9. Vikappanasikkhāpadaṃ
372. Tena
T2.406 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena āyasmā upanando
M0.160 sakyaputto bhātuno saddhivihārikassa bhikkhuno sāmaṃ cīvaraṃ vikappetvā appaccuddhāraṇaṃ [ apaccuddhārakaṃ ( sī . syā .)] paribhuñjati .Atha kho so bhikkhu bhikkhūnaṃ etamatthaṃ ārocesi –
‘‘ ayaṃ , āvuso , āyasmā upanando sakyaputto mayhaṃ cīvaraṃ sāmaṃ vikappetvā appaccuddhāraṇaṃ paribhuñjatī ’’ ti .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma āyasmā upanando sakyaputto bhikkhussa sāmaṃ cīvaraṃ vikappetvā appaccuddhāraṇaṃ paribhuñjissatī ’’ ti … pe … saccaṃ kira tvaṃ , upananda , bhikkhussa sāmaṃ cīvaraṃ vikappetvā appaccuddhāraṇaṃ paribhuñjasīti ?
‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma tvaṃ , moghapurisa , bhikkhussa sāmaṃ cīvaraṃ
V0.164 vikappetvā appaccuddhāraṇaṃ paribhuñjissasi !Netaṃ , moghapurisa , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
373.‘‘ Yo pana bhikkhu bhikkhussa vā bhikkhuniyā vā sikkhamānāya vā sāmaṇerassa vā sāmaṇeriyā vā sāmaṃ cīvaraṃ vikappetvā appaccuddhāraṇaṃ [ apaccuddhārakaṃ ( sī . syā .)] paribhuñjeyya , pācittiyan ’’ ti .
374. Yo panāti
T2.407 yo yādiso … pe … bhikkhūti … pe … ayaṃ imasmiṃ atthe adhippeto bhikkhūti .Bhikkhussāti
P4.122 aññassa bhikkhussa .Bhikkhunī nāma ubhatosaṅghe upasampannā .
Sikkhamānā nāma dve vassāni chasu dhammesu sikkhitasikkhā .
Sāmaṇero nāma dasasikkhāpadiko .
Sāmaṇerī nāma dasasikkhāpadikā .
Sāman ti sayaṃ vikappetvā .
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ .
Vikappanā nāma dve vikappanā – sammukhāvikappanā ca parammukhāvikappanā ca .
Sammukhāvikappanā nāma ‘‘ imaṃ cīvaraṃ tuyhaṃ vikappemi itthannāmassa vā ’’ ti .
Parammukhāvikappanā
M0.161 nāma ‘‘ imaṃ cīvaraṃ vikappanatthāya tuyhaṃ dammī ’’ ti .Tena vattabbo –
‘‘ ko te mitto vā sandiṭṭho vā ’’ ti ?
‘‘ Itthannāmo ca itthannāmo cā ’’ ti .
Tena vattabbo –
‘‘ ahaṃ tesaṃ dammi , tesaṃ santakaṃ paribhuñja vā vissajjehi vā yathāpaccayaṃ vā karohī ’’ ti .
Appaccuddhāraṇaṃ
V0.165 nāma tassa vā adinnaṃ , tassa vā avissasanto paribhuñjati , āpatti pācittiyassa . 375. Appaccuddhāraṇe appaccuddhāraṇasaññī paribhuñjati , āpatti pācittiyassa .
Appaccuddhāraṇe vematiko paribhuñjati , āpatti pācittiyassa .
Appaccuddhāraṇe appaccuddhāraṇasaññī paribhuñjati , āpatti pācittiyassa .
Adhiṭṭheti vā vissajjeti vā , āpatti dukkaṭassa .
Paccuddhāraṇe appaccuddhāraṇasaññī , āpatti dukkaṭassa
T2.408 .Paccuddhāraṇe vematiko , āpatti dukkaṭassa .
Paccuddhāraṇe paccuddhāraṇasaññī , anāpatti .
376. Anāpatti so vā deti , tassa vā vissasanto paribhuñjati , ummattakassa , ādikammikassāti .
Vikappanasikkhāpadaṃ niṭṭhitaṃ navamaṃ .