6. Sallasuttavaṇṇanā
254. Chaṭṭhe tatrāti tesu dvīsu janesu .
Anuvedhaṃ vijjheyyāti tasseva vaṇamukhassa aṅgulantare vā dvaṅgulantare vā āsannapadese anugatavedhaṃ .
Evaṃ viddhassa hi sā anuvedhā vedanā
P3.77 paṭhamavedanāya balavatarā hoti , pacchā uppajjamānā domanassavedanāpi evameva purimavedanāya balavatarā hoti .Dukkhāya vedanāya nissaraṇan ti dukkhāya vedanāya hi samādhimaggaphalāni nissaraṇaṃ , taṃ so na jānāti , kāmasukhameva nissaraṇanti jānāti .
Tāsaṃ vedanānan ti tāsaṃ sukhadukkhavedanānaṃ .
Saññutto naṃ vedayatīti kilesehi sampayuttova hutvā taṃ vedanaṃ
V3.115 vedayati , na vippayutto .Saññutto dukkhasmāti karaṇatthe nissakkaṃ , dukkhena sampayuttoti attho .
Saṅkhātadhammassāti viditadhammassa tulitadhammassa .
Bahussutassāti pariyattibahussutassa paṭivedhabahussutassa ca .
Sammā pajānāti bhavassa pāragūti bhavassa pāraṃ nibbānaṃ gato , tadeva nibbānaṃ sammā pajānāti .
Imasmimpi sutte ārammaṇānusayova kathito .
Ariyasāvakesu ca khīṇāsavo ettha dhuraṃ , anāgāmīpi vaṭṭatīti vadanti .