9. Mahāsāropamasuttaṃ

307. EvaṃT1.362M1.250V1.253P1.192 me sutaṃ – ekaṃ samayaṃ bhagavā rājagahe viharati gijjhakūṭe pabbate acirapakkante devadatte .

Tatra kho bhagavā devadattaṃ ārabbha bhikkhū āmantesi –

‘‘ Idha , bhikkhave , ekacco kulaputto saddhā agārasmā anagāriyaṃ pabbajito hoti –

‘ otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi , dukkhotiṇṇo dukkhapareto , appeva nāma imassa kevalassa dukkhakkhandhassa antakiriyā paññāyethā ’ ti .

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena attamano hoti paripuṇṇasaṅkappo .

So tena lābhasakkārasilokena attānukkaṃseti paraṃ vambheti –

‘ ahamasmi lābhasakkārasilokavā [ lābhī silokavā ( sī . pī .), lābhī sakkāra silokavā ( syā .)], ime panaññe bhikkhū appaññātā appesakkhā ’ ti .

So tena lābhasakkārasilokena majjati pamajjati pamādaṃ āpajjati , pamatto samāno dukkhaṃ viharati .

‘‘ Seyyathāpi , bhikkhave , puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ atikkamma phegguṃ atikkamma tacaṃ atikkamma papaṭikaṃ , sākhāpalāsaṃ chetvā ādāya pakkameyya ‘ sāran ’ ti maññamāno .

Tamenaṃ cakkhumā puriso disvā evaṃ vadeyya –

‘ na vatāyaṃ bhavaṃ puriso aññāsiT1.363 sāraṃ , na aññāsi phegguṃ , na aññāsi tacaṃ , na aññāsi papaṭikaṃ , na aññāsi sākhāpalāsaṃ .

Tathā hayaṃ [ tathāpāyaṃ ( ka .)] bhavaṃ puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ atikkamma phegguṃ atikkamma tacaṃ atikkamma papaṭikaṃ , sākhāpalāsaṃ chetvā ādāya pakkanto ‘ sāran ’ ti maññamāno .

Yañcassa sārena sārakaraṇīyaṃ tañcassa atthaṃ nānubhavissatī ’ ti .

Evameva kho , bhikkhave , idhekacco kulaputto saddhā agārasmā anagāriyaṃ pabbajito hoti – otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi , dukkhotiṇṇo dukkhaparetoM1.251 , appeva nāma imassa kevalassa antakiriyā paññāyethā ’ ti .

So evaṃ pabbajitoV1.254 samāno lābhasakkārasilokaṃ abhinibbatteti .

So tena lābhasakkārasilokena attamano hoti paripuṇṇasaṅkappo .

So tena lābhasakkārasilokena attānukkaṃseti , paraṃ vambhetiP1.193 ‘ ahamasmi lābhasakkārasilokavā , ime panaññe bhikkhū appaññātā appesakkhā ’ ti .

So tena lābhasakkārasilokena majjati pamajjati pamādaṃ āpajjati , pamatto samāno dukkhaṃ viharati .

Ayaṃ vuccati , bhikkhave , bhikkhu sākhāpalāsaṃ aggahesi brahmacariyassa ;

tena ca vosānaṃ āpādi .

308.‘‘ Idha pana , bhikkhave , ekacco kulaputto saddhā agārasmā anagāriyaṃ pabbajito hoti –

‘ otiṇṇomhi jātiyā jarāya maraṇena sokehiT1.364 paridevehi dukkhehi domanassehi upāyāsehi , dukkhotiṇṇo dukkhapareto , appeva nāma imassa kevalassa dukkhakkhandhassa antakiriyā paññāyethā ’ ti .

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

So tena lābhasakkārasilokena na majjati nappamajjati na pamādaṃ āpajjati .

Appamatto samāno sīlasampadaṃ ārādheti .

So tāya sīlasampadāya attamano hoti paripuṇṇasaṅkappo .

So tāya sīlasampadāya attānukkaṃseti , paraṃ vambheti –

‘ ahamasmi sīlavā kalyāṇadhammo , ime panaññe bhikkhū dussīlā pāpadhammā ’ ti .

So tāya sīlasampadāya majjati pamajjati pamādaṃ āpajjati , pamatto samāno dukkhaṃ viharati .

‘‘ Seyyathāpi , bhikkhave , puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ atikkamma phegguṃ atikkamma tacaṃ , papaṭikaṃ chetvā ādāya pakkameyya ‘ sāran ’ ti maññamāno .

Tamenaṃ cakkhumā puriso disvā evaṃ vadeyya –

‘ na vatāyaṃ bhavaṃ puriso aññāsi sāraṃ , na aññāsi phegguṃ , na aññāsi tacaṃ , na aññāsi papaṭikaṃ , na aññāsi sākhāpalāsaṃ .

Tathā hayaṃ bhavaṃ puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃM1.252 atikkamma phegguṃ atikkammaT1.365 tacaṃ , papaṭikaṃ chetvā ādāya pakkanto ‘ sāran ’ ti maññamāno ;

yañcassa sārena sārakaraṇīyaṃ tañcassa atthaṃ nānubhavissatī ’ ti .

‘‘ EvamevaV1.255 kho , bhikkhave , idhekacco kulaputto saddhā agārasmā anagāriyaṃ pabbajito hoti –

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

So tena lābhasakkārasilokena na majjati nappamajjati na pamādaṃ āpajjati .

Appamatto samāno sīlasampadaṃ ārādheti .

So tāya sīlasampadāya attamano hoti paripuṇṇasaṅkappo .

So tāya sīlasampadāya attānukkaṃseti , paraṃ vambheti –

‘ ahamasmi sīlavā kalyāṇadhammo , ime panaññe bhikkhū dussīlā pāpadhammā ’ ti .

So tāya sīlasampadāya majjati pamajjati pamādaṃ āpajjati , pamatto samāno dukkhaṃ viharati .

AyaṃP1.194 vuccati , bhikkhave , bhikkhu papaṭikaṃ aggahesi brahmacariyassa ;

tena ca vosānaṃ āpādi .

309.‘‘ Idha pana , bhikkhave , ekacco kulaputto saddhā agārasmā anagāriyaṃ pabbajito hoti –

‘ otiṇṇomhi jātiyā jarāya maraṇena sokehiT1.366 paridevehi dukkhehi domanassehi upāyāsehi , dukkhotiṇṇo dukkhapareto , appeva nāma imassa kevalassa dukkhakkhandhassa antakiriyā paññāyethā ’ ti .

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

So tena lābhasakkārasilokena na majjati nappamajjati na pamādaṃ āpajjati , appamatto samāno sīlasampadaṃ ārādheti .

So tāya sīlasampadāya attamano hoti no ca kho paripuṇṇasaṅkappo .

So tāya sīlasampadāya na attānukkaṃseti , na paraṃ vambheti .

So tāya sīlasampadāya na majjati nappamajjati na pamādaṃ āpajjati .

Appamatto samāno samādhisampadaṃ ārādhetiM1.253 .

So tāya samādhisampadāya attamano hoti paripuṇṇasaṅkappo .

So tāya samādhisampadāya attānukkaṃseti , paraṃ vambheti –

‘ ahamasmi samāhito ekaggacitto , ime panaññe bhikkhū asamāhitā vibbhantacittā ’ ti .

So tāya samādhisampadāya majjati pamajjati pamādaṃ āpajjati , pamatto samāno dukkhaṃ viharati .

‘‘ SeyyathāpiV1.256 , bhikkhave , puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ atikkamma phegguṃ tacaṃ chetvā ādāya pakkameyya ‘ sāran ’ ti maññamāno .

Tamenaṃ cakkhumā puriso disvā evaṃ vadeyya ‘ na vatāyaṃ bhavaṃ puriso aññāsi sāraṃT1.367 , na aññāsi phegguṃ , na aññāsi tacaṃ , na aññāsi papaṭikaṃ , na aññāsi sākhāpalāsaṃ .

Tathā hayaṃ bhavaṃ puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ atikkamma phegguṃ tacaṃ chetvā ādāya pakkanto ‘ sāran ’ ti maññamāno .

Yañcassa sārena sārakaraṇīyaṃ tañcassa atthaṃ nānubhavissatī ’ ti .

‘‘ Evameva kho , bhikkhave , idhekacco kulaputto saddhā agārasmā anagāriyaṃ pabbajito hoti –

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

So tena lābhasakkārasilokena na majjati nappamajjati na pamādaṃ āpajjati , appamatto samāno sīlasampadaṃ ārādheti .

So tāya sīlasampadāya attamano hoti no ca kho paripuṇṇasaṅkappo .

So tāya sīlasampadāya na attānukkaṃseti , na paraṃ vambheti .

So tāya sīlasampadāya na majjati nappamajjati na pamādaṃ āpajjati , appamatto samāno samādhisampadaṃ ārādheti .

So tāya samādhisampadāya attamano hoti paripuṇṇasaṅkappo .

So tāya samādhisampadāya attānukkaṃseti , paraṃ vambheti –

‘ ahamasmiT1.368 samāhito ekaggacitto , ime panaññe bhikkhū asamāhitā vibbhantacittā ’ ti .

So tāyaM1.254 samādhisampadāya majjati pamajjati pamādaṃ āpajjati , pamatto samāno dukkhaṃ viharati .

Ayaṃ vuccatiP1.195 , bhikkhave , bhikkhu tacaṃ aggahesi brahmacariyassa ;

tena ca vosānaṃ āpādi .

310.‘‘ Idha pana , bhikkhave , ekacco kulaputto saddhā agārasmā anagāriyaṃ pabbajito hoti –

‘ otiṇṇomhi jātiyā jarāya maraṇena sokehi paridevehi dukkhehi domanassehi upāyāsehi , dukkhotiṇṇo dukkhapareto , appeva nāma imassa kevalassa dukkhakkhandhassaV1.257 antakiriyā paññāyethā ’ ti .

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

So tena lābhasakkārasilokena na majjati nappamajjati na pamādaṃ āpajjati .

Appamatto samāno sīlasampadaṃ ārādheti .

So tāya sīlasampadāya attamano hoti , no ca kho paripuṇṇasaṅkappo .

So tāya sīlasampadāya na attānukkaṃseti , na paraṃ vambheti .

So tāya sīlasampadāya na majjati nappamajjati na pamādaṃ āpajjati , appamatto samāno samādhisampadaṃ ārādheti .

So tāya samādhisampadāya attamano hoti , no ca kho paripuṇṇasaṅkappo .

So tāya samādhisampadāya na attānukkaṃseti , na paraṃ vambheti .

So tāya samādhisampadāya na majjati nappamajjatiT1.369 na pamādaṃ āpajjati appamatto samāno ñāṇadassanaṃ ārādheti .

So tena ñāṇadassanena attamano hoti paripuṇṇasaṅkappo .

So tena ñāṇadassanena attānukkaṃseti , paraṃ vambheti –

‘ ahamasmi jānaṃ passaṃ viharāmi .

Ime panaññe bhikkhū ajānaṃ apassaṃ viharantī ’ ti .

So tena ñāṇadassanena majjati pamajjati pamādaṃ āpajjati , pamatto samāno dukkhaṃ viharati .

‘‘ Seyyathāpi , bhikkhave , puriso sāratthiko sāragavesī sārapariyesanaṃ caramāno mahato rukkhassa tiṭṭhato sāravato atikkammeva sāraṃ phegguṃ chetvā ādāya pakkameyya ‘ sāran ’ ti maññamāno .

Tamenaṃ cakkhumā puriso disvā evaṃ vadeyya –

‘ na vatāyaṃ bhavaṃ puriso aññāsi sāraṃ na aññāsi phegguṃ na aññāsi tacaṃ na aññāsi papaṭikaṃ na aññāsi sākhāpalāsaṃ .

Tathā hayaṃ bhavaṃ puriso sāratthiko sāragavesī sārapariyesanaṃ caramāno mahato rukkhassaM1.255 tiṭṭhato sāravato atikkammeva sāraṃ phegguṃ chetvā ādāya pakkanto ‘ sāran ’ ti maññamāno .

Yañcassa sārena sārakaraṇīyaṃ tañcassa atthaṃ nānubhavissatī ’ ti .

EvamevaP1.196 kho , bhikkhave , idhekacco kulaputto saddhā agārasmā anagāriyaṃ pabbajito hoti –

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokenaT1.370 na attamano hoti na paripuṇṇasaṅkappo .

So tena lābhasakkārasilokena na attānukkaṃseti , na paraṃ vambheti .

SoV1.258 tena lābhasakkārasilokena na majjati nappamajjati na pamādaṃ āpajjati , appamatto samāno sīlasampadaṃ ārādheti .

So tāya sīlasampadāya attamano hoti , no ca kho paripuṇṇasaṅkappo .

So tāya sīlasampadāya na attānukkaṃseti , na paraṃ vambheti .

So tāya sīlasampadāya na majjati nappamajjati na pamādaṃ āpajjati , appamatto samāno samādhisampadaṃ ārādheti .

So tāya samādhisampadāya attamano hoti , no ca kho paripuṇṇasaṅkappo .

So tāya samādhisampadāya na attānukkaṃseti , na paraṃ vambheti .

So tāya samādhisampadāya na majjati nappamajjati na pamādaṃ āpajjati , appamatto samāno ñāṇadassanaṃ ārādheti .

So tena ñāṇadassanena attamano hoti paripuṇṇasaṅkappo .

So tena ñāṇadassanena attānukkaṃseti , paraṃ vambheti –

‘ ahamasmi jānaṃ passaṃ viharāmi , ime panaññe bhikkhū ajānaṃ apassaṃ viharantī ’ ti .

So tena ñāṇadassanena majjati pamajjati pamādaṃ āpajjati , pamatto samāno dukkhaṃ viharati .

Ayaṃ vuccati , bhikkhave , bhikkhu phegguṃ aggahesi brahmacariyassa ;

tena ca vosānaṃ āpādi .

311.‘‘ Idha pana , bhikkhave , ekacco kulaputto saddhā agārasmā anagāriyaṃ pabbajito hoti –

‘ otiṇṇomhi jātiyā jarāya maraṇena sokehiT1.371 paridevehi dukkhehi domanassehi upāyāsehi , dukkhotiṇṇo dukkhapareto , appeva nāma imassa kevalassa dukkhakkhandhassa antakiriyā paññāyethā ’ ti .

So evaṃ pabbajito samāno lābhasakkārasilokaṃ abhinibbatteti .

So tena lābhasakkārasilokena na attamano hotiM1.256 , na paripuṇṇasaṅkappo .