12. Āsevanapaccayaniddesavaṇṇanā
12. Āsevanapaccayaniddese purimā purimāti sabbanayesu samanantarātītāva daṭṭhabbā .
Kasmā panettha anantarapaccaye viya ‘‘ purimā purimā kusalā
M0.373 dhammā pacchimānaṃ pacchimānaṃ abyākatānaṃ dhammānan ’’ tiādinā nayena bhinnajātikehi saddhiṃ niddeso na katoti ?Attano gatiṃ gāhāpetuṃ asamatthatāya .
Bhinnajātikā hi bhinnajātikānaṃ arūpadhammānaṃ āsevanaguṇena paguṇabalavabhāvaṃ
V0.371 sādhayamānā attano kusalādibhāvasaṅkhātaṃ gatiṃ gāhāpetuṃ na sakkonti .Tasmā tehi saddhiṃ niddesaṃ akatvā ye yesaṃ vāsanāsaṅkhātena āsevanena paguṇatarabalavatarabhāvavisiṭṭhaṃ attano kusalādibhāvasaṅkhātaṃ gatiṃ gāhāpetuṃ sakkonti , tesaṃ tehi samānajātikeheva saddhiṃ niddeso katoti veditabbo .
Atha vipākābyākataṃ kasmā na gahitanti ?
Āsevanābhāvena .
Vipākañhi kammavasena vipākabhāvappattaṃ kammapariṇāmitaṃ hutvā vattati nirussāhaṃ dubbalanti taṃ āsevanaguṇena attano sabhāvaṃ gāhāpetvā paribhāvetvā neva aññaṃ vipākaṃ uppādetuṃ sakkoti , na purimavipākānubhāvaṃ gahetvā uppajjitunti .
Kammavegakkhittaṃ pana patitaṃ viya hutvā uppajjatīti sabbathāpi vipāke āsevanaṃ natthīti āsevanābhāvena vipākaṃ na gahitaṃ .
Kusalākusalakiriyānantaraṃ uppajjamānampi cetaṃ kammapaṭibaddhavuttitāya āsevanaguṇaṃ na gaṇhātīti kusalādayopissa āsevanapaccayā na honti .
Apica nānājātikattāpete na hontiyeva .
Bhūmito pana ārammaṇato vā nānājātikattaṃ nāma natthi .
Tasmā kāmāvacarakusalakiriyāmahaggatakusalakiriyānampi , saṅkhārārammaṇañca anulomakusalaṃ nibbānārammaṇassa gotrabhukusalassa āsevanapaccayo hotiyevāti ayaṃ tāvettha pāḷivaṇṇanā .
Ayaṃ pana āsevanapaccayo jātito tāva kusalo akusalo kiriyābyākatoti tidhā ṭhito .
Tattha kusalo bhūmito kāmāvacaro rūpāvacaro arūpāvacaroti tividho hoti , akusalo kāmāvacarova kiriyābyākato kāmāvacaro rūpāvacaro arūpāvacaroti tividhova , lokuttaro āsevanapaccayo nāma natthīti evamettha nānappakārabhedato viññātabbo vinicchayo .
Evaṃ bhinne panettha kāmāvacarakusalaṃ attano anantarassa kāmāvacarakusalasseva .
Yaṃ panettha ñāṇasampayuttaṃ , taṃ attanā sadisavedanassa rūpāvacarakusalassa arūpāvacarakusalassa lokuttarakusalassāti imesaṃ
M0.374 rāsīnaṃ āsevanapaccayo hoti .Rūpāvacarakusalaṃ pana rūpāvacarakusalasseva .
Arūpāvacarakusalaṃ arūpāvacarakusalasseva .
Akusalaṃ pana akusalasseva āsevanapaccayo hoti .
Kiriyato pana kāmāvacarakiriyasaṅkhāto tāva kāmāvacarakiriyasseva .
Yo panettha ñāṇasampayutto , so attanā sadisavedanassa rūpāvacarakiriyassa arūpāvacarakiriyassāti imesaṃ rāsīnaṃ āsevanapaccayo hoti .
Rūpāvacarakiriyasaṅkhāto pana rūpāvacarakiriyasseva , arūpāvacarakiriyasaṅkhāto arūpāvacarakiriyasseva āsevanapaccayo hoti .
Vipāko pana ekadhammassāpi ekadhammopi vā koci
V0.372 vipākassa āsevanapaccayo natthīti evamettha paccayuppannatopi viññātabbo vinicchayoti .Āsevanapaccayaniddesavaṇṇanā .