṃ āmantāpetvā etadavoca –

‘ pātubhūtā kho , me , tāta kumāra , devadūtā ;

dissanti sirasmiṃ palitāni jātāni ;

bhuttā kho pana me mānusakā kāmā ;

samayo dibbe kāme pariyesituṃ .

Ehi tvaṃ , tāta kumāra , imaṃ rajjaṃ paṭipajja .

Ahaṃ pana kesamassuṃ ohāretvā kāsāyāni vatthāniT2.419 acchādetvā agārasmā anagāriyaṃ pabbajissāmi .

Yena me idaṃ kalyāṇaṃ vattaṃ nihitaṃ anuppavatteyyāsi , mā kho me tvaṃ antimapuriso ahosi .

Yasmiṃ kho , tāta kumāra , purisayuge vattamāne evarūpassa kalyāṇassa vattassa samucchedo hoti so tesaṃ antimapuriso hoti .

Taṃ tāhaṃ , tāta kumāra , evaṃ vadāmi – yena me idaṃ kalyāṇaṃ vattaṃ nihitaṃ anuppavatteyyāsi , mā kho me tvaṃ antimapuriso ahosī ’ ti .

Atha kho , ānanda , rañño maghadevassa putto kappakassa gāmavaraṃ datvā jeṭṭhaputtaṃ kumāraṃ sādhukaṃ rajje samanusāsitvā imasmiṃyeva maghadevaambavane kesamassuṃ ohāretvā kāsāyāniM2.265 vatthāni acchādetvā agārasmā anagāriyaṃ pabbaji .

So mettāsahagatena cetasā ekaṃ disaṃ pharitvā vihāsi , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā vihāsi .

Karuṇāsahagatena cetasā … muditāsahagatena cetasā … upekkhāsahagatena cetasā ekaṃT2.420V2.275 disaṃ pharitvā vihāsi , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvāP2.78 vihāsi .

Rañño kho panānanda , maghadevassa putto caturāsītivassasahassāni kumārakīḷitaṃ kīḷi , caturāsītivassasahassāni oparajjaṃ kāresi , caturāsītivassasahassāni rajjaṃ kāresi , caturāsītivassasahassāni imasmiṃyeva maghadevaambavane agārasmā anagāriyaṃ pabbajito brahmacariyamacari .

So cattāro brahmavihāre bhāvetvā kāyassa bhedā paraṃ maraṇā brahmalokūpago ahosi .

311.‘‘ Rañño kho panānanda , maghadevassa puttapaputtakā tassa paramparā caturāsītirājasahassāni [ caturāsītikhattiyasahassāni ( sī . pī .), caturāsītisahassāni ( syā . kaṃ .)] imasmiṃyeva maghadevaambavane kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajiṃsu .

Te mettāsahagatena cetasā ekaṃ disaṃ pharitvā vihariṃsu , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā vihariṃsu .

Karuṇāsahagatena cetasā … muditāsahagatena cetasā … upekkhāsahagatena cetasā ekaṃ disaṃ pharitvā vihariṃsu , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulenaT2.421 mahaggatena appamāṇena averena abyābajjhena pharitvā vihariṃsu .

Caturāsītivassasahassāni kumārakīḷitaṃ kīḷiṃsu , caturāsītivassasahassāni oparajjaṃ kāresuṃ , caturāsītivassasahassāni rajjaṃ kāresuṃ , caturāsītivassasahassāni imasmiṃyeva maghadevaambavane agārasmāM2.266 anagāriyaṃ pabbajitā brahmacariyamacariṃsu .

Te cattāro brahmavihāre bhāvetvā kāyassa bhedā paraṃ maraṇā brahmalokūpagā ahesuṃ .

Nimi tesaṃ rājā [ rājānaṃ ( sī . pī .)] pacchimako ahosi dhammiko dhammarājā dhamme ṭhito mahārājā ;

dhammaṃ carati brāhmaṇagahapatikesu negamesu ceva jānapadesu ca ;

uposathañca upavasati cātuddasiṃ pañcadasiṃ aṭṭhamiñca pakkhassa .

312.‘‘ Bhūtapubbaṃ , ānanda , devānaṃ tāvatiṃsānaṃ sudhammāyaṃP2.79 sabhāyaṃ sannisinnānaṃ sannipatitānaṃ ayamantarākathā udapādi –

‘ lābhā vata , bho , videhānaṃ , suladdhaṃ vata , bho , videhānaṃ , yesaṃ nimi rājā dhammiko dhammarājā dhamme ṭhito mahārājā ;

dhammaṃ carati brāhmaṇagahapatikesuV2.276 negamesu ceva jānapadesu ca ;

uposathañca upavasati cātuddasiṃ pañcadasiṃ aṭṭhamiñca pakkhassā ’ ti .

Atha kho , ānanda , sakko devānamindo deve tāvatiṃse āmantesi –

‘ iccheyyātha no tumhe , mārisā , nimiṃ rājānaṃ daṭṭhun ’ ti ?

‘ Icchāma mayaṃ , mārisa , nimiṃ rājānaṃ daṭṭhun ’ ti .

Tena kho pana , ānanda , samayena nimi rājā tadahuposathe pannarase sīsaṃnhāto [ sasīsaṃ nahāto ( sī .), sīsanhāto ( syā . kaṃ .)] uposathiko uparipāsādavaragatoT2.422 nisinno hoti .

Atha kho , ānanda , sakko devānamindo – seyyathāpi nāma balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya , evameva – devesu tāvatiṃsesu antarahito nimissa rañño pamukhe pāturahosi .

Atha kho , ānanda , sakko devānamindo nimiṃ rājānaṃ etadavoca –

‘ lābhā te , mahārāja , suladdhaṃ te , mahārāja .

Devā , mahārāja , tāvatiṃsā sudhammāyaṃ sabhāyaṃ kittayamānarūpā sannisinnā –

‘‘ lābhā vata , bho , videhānaṃ , suladdhaṃ vata , bho , videhānaṃ , yesaṃ nimi rājā dhammiko dhammarājā dhamme ṭhito mahārājā ;

dhammaṃ carati brāhmaṇagahapatikesu negamesu ceva jānapadesu ca ;

uposathañca upavasati cātuddasiṃ pañcadasiṃ aṭṭhamiñca pakkhassā ’’ ti .

Devā te , mahārāja , tāvatiṃsā dassanakāmā .

Tassa te ahaṃ , mahārāja , sahassayuttaṃ ājaññarathaṃ pahiṇissāmi ;

abhiruheyyāsi , mahārāja , dibbaṃ yānaṃ avikampamāno ’ ti .

Adhivāsesi kho , ānanda , nimi rājā tuṇhībhāvena .

313.‘‘ AthaM2.267 kho , ānanda , sakko devānamindo nimissa rañño adhivāsanaṃ viditvā – seyyathāpi nāma balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya , evameva – nimissa rañño pamukhe antarahito devesu tāvatiṃsesu pāturahosi .

Atha kho , ānanda , sakko devānamindo mātaliṃ saṅgāhakaṃ āmantesi –

‘ ehi tvaṃ , samma mātali , sahassayuttaṃ ājaññarathaṃ yojetvāT2.423 nimiṃ rājānaṃ upasaṅkamitvā evaṃ vadehi – ayaṃ te , mahārāja , sahassayutto ājaññaratho sakkena devānamindena pesito ;

abhiruheyyāsi , mahārāja , dibbaṃ yānaṃP2.80 avikampamāno ’ ti .

‘ Evaṃ , bhaddantavā ’ ti kho , ānanda , mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā nimiṃ rājānaṃ upasaṅkamitvā etadavoca –

‘ ayaṃ te , mahārāja , sahassayutto ājaññaratho sakkena devānamindena pesito ;

abhiruha , mahārāja , dibbaṃ yānaṃ avikampamāno .

Api ca , mahārāja , katamena taṃ nemi , yena vā pāpakammā pāpakānaṃ kammānaṃV2.277 vipākaṃ paṭisaṃvedenti , yena vā kalyāṇakammā kalyāṇakammānaṃ vipākaṃ paṭisaṃvedentī ’ ti ?

‘ Ubhayeneva maṃ , mātali , nehī ’ ti .

Sampavesesi [ sampāpesi ( sī . pī .)] kho , ānanda , mātali , saṅgāhako nimiṃ rājānaṃ sudhammaṃ sabhaṃ .

Addasā kho , ānanda , sakko devānamindo nimiṃ rājānaṃ dūratova āgacchantaṃ .

Disvāna nimiṃ rājānaṃ etadavoca –

‘ ehi kho , mahārāja .

Svāgataṃ , mahārāja .

Devā te dassanakāmā , mahārāja , tāvatiṃsā sudhammāyaṃ sabhāyaṃ kittayamānarūpā sannisinnā –

‘‘ lābhā vata , bho , videhānaṃ , suladdhaṃ vata , bho , videhānaṃ , yesaṃ nimi rājā dhammiko dhammarājā dhamme ṭhito mahārājā ;

dhammaṃ carati brāhmaṇagahapatikesu negamesu ceva jānapadesu ca ;

uposathañca upavasati cātuddasiṃ pañcadasiṃ aṭṭhamiñca pakkhassā ’’ ti .

Devā te , mahārāja , tāvatiṃsā dassanakāmāT2.424 .

Abhirama , mahārāja , devesu devānubhāvenā ’ ti .

‘ Alaṃ , mārisa , tattheva maṃ mithilaṃ paṭinetu .

Tathāhaṃ dhammaṃ carissāmi brāhmaṇagahapatikesu negamesu ceva jānapadesu ca ;

uposathañca upavasāmi cātuddasiṃ pañcadasiṃ aṭṭhamiñca pakkhassā ’ ti .

314.‘‘ Atha kho , ānanda , sakko devānamindo mātaliṃ saṅgāhakaṃ āmantesi –

‘ ehi tvaṃ , samma mātali , sahassayuttaṃ ājaññarathaṃ yojetvā nimiṃM2.268 rājānaṃ tattheva mithilaṃ paṭinehī ’ ti .

‘ Evaṃ , bhaddantavā ’ ti kho , ānanda , mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā nimiṃ rājānaṃ tattheva mithilaṃ paṭinesi .

Tatra sudaṃ , ānanda , nimi rājā dhammaṃ carati brāhmaṇagahapatikesu negamesu ceva jānapadesu ca , uposathañcaP2.81 upavasati cātuddasiṃ pañcadasiṃ aṭṭhamiñca pakkhassāti .

Atha kho , ānanda , nimi rājā bahūnaṃ vassānaṃ bahūnaṃ vassasatānaṃ bahūnaṃ vassasahassānaṃ accayena kappakaṃ āmantesi –

‘ yadā me , samma kappaka , passeyyāsi sirasmiṃ palitāni jātāni , atha me āroceyyāsī ’ ti .

‘ Evaṃ , devā ’ ti kho , ānanda , kappako nimissa rañño paccassosi .

Addasā kho , ānanda , kappako bahūnaṃ vassānaṃ bahūnaṃ vassasatānaṃ bahūnaṃ vassasahassānaṃ accayena nimissa rañño sirasmiṃ palitāni jātāni .

Disvāna nimiṃ rājānaṃ etadavoca –

‘ pātubhūtā kho devassa devadūtā ;

dissanti sirasmiṃ palitāni jātānī ’ ti .

‘ Tena hi , samma kappaka , tāni palitāni sādhukaṃT2.425 saṇḍāsena uddharitvā mama añjalismiṃ patiṭṭhāpehī ’ ti .

‘ Evaṃ , devā ’ ti kho , ānanda , kappako nimissa rañño paṭissutvā tāni palitāni sādhukaṃ saṇḍāsenaV2.278 uddharitvā nimissa rañño añjalismiṃ patiṭṭhāpesi .

Atha kho , ānanda , nimi rājā kappakassa gāmavaraṃ datvā jeṭṭhaputtaṃ kumāraṃ āmantāpetvā etadavoca –

‘ pātubhūtā kho me , tāta kumāra , devadūtā ;

dissanti sirasmiṃ palitāni jātāni ;

bhuttā kho pana me mānusakā kāmā ;

samayo dibbe kāme pariyesituṃ .

Ehi tvaṃ , tāta kumāra , imaṃ rajjaṃ paṭipajja .

Ahaṃ pana kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajissāmi .

Yena me idaṃ kalyāṇaṃ vattaṃ nihitaṃ anuppavatteyyāsi , mā kho me tvaṃ antimapuriso ahosi .

Yasmiṃ kho , tāta kumāra , purisayuge vattamāne evarūpassa kalyāṇassa vattassa samucchedo hoti so tesaṃ antimapuriso hoti .

Taṃ tāhaṃ , tāta kumāra , evaṃ vadāmi –

‘ yena me idaṃ kalyāṇaṃ vattaṃ nihitaṃ anuppavatteyyāsi , mā kho me tvaṃ antimapuriso ahosī ’ ti .

315.‘‘ AthaM2.269 kho , ānanda , nimi rājā kappakassa gāmavaraṃ datvāT2.426 jeṭṭhaputtaṃ kumāraṃ sādhukaṃ rajje samanusāsitvā imasmiṃyeva maghadevaambavane kesamassuṃ ohāretvā kāsāyāni vatthāni acchādetvā agārasmā anagāriyaṃ pabbaji .

So mettāsahagatena cetasā ekaṃ disaṃ pharitvā vihāsi , tathā dutiyaṃP2.82 , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena cetasā vipulena mahaggatena appamāṇena averena abyābajjhena pharitvā vihāsi .

Karuṇāsahagatena cetasā … muditāsahagatena cetasā … upekkhāsahagatena cetasā ekaṃ disaṃ pharitvā vihāsi , tathā dutiyaṃ , tathā tatiyaṃ , tathā catutthaṃ ;

iti uddhamadho tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā vipulena mahaggatena appamāṇena averena abyābajjhena pharitvā vihāsi .

Nimi kho , panānanda , rājā caturāsītivassasahassāni kumārakīḷitaṃ kīḷi , caturāsītivassasahassāni oparajjaṃ kāresi , caturāsītivassasahassāni rajjaṃ kāresi , caturāsītivassasahassāni imasmiṃyeva maghadevaambavane agārasmā anagāriyaṃ pabbajito brahmacariyamacari .

So cattāro brahmavihāre bhāvetvā kāyassa bhedā paraṃ maraṇā brahmalokūpago ahosi .

Nimissa kho panānanandaV2.279 , rañño kaḷārajanako nāma putto ahosi .

Na so agārasmā anagāriyaṃ pabbaji .

So taṃ kalyāṇaṃ vattaṃ samucchindi .

So tesaṃ antimapuriso ahosi .

316.‘‘ SiyāT2.427 kho pana te , ānanda , evamassa –

‘ añño nūna tena samayena rājā maghadevo ahosi , yena taṃ kalyāṇaṃ vattaṃ nihitan ’ ti [ yo taṃ kalyāṇaṃ vattaṃ nihinīti ( sī .)].

Na kho panetaṃ , ānanda , evaṃ daṭṭhabbaṃ .

Ahaṃ tena samayena rājā maghadevo ahosiṃ .( Ahaṃ taṃ kalyāṇaṃ vattaṃ nihiniṃ ,)[() natthi ( ka .)] mayā taṃ kalyāṇaṃ vattaṃ nihitaṃ ;

pacchimā janatā anuppavattesi .

Taṃ kho panānanda , kalyāṇaṃ vattaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati , yāvadeva brahmalokūpapattiyā .

Idaṃ kho panānanda , etarahi mayā kalyāṇaṃ vattaṃM2.270 nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati .

Katamañcānanda , etarahi mayā kalyāṇaṃ vattaṃ nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati ?

Ayameva ariyo aṭṭhaṅgiko maggo , seyyathidaṃ – sammādiṭṭhi , sammāsaṅkappo , sammāvācā , sammākammanto , sammāājīvo , sammāvāyāmoP2.83 , sammāsati , sammāsamādhi .

Idaṃ kho , ānanda , etarahi mayā kalyāṇaṃ vattaṃ nihitaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati .

Taṃ vo ahaṃ , ānanda , evaṃ vadāmi –

‘ yena me idaṃ kalyāṇaṃ vattaṃ nihitaṃ anuppavatteyyātha , mā kho me tumhe antimapurisā ahuvattha ’.

Yasmiṃ kho , ānanda , purisayuge vattamāne evarūpassa kalyāṇassa vattassaT2.428 samucchedo hoti so tesaṃ antimapuriso hoti .

Taṃ vo ahaṃ , ānanda , evaṃ vadāmi –

‘ yena me idaṃ kalyāṇaṃ vattaṃ nihitaṃ anuppavatteyyātha , mā kho me tumhe antimapurisā ahuvatthā ’’’ ti .

Idamavoca bhagavā .

Attamano āyasmā ānando bhagavato bhāsitaṃ abhinandīti .

Maghadevasuttaṃ niṭṭhitaṃ tatiyaṃ .

Issues

Select Version

Majjhimapaṇṇāsapāḷi

Majjhimapaṇṇāsapāḷi