Kāyānupassanā paṭikūlamanasikārapabbaṃ
110.‘‘ Puna caparaṃ , bhikkhave , bhikkhu imameva kāyaṃ uddhaṃ pādatalā , adho kesamatthakā , tacapariyantaṃ pūraṃ nānappakārassa asucino paccavekkhati –
‘ atthi imasmiṃ kāye kesā lomā nakhā dantā taco maṃsaṃ
T1.106 nhāru [ nahāru ( sī . syā . pī .)] aṭṭhi aṭṭhimiñjaṃ vakkaṃ hadayaṃ yakanaṃ kilomakaṃ pihakaṃ papphāsaṃ antaṃ antaguṇaṃ udariyaṃ karīsaṃ pittaṃ semhaṃ pubbo lohitaṃ sedo medo assu vasā kheḷo siṅghāṇikā lasikā muttan ’ ti [ muttaṃ matthaluṅganti ( ka .)].‘‘ Seyyathāpi , bhikkhave , ubhatomukhā putoḷi [ mūtoḷī ( sī . syā . pī .)] pūrā nānāvihitassa dhaññassa , seyyathidaṃ – sālīnaṃ
V1.74 vīhīnaṃ muggānaṃ māsānaṃ tilānaṃ taṇḍulānaṃ .Tamenaṃ cakkhumā puriso muñcitvā paccavekkheyya –
‘ ime sālī ime vīhī ime
M1.73 muggā ime māsā ime tilā ime taṇḍulā ’ ti .Evameva kho , bhikkhave , bhikkhu imameva kāyaṃ uddhaṃ pādatalā , adho kesamatthakā , tacapariyantaṃ pūraṃ nānappakārassa asucino paccavekkhati –
‘ atthi imasmiṃ kāye kesā lomā … pe … muttan ’ ti .
‘‘ Iti ajjhattaṃ vā kāye kāyānupassī viharati … pe … evampi kho , bhikkhave , bhikkhu kāye kāyānupassī viharati .
Paṭikūlamanasikārapabbaṃ niṭṭhitaṃ .