3. Bhikkhunupassayasikkhāpadaṃ
158. Tena
T2.277M0.79 samayena buddho bhagavā sakkesu viharati kapilavatthusmiṃ nigrodhārāme .Tena kho pana samayena chabbaggiyā bhikkhū bhikkhunupassayaṃ upasaṅkamitvā chabbaggiyā bhikkhuniyo ovadanti .
Bhikkhuniyo chabbaggiyā bhikkhuniyo etadavocuṃ –
‘‘ ethāyye , ovādaṃ
P4.56 gamissāmā ’’ ti .‘‘ Yampi [ yaṃ hi ( ka .)] mayaṃ , ayye , gaccheyyāma ovādassa kāraṇā , ayyā chabbaggiyā idheva āgantvā amhe ovadantī ’’ ti .
Bhikkhuniyo ujjhāyanti khiyyanti vipācenti –
‘‘ kathañhi nāma chabbaggiyā bhikkhū bhikkhunupassayaṃ upasaṅkamitvā bhikkhuniyo ovadissantī ’’ ti [ chabbaggiyā bhikkhuniyo ovādaṃ na gacchissantīti ( sī .)]!
Atha kho tā bhikkhuniyo bhikkhūnaṃ etamatthaṃ ārocesuṃ .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū bhikkhunupassayaṃ upasaṅkamitvā bhikkhuniyo ovadissantī ’’ ti … pe …‘‘ saccaṃ kira tumhe , bhikkhave
V0.81 , bhikkhunupassayaṃ upasaṅkamitvā bhikkhuniyo ovadathā ’’ ti ?‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma tumhe , moghapurisā , bhikkhunupassayaṃ upasaṅkamitvā bhikkhuniyo ovadissatha !
Netaṃ , moghapurisā , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
‘‘ Yo pana bhikkhu bhikkhunupassayaṃ upasaṅkamitvā bhikkhuniyo ovadeyya , pācittiyan ’’ ti .
Evañcidaṃ
T2.278 bhagavatā bhikkhūnaṃ sikkhāpadaṃ paññattaṃ hoti . 159. Tena kho pana samayena mahāpajāpati gotamī gilānā hoti .
Therā bhikkhū yena mahāpajāpati gotamī tenupasaṅkamiṃsu ;
upasaṅkamitvā mahāpajāpatiṃ gotamiṃ etadavocuṃ –
‘‘ kacci te , gotami , khamanīyaṃ kacci yāpanīyan ’’ ti ?
‘‘ Na me , ayyā , khamanīyaṃ na yāpanīyaṃ ’’.
‘‘ Iṅghayyā , dhammaṃ desethā ’’ ti .
‘‘ Na , bhagini , kappati bhikkhunupassayaṃ upasaṅkamitvā bhikkhuniyo dhammaṃ desetun ’’ ti kukkuccāyantā na desesuṃ .
Atha kho bhagavā pubbaṇhasamayaṃ nivāsetvā pattacīvaramādāya yena mahāpajāpati gotamī tenupasaṅkami ;
upasaṅkamitvā paññatte āsane nisīdi .
Nisajja kho bhagavā mahāpajāpatiṃ gotamiṃ etadavoca –
‘‘ kacci te , gotami , khamanīyaṃ kacci yāpanīyan ’’ ti
M0.80 ?‘‘ Pubbe me , bhante , therā bhikkhū āgantvā dhammaṃ desenti .
Tena me phāsu hoti .
Idāni pana –
‘‘ bhagavatā paṭikkhittan ’’ ti , kukkuccāyantā na desenti .
Tena me na phāsu hotī ’’ ti .
Atha kho bhagavā mahāpajāpatiṃ gotamiṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi .
Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –
‘‘ anujānāmi , bhikkhave , bhikkhunupassayaṃ upasaṅkamitvā gilānaṃ bhikkhuniṃ ovadituṃ .
Evañca pana , bhikkhave , imaṃ sikkhāpadaṃ uddiseyyātha –
160.‘‘ Yo
P4.57 pana bhikkhu bhikkhunupassayaṃ upasaṅkamitvā bhikkhuniyo ovadeyya , aññatra samayā , pācittiyaṃT2.279 .Tatthāyaṃ samayo .
Gilānā hoti bhikkhunī – ayaṃ tattha samayo ’’ ti .
161. Yo panāti yo yādiso … pe … bhikkhūti … pe … ayaṃ imasmiṃ atthe adhippeto bhikkhūti .
Bhikkhunupassayo
V0.82 nāma yattha bhikkhuniyo ekarattampi vasanti .Upasaṅkamitvāti tattha gantvā .
Bhikkhunī nāma ubhatosaṅghe upasampannā .
Ovadeyyāti aṭṭhahi garudhammehi ovadati , āpatti pācittiyassa .
Aññatra samayāti ṭhapetvā samayaṃ .
Gilānā nāma bhikkhunī na sakkoti ovādāya vā saṃvāsāya vā gantuṃ .
162. Upasampannāya upasampannasaññī bhikkhunupassayaṃ upasaṅkamitvā aññatra samayā ovadati , āpatti pācittiyassa .
Upasampannāya vematiko bhikkhunupassayaṃ upasaṅkamitvā aññatra samayā ovadati , āpatti pācittiyassa .
Upasampannāya anupasampannasaññī bhikkhunupassayaṃ upasaṅkamitvā aññatra samayā ovadati , āpatti pācittiyassa .
Aññena dhammena ovadati , āpatti dukkaṭassa .
Ekatoupasampannāya ovadati , āpatti dukkaṭassa .
Anupasampannāya upasampannasaññī , āpatti dukkaṭassa
M0.81 .Anupasampannāya vematiko , āpatti dukkaṭassa .
Anupasampannāya anupasampannasaññī , anāpatti .
163. Anāpatti samaye , uddesaṃ dento , paripucchaṃ dento ,‘‘ osārehi
T2.280 ayyā ’’ ti vuccamāno osāreti , pañhaṃ pucchati , pañhaṃ puṭṭho katheti , aññassatthāya bhaṇantaṃ bhikkhuniyo suṇanti , sikkhamānāya sāmaṇeriyā , ummattakassa , ādikammikassāti .Bhikkhunupassayasikkhāpadaṃ niṭṭhitaṃ tatiyaṃ .