10. Kusītārambhavatthusuttaṃ

80.[ di . ni .3.334,358]‘‘ AṭṭhimāniP4.332 , bhikkhave , kusītavatthūni .

Katamāni aṭṭha ?

Idha , bhikkhave , bhikkhunā kammaṃ kattabbaṃ hoti .

Tassa evaṃ hoti –

‘ kammaṃ kho me kattabbaṃ bhavissati .

Kammaṃ kho pana me karontassa kāyo kilamissati .

Handāhaṃ nipajjāmī ’ ti .

So nipajjati , na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , paṭhamaṃ kusītavatthu .

‘‘ PunaV3.153 caparaṃ , bhikkhave , bhikkhunā kammaṃ kataṃ hoti .

Tassa evaṃ hoti –

‘ ahaṃT4.344 kho kammaṃ akāsiṃ .

Kammaṃ kho pana me karontassa kāyo kilanto .

Handāhaṃ nipajjāmī ’ ti .

So nipajjati , na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , dutiyaṃ kusītavatthu .

‘‘ PunaM3.148 caparaṃ , bhikkhave , bhikkhunā maggo gantabbo hoti .

Tassa evaṃ hoti –

‘ maggo me gantabbo bhavissati .

Maggaṃ kho pana me gacchantassa kāyo kilamissati .

Handāhaṃ nipajjāmī ’ ti .

So nipajjati , na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , tatiyaṃ kusītavatthu .

‘‘ Puna caparaṃ , bhikkhave , bhikkhunā maggo gato hoti .

Tassa evaṃ hoti –

‘ ahaṃ kho maggaṃ agamāsiṃ .

Maggaṃ kho pana me gacchantassa kāyo kilanto .

Handāhaṃ nipajjāmī ’ ti .

So nipajjati , na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ bhikkhave , catutthaṃ kusītavatthu .

‘‘ Puna caparaṃ , bhikkhave , bhikkhu gāmaṃ vā nigamaṃ vā piṇḍāya caranto na labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hotiP4.333 –

‘ ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ .

Tassa me kāyo kilanto akammañño .

Handāhaṃ nipajjāmī ’ ti .

So nipajjati , na vīriyaṃ ārabhati … pe … idaṃ , bhikkhave , pañcamaṃ kusītavatthu .

‘‘ PunaT4.345 caparaṃ , bhikkhave , bhikkhu gāmaṃ vā nigamaṃ vā piṇḍāya caranto labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hoti –

‘ ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vā bhojanassa yāvadatthaṃ pāripūriṃ .

Tassa me kāyo garuko akammañño māsācitaṃ maññe .

Handāhaṃ nipajjāmī ’ ti .

So nipajjati , na vīriyaṃ ārabhati … pe … idaṃ , bhikkhave , chaṭṭhaṃ kusītavatthu .

‘‘ Puna caparaṃ , bhikkhave , bhikkhuno uppanno hoti appamattako ābādho .

Tassa evaṃ hotiV3.154 –

‘ uppanno kho me ayaṃ appamattako ābādho atthi kappo nipajjituṃ .

Handāhaṃ nipajjāmī ’ ti .

So nipajjati , na vīriyaṃ ārabhati … pe … idaṃ , bhikkhave , sattamaṃ kusītavatthu .

‘‘ Puna caparaṃ , bhikkhave , bhikkhu gilānā vuṭṭhito [ a . ni .6.16 suttavaṇṇanā ṭīkā oloketabbā ] hoti aciravuṭṭhito gelaññā .

Tassa evaṃ hoti –

‘ ahaṃ kho gilānā vuṭṭhito aciravuṭṭhito gelaññā .

Tassa me kāyo dubbalo akammañño .

Handāhaṃ nipajjāmī ’ tiM3.149 .

So nipajjati , na vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , aṭṭhamaṃ kusītavatthu .

Imāni kho , bhikkhave , aṭṭha kusītavatthūni .

[ dī . ni .3.335,358]‘‘ AṭṭhimāniP4.334 , bhikkhave , ārambhavatthūni .

Katamāni aṭṭha ?

Idha , bhikkhave , bhikkhunā kammaṃ kattabbaṃ hoti .

Tassa evaṃ hoti –

‘ kammaṃ kho me kattabbaṃ bhavissati .

Kammaṃ kho mayā karontena na sukaraṃ buddhānaṃ sāsanaṃ manasi kātuṃ .

Handāhaṃ paṭikacceva vīriyaṃ ārabhāmi appattassaT4.346 pattiyā anadhigatassa adhigamāya asacchikatassa sacchikiriyāyā ’ ti .

So vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , paṭhamaṃ ārambhavatthu .

‘‘ Puna caparaṃ , bhikkhave , bhikkhunā kammaṃ kataṃ hoti .

Tassa evaṃ hoti –

‘ ahaṃ kho kammaṃ akāsiṃ .

Kammaṃ kho panāhaṃ karonto nāsakkhiṃ buddhānaṃ sāsanaṃ manasi kātuṃ .

Handāhaṃ vīriyaṃ ārabhāmi appattassa pattiyā anadhigatassa adhigamāya asacchikatassa sacchikiriyāyā ’ ti .

So vīriyaṃ ārabhati .

Idaṃ , bhikkhave , dutiyaṃ ārambhavatthu .

‘‘ Puna caparaṃ , bhikkhave , bhikkhunā maggo gantabbo hoti .

Tassa evaṃ hoti – maggo kho me gantabbo bhavissati .

Maggaṃ kho pana me gacchantena na sukaraṃ buddhānaṃ sāsanaṃ manasi kātuṃ .

Handāhaṃ vīriyaṃ … pe … idaṃ , bhikkhave , tatiyaṃ ārambhavatthu .

‘‘ Puna caparaṃ , bhikkhave , bhikkhunā maggo gato hoti .

Tassa evaṃ hoti – ahaṃ kho maggaṃV3.155 agamāsiṃ .

Maggaṃ kho panāhaṃ gacchanto nāsakkhiṃ buddhānaṃ sāsanaṃ manasi kātuṃ .

Handāhaṃ vīriyaṃ ārabhāmi … pe … idaṃ , bhikkhave , catutthaṃ ārambhavatthu .

‘‘ PunaP4.335 caparaṃ , bhikkhave , bhikkhu gāmaṃ vā nigamaṃ vā piṇḍāya caranto na labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hoti – ahaṃ kho gāmaṃ vā nigamaṃ vā piṇḍāya caranto nālatthaṃ lūkhassa vā paṇītassa vā bhojanassa yāvadatthaṃ pāripūriṃ .

Tassa meT4.347 kāyo lahuko kammañño .

Handāhaṃ vīriyaṃ ārabhāmi … pe … idaṃ , bhikkhave , pañcamaṃ ārambhavatthu .

‘‘ PunaM3.150 caparaṃ , bhikkhave , bhikkhu gāmaṃ vā nigamaṃ vā piṇḍāya caranto labhati lūkhassa vā paṇītassa vā bhojanassa yāvadatthaṃ pāripūriṃ .

Tassa evaṃ hoti – ahaṃ kho gāmaṃ vā nigamaṃ vā piṇḍāya caranto alatthaṃ lūkhassa vā paṇītassa vā bhojanassa yāvadatthaṃ pāripūriṃ .

Tassa me kāyo balavā kammañño .

Handāhaṃ vīriyaṃ ārabhāmi … pe … idaṃ , bhikkhave , chaṭṭhaṃ ārambhavatthu .

‘‘ Puna caparaṃ , bhikkhave , bhikkhuno uppanno hoti appamattako ābādho .

Tassa evaṃ hoti – uppanno kho me ayaṃ appamattako ābādho .

Ṭhānaṃ kho panetaṃ vijjati yaṃ me ābādho pavaḍḍheyya .

Handāhaṃ paṭikacceva vīriyaṃ ārabhāmi … pe … idaṃ , bhikkhave , sattamaṃ ārambhavatthu .

‘‘ Puna caparaṃ , bhikkhave , bhikkhu gilānā vuṭṭhito hoti aciravuṭṭhito gelaññā .

Tassa evaṃ hoti –

‘ ahaṃ kho gilānā vuṭṭhito aciravuṭṭhito gelaññā .

Ṭhānaṃ kho panetaṃ vijjati yaṃ me ābādho paccudāvatteyya .

Handāhaṃ paṭikacceva vīriyaṃ ārabhāmi appattassa pattiyā anadhigatassa adhigamāya asacchikatassa sacchikiriyāyā ’ ti .

So vīriyaṃ ārabhati appattassa pattiyā anadhigatassa adhigamāya asacchikatassa sacchikiriyāya .

Idaṃ , bhikkhave , aṭṭhamaṃ ārambhavatthu .

Imāni kho , bhikkhave , aṭṭha ārambhavatthūnī ’’ ti .

Dasamaṃ .

Yamakavaggo tatiyo .

TassuddānaṃV3.156 –

DveT4.348P4.336 saddhā dve maraṇassatī , dve sampadā athāpare ;

Icchā alaṃ parihānaṃ , kusītārambhavatthūnīti .

Issues

Select Version

Aṭṭhakanipātapāḷi

Aṭṭhakanipātapāḷi