1. Ovādasikkhāpadaṃ

144. TenaT2.265 samayena buddho bhagavā sāvatthiyaṃ viharati jetavane anāthapiṇḍikassa ārāme .

Tena kho pana samayena therā bhikkhū bhikkhuniyo ovadantā lābhino honti cīvarapiṇḍapātasenāsanagilānappaccayabhesajjaparikkhārānaṃ .

Atha kho chabbaggiyānaṃ bhikkhūnaṃ etadahosi –

‘‘ etarahi kho , āvuso , therā bhikkhū bhikkhuniyo ovadantā lābhino honti cīvarapiṇḍapātasenāsanagilānappaccayabhesajjaparikkhārānaṃ .

Handāvuso , mayampi bhikkhuniyo ovadāmā ’’ ti .

Atha kho chabbaggiyā bhikkhū bhikkhuniyo upasaṅkamitvā etadavocuṃ –

‘‘ amhepi ,P4.50 bhaginiyo , upasaṅkamatha ;

mayampi ovadissāmā ’’ ti .

Atha kho tā bhikkhuniyo yena chabbaggiyā bhikkhū tenupasaṅkamiṃsu ;

upasaṅkamitvā chabbaggiye bhikkhū abhivādetvā ekamantaṃ nisīdiṃsu .

Atha kho chabbaggiyā bhikkhū bhikkhunīnaṃV0.73 parittaññeva dhammiṃ kathaṃ katvā divasaṃ tiracchānakathāya vītināmetvā uyyojesuṃ –

‘‘ gacchatha , bhaginiyo ’’ ti .

Atha kho tā bhikkhuniyo yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ aṭṭhaṃsu .

Ekamantaṃ ṭhitā kho tā bhikkhuniyo bhagavā etadavoca –

‘‘ kacci , bhikkhuniyo , ovādo iddho ahosī ’’ ti ?

‘‘ Kuto , bhante , ovādo iddho bhavissati !

Ayyā chabbaggiyā parittaññeva dhammiṃ kathaṃ katvā divasaṃ tiracchānakathāya vītināmetvā uyyojesun ’’ ti .

Atha kho bhagavā tā bhikkhuniyo dhammiyā kathāya sandassesi samādapesi samuttejesi sampahaṃsesiT2.266 .

Atha kho tā bhikkhuniyo bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkamiṃsu .

Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi –

‘‘ saccaṃ kira tumhe , bhikkhave , bhikkhunīnaṃM0.72 parittaññeva dhammiṃ kathaṃ katvā divasaṃ tiracchānakathāya vītināmetvā uyyojethā ’’ ti ?

‘‘ Saccaṃ , bhagavā ’’ ti .

Vigarahi buddho bhagavā … pe … kathañhi nāma tumhe , moghapurisā , bhikkhunīnaṃ parittaññeva dhammiṃ kathaṃ katvā divasaṃ tiracchānakathāya vītināmetvā uyyojessatha !

Netaṃ , moghapurisā , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –

‘‘ anujānāmi , bhikkhave , bhikkhunovādakaṃ sammannituṃ .

Evañca pana , bhikkhave , sammannitabbo .

Paṭhamaṃ bhikkhu yācitabbo .

Yācitvā byattena bhikkhunā paṭibalena saṅgho ñāpetabbo –

145.‘‘ Suṇātu me , bhante , saṅgho .

Yadi saṅghassa pattakallaṃ , saṅgho itthannāmaṃ bhikkhuṃ bhikkhunovādakaṃ sammanneyya .

Esā ñatti .

‘‘ Suṇātu me , bhante , saṅgho .

Saṅgho itthannāmaṃ bhikkhuṃ bhikkhunovādakaṃ sammannati .

Yassāyasmato khamati itthannāmassa bhikkhuno bhikkhunovādakassa sammuti , so tuṇhassa ;

yassa nakkhamati , so bhāseyya .

‘‘ Dutiyampi etamatthaṃ vadāmi … pe … tatiyampi etamatthaṃ vadāmi – suṇātu me , bhante , saṅgho .

Saṅgho itthannāmaṃ bhikkhuṃT2.267 bhikkhunovādakaṃ sammannati .

Yassāyasmato khamati itthannāmassa bhikkhuno bhikkhunovādakassa sammuti , so tuṇhassa ;

yassa nakkhamati , so bhāseyya .

‘‘ SammatoV0.74 saṅghena itthannāmo bhikkhu bhikkhunovādako .

Khamati saṅghassa , tasmā tuṇhī , evametaṃ dhārayāmī ’’ ti .

Atha kho bhagavā chabbaggiye bhikkhū anekapariyāyena vigarahitvāP4.51 dubbharatāya … pe … evañca pana , bhikkhave , imaṃ sikkhāpadaṃ uddiseyyātha –

146.‘‘ Yo pana bhikkhu asammato bhikkhuniyo ovadeyya pācittiyan ’’ ti .

Evañcidaṃ bhagavatā bhikkhūnaṃ sikkhāpadaṃ paññattaṃ hoti .

147. Tena kho pana samayena therā bhikkhū sammatā bhikkhuniyo ovadantā tatheva lābhino honti cīvarapiṇḍapātasenāsanagilānappaccayabhesajjaparikkhārānaṃ .

Atha kho chabbaggiyānaṃ bhikkhūnaṃ etadahosi –

‘‘ etarahi kho , āvuso , therā bhikkhū sammatā bhikkhuniyo ovadantā tathevaM0.73 lābhino honti cīvarapiṇḍapātasenāsanagilānappaccayabhesajjaparikkhārānaṃ .

Handāvuso , mayampi nissīmaṃ gantvā aññamaññaṃ bhikkhunovādakaṃ sammannitvā bhikkhuniyo ovadāmā ’’ ti .

Atha kho chabbaggiyā bhikkhū nissīmaṃ gantvā aññamaññaṃ bhikkhunovādakaṃ sammannitvā bhikkhuniyo upasaṅkamitvā etadavocuṃ –

‘‘ mayampi , bhaginiyo , sammatā .

Amhepi upasaṅkamatha .

Mayampi ovadissāmā ’’ ti .

Atha kho tā bhikkhuniyo yena chabbaggiyā bhikkhū tenupasaṅkamiṃsu ;

upasaṅkamitvā chabbaggiye bhikkhū abhivādetvā ekamantaṃ nisīdiṃsu .

Atha kho chabbaggiyā bhikkhūT2.268 bhikkhunīnaṃ parittaññeva dhammiṃ kathaṃ katvā divasaṃ tiracchānakathāya vītināmetvā uyyojesuṃ –

‘‘ gacchatha bhaginiyo ’’ ti .

Atha kho tā bhikkhuniyo yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ aṭṭhaṃsu .

Ekamantaṃ ṭhitā kho tā bhikkhuniyo bhagavā etadavoca –

‘‘ kacci , bhikkhuniyo , ovādo iddho ahosī ’’ ti ?

‘‘ Kuto , bhante , ovādo iddho bhavissati !

Ayyā chabbaggiyā parittaññeva dhammiṃ kathaṃ katvā divasaṃ tiracchānakathāya vītināmetvā uyyojesun ’’ ti .

Atha kho bhagavā tā bhikkhuniyo dhammiyā kathāya sandassesi … pe … atha kho tā bhikkhuniyo bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvāV0.75 padakkhiṇaṃ katvā pakkamiṃsu .

Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā chabbaggiye bhikkhū paṭipucchi –

‘‘ saccaṃ kira tumhe , bhikkhave , bhikkhunīnaṃ parittaññeva dhammiṃ kathaṃ katvā divasaṃ tiracchānakathāya vītināmetvā uyyojethā ’’ ti ?

‘‘ Saccaṃ , bhagavā ’’ ti .

Vigarahi buddho bhagavā … pe … kathañhi nāma tumhe , moghapurisā , bhikkhunīnaṃ parittaññeva dhammiṃ kathaṃ katvā divasaṃ tiracchānakathāya vītināmetvā uyyojessatha !

Netaṃ , moghapurisā , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –

‘‘ anujānāmi , bhikkhave , aṭṭhahaṅgehi samannāgataṃ bhikkhuṃ bhikkhunovādakaṃ sammannituṃ .

Sīlavā hotiT2.269 , pātimokkhasaṃvarasaṃvuto viharati ācāragocarasampanno aṇumattesu vajjesu bhayadassāvī , samādāya sikkhati sikkhāpadesu ;

bahussuto hoti sutadharo sutasannicayo , ye te dhammā ādikalyāṇā majjhekalyāṇāM0.74 pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti tathārūpāssa dhammā bahussutā honti dhātā vacasā paricitā manasā anupekkhitā diṭṭhiyā suppaṭividdhā ;

ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso ;

kalyāṇavāco hoti kalyāṇavākkaraṇo ;

yebhuyyena bhikkhunīnaṃ piyo hoti manāpo ;

paṭibalo hoti bhikkhuniyo ovadituṃ ;

na kho panetaṃ [ pana taṃ (?)] bhagavantaṃ uddissa pabbajitāya kāsāyavatthavasanāya garudhammaṃ ajjhāpannapubbo hoti ;

vīsativasso vā hoti atirekavīsativasso vā – anujānāmi , bhikkhave , imehi aṭṭhahaṅgehi samannāgataṃ bhikkhuṃ bhikkhunovādakaṃ sammannitun ’’ ti .

148. YoP4.52 panāti yo yādiso … pe … bhikkhūti … pe … ayaṃ imasmiṃ atthe adhippeto bhikkhūti .

Asammato nāma ñatticatutthena kammena asammato .

Bhikkhuniyo nāma ubhatosaṅghe upasampannā .

Ovadeyyāti aṭṭhahi garudhammehi ovadati , āpatti pācittiyassa .

Aññena dhammena ovadati , āpatti dukkaṭassa .

Ekatoupasampannaṃ ovadati , āpatti dukkaṭassa .

149. TenaT2.270V0.76 sammatena bhikkhunā pariveṇaṃ sammajjitvā pānīyaṃ paribhojanīyaṃ upaṭṭhāpetvā āsanaṃ paññapetvā dutiyaṃ gahetvā nisīditabbaṃ .

Bhikkhunīhi tattha gantvā taṃ bhikkhuṃ abhivādetvā ekamantaṃ nisīditabbaṃ .

Tena bhikkhunā pucchitabbā –

‘‘ samaggāttha , bhaginiyo ’’ ti ?

Sace ‘‘ samaggāmhāyyā ’’ ti bhaṇanti ,‘‘ vattanti , bhaginiyo , aṭṭha garudhammā ’’ ti ?

Sace ‘‘ vattantāyyā ’’ ti bhaṇanti ,‘‘ eso , bhaginiyo , ovādo ’’ ti niyyādetabbo [ niyyātetabbo ( itipi )].

Sace ‘‘ na vattantāyyā ’’ ti bhaṇanti , osāretabbā .

‘‘ Vassasatūpasampannāya bhikkhuniyā tadahupasampannassa bhikkhuno abhivādanaṃ paccuṭṭhānaṃ añjalikammaṃ sāmīcikammaṃ kātabbaṃ ;

ayampi dhammo sakkatvā garukatvā mānetvā pūjetvāM0.75 yāvajīvaṃ anatikkamanīyo .

Na bhikkhuniyā abhikkhuke āvāse vassaṃ vasitabbaṃ ;

ayampi dhammo sakkatvā garukatvā mānetvā pūjetvā yāvajīvaṃ anatikkamanīyo .

Anvaddhamāsaṃ bhikkhuniyā bhikkhusaṅghato dve dhammā paccāsīsitabbā [ paccāsiṃsitabbā ( itipi )] uposathapucchakañca ovādupasaṅkamanañca , ayampi dhammo … pe … vassaṃ vuṭṭhāya bhikkhuniyā ubhatosaṅghe tīhi ṭhānehi pavāretabbaṃ diṭṭhena vā sutena vā parisaṅkāya vā ;

ayampi dhammo … pe … garudhammaṃ ajjhāpannāya bhikkhuniyā ubhatosaṅghe pakkhamānattaṃ caritabbaṃ ;

ayampiT2.271 dhammo … pe … dve vassāni chasu dhammesu sikkhitasikkhāya sikkhamānāya ubhatosaṅghe upasampadā pariyesitabbā ;

ayampi dhammo … pe … na bhikkhuniyā kena ci pariyāyena bhikkhu akkositabbo paribhāsitabbo ;

ayampi dhammo … pe … ajjatagge ovaṭo bhikkhunīnaṃ bhikkhūsu vacanapatho , anovaṭo bhikkhūnaṃ bhikkhunīsu vacanapatho ;

ayampi dhammo sakkatvā garukatvā mānetvā pūjetvā yāvajīvaṃ anatikkamanīyo ’’ ti .

Sace ‘‘ samaggāmhāyyā ’’ ti bhaṇantaṃ aññaṃ dhammaṃ bhaṇati , āpatti dukkaṭassa .

Sace ‘‘ vaggāmhāyyā ’’ ti bhaṇantaṃ aṭṭha garudhamme bhaṇati , āpatti dukkaṭassa .

Ovādaṃ aniyyādetvā aññaṃ dhammaṃ bhaṇati , āpatti dukkaṭassa .

150. AdhammakammeP4.53 adhammakammasaññī vaggaṃ bhikkhunisaṅghaṃ vaggasaññī ovadati , āpatti pācittiyassa .

Adhammakamme adhammakammasaññī vaggaṃ bhikkhunīsaṅghaṃ vematiko ovadati , āpatti pācittiyassa .

Adhammakamme adhammakammasaññī vaggaṃ bhikkhunisaṅghaṃ samaggasaññī ovadati , āpatti pācittiyassa .

Adhammakamme vematiko vaggaṃ bhikkhunisaṅghaṃ vaggasaññī ovadati , āpatti pācittiyassa .

Adhammakamme vematiko vaggaṃ bhikkhunisaṅghaṃ vematiko ovadati , āpatti pācittiyassaV0.77 .

Adhammakamme vematiko vaggaṃ bhikkhunisaṅghaṃ samaggasaññī ovadati , āpatti pācittiyassa .

AdhammakammeT2.272 dhammakammasaññī vaggaṃ bhikkhunisaṅghaṃ vaggasaññī ovadati , āpatti pācittiyassa .

Adhammakamme dhammakammasaññī vaggaṃ bhikkhunisaṅghaṃ vematiko ovadati , āpatti pācittiyassa .

Adhammakamme dhammakammasaññī vaggaṃ bhikkhunisaṅghaṃ samaggasaññī ovadati , āpatti pācittiyassa .

AdhammakammeM0.76 adhammakammasaññī samaggaṃ bhikkhunisaṅghaṃ vaggasaññī ovadati , āpatti pācittiyassa .

Adhammakamme adhammakammasaññī samaggaṃ bhikkhunisaṅghaṃ vematiko ovadati , āpatti pācittiyassa .

Adhammakamme adhammakammasaññī samaggaṃ bhikkhunisaṅghaṃ samaggasaññī ovadati , āpatti pācittiyassa .

Adhammakamme vematiko samaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti pācittiyassa .

Adhammakamme dhammakammasaññī samaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti pācittiyassa .

151. Dhammakamme adhammakammasaññī vaggaṃ bhikkhunisaṅghaṃ vaggasaññī ovadati , āpatti dukkaṭassa .

Dhammakamme adhammakammasaññī vaggaṃ bhikkhunisaṅghaṃ vematiko ovadati … pe … samaggasaññī ovadati , āpatti dukkaṭassa .

Dhammakamme vematiko vaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti dukkaṭassa .

DhammakammeT2.273 dhammakammasaññī vaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti dukkaṭassa .

DhammakammeV0.78 adhammakammasaññī samaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti dukkaṭassa .

Dhammakamme vematiko samaggaṃ bhikkhunisaṅghaṃ vaggasaññī ovadati … pe … vematiko ovadati … pe … samaggasaññī ovadati , āpatti dukkaṭassa .

Dhammakamme dhammakammasaññī samaggaṃ bhikkhunisaṅghaṃ vaggasaññī ovadati , āpatti dukkaṭassa .

Dhammakamme dhammakammasaññī samaggaṃ bhikkhunisaṅghaṃ vematiko ovadati , āpatti dukkaṭassa .

Dhammakamme dhammakammasaññī samaggaṃ bhikkhunisaṅghaṃ samaggasaññī ovadati , anāpatti .

152. Anāpatti uddesaṃ dento , paripucchaṃ dento ,‘‘ osārehi ayyā ’’ ti vuccamāno , osāreti , pañhaṃ pucchati , pañhaṃ puṭṭho katheti , aññassatthāya bhaṇantaṃ bhikkhuniyo suṇanti , sikkhamānāya , sāmaṇeriyā , ummattakassa , ādikammikassāti .

Ovādasikkhāpadaṃ niṭṭhitaṃ paṭhamaṃ .

Issues

Select Version

Pācittiyapāḷi

Pācittiyapāḷi