8. Gilānavaggo
1-5.Paṭhamagilānasuttādivaṇṇanā
74-78.
Gilānavaggassa
P2.370 paṭhame amukasmin ti asukasmiṃ .Ayameva vā pāṭho .
Appaññātoti aññāto apākaṭo .
Navopi hi koci paññāto hoti rāhulatthero viya sumanasāmaṇero viya ca , ayaṃ pana navo ceva apaññāto ca .
Sesamettha vuttanayamevāti .
Tathā ito paresu catūsu .
6. Paṭhamaavijjāpahānasuttavaṇṇanā
79. Chaṭṭhe aniccato jānatoti dukkhānattavasena jānatopi pahīyatiyeva , idaṃ pana aniccalakkhaṇaṃ dassetvā vutte bujjhanakassa ajjhāsayena vuttaṃ .
7. Dutiyaavijjāpahānasuttavaṇṇanā
80. Sattame sabbe dhammāti sabbe tebhūmakadhammā .
Nālaṃ abhinivesāyāti abhinivesaparāmāsaggāhena
V3.17 gaṇhituṃ na yuttā .Sabbanimittānīti sabbāni saṅkhāranimittāni .
Aññato passatīti yathā apariññātābhiniveso jano passati , tato aññato passati .
Apariññātābhiniveso hi jano sabbanimittānipi attato passati .
Pariññātābhiniveso pana anattato passati , no attatoti evaṃ imasmiṃ sutte anattalakkhaṇameva kathitaṃ .
8. Sambahulabhikkhusuttavaṇṇanā
81. Aṭṭhame
M3.17 idha noti ettha no -kāro nipātamattameva .Sesaṃ uttānatthameva .
Kevalaṃ idha dukkhalakkhaṇaṃ kathitanti veditabbaṃ .
9. Lokapañhāsuttavaṇṇanā
82. Navame lujjatīti palujjati bhijjati .
Idha aniccalakkhaṇaṃ kathitaṃ .
10. Phaggunapañhāsuttavaṇṇanā
83. Dasame chinnapapañceti taṇhāpapañcassa chinnattā chinnapapañce .
Chinnavaṭumeti taṇhāvaṭumasseva chinnattā chinnavaṭume .
Kiṃ pucchāmīti pucchati ?
Atikkantabuddhehi pariharitāni cakkhusotādīni pucchāmīti pucchati .
Atha vā sace magge bhāvitepi anāgate cakkhusotādivaṭṭaṃ vaḍḍheyya , taṃ pucchāmīti pucchatīti .
Gilānavaggo aṭṭhamo .