3. Ukkoṭanasikkhāpadaṃ
392. Tena
T2.416P4.126 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū jānaṃ yathādhammaṃ nihatādhikaraṇaṃ punakammāya ukkoṭenti –
‘‘ akataṃ kammaṃ dukkaṭaṃ kammaṃ puna kātabbaṃ kammaṃ anihataṃ dunnihataṃ
V0.170 puna nihanitabban ’’ ti .Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū jānaṃ yathādhammaṃ nihatādhikaraṇaṃ punakammāya ukkoṭessantī ’’ ti
M0.166 … pe … saccaṃ kira tumhe , bhikkhave , jānaṃ yathādhammaṃ nihatādhikaraṇaṃ punakammāya ukkoṭethā ’’ ti ?‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma tumhe , moghapurisā , jānaṃ yathādhammaṃ nihatādhikaraṇaṃ punakammāya ukkoṭessatha !
Netaṃ , moghapurisā , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
393.‘‘ Yo pana bhikkhu jānaṃ yathādhammaṃ nihatādhikaraṇaṃ punakammāya ukkoṭeyya , pācittiyan ’’ ti .
394. Yo panāti yo yādiso … pe … bhikkhūti … pe … ayaṃ imasmiṃ atthe adhippeto bhikkhūti .
Jānāti nāma sāmaṃ vā jānāti , aññe vā tassa ārocenti , so vā āroceti .
Yathādhammaṃ nāma dhammena vinayena satthusāsanena kataṃ , etaṃ yathādhammaṃ nāma .
Adhikaraṇaṃ
T2.417 nāma cattāri adhikaraṇāni – vivādādhikaraṇaṃ , anuvādādhikaraṇaṃ , āpattādhikaraṇaṃ , kiccādhikaraṇaṃ .Punakammāya ukkoṭeyyāti ‘‘ akataṃ kammaṃ dukkaṭaṃ kammaṃ punakātabbaṃ kammaṃ anihataṃ dunnihataṃ puna nihanitabbaṃ ’’ ti ukkoṭeti , āpatti pācittiyassa .
395. Dhammakamme dhammakammasaññī ukkoṭeti , āpatti pācittiyassa .
Dhammakamme vematiko ukkoṭeti , āpatti dukkaṭassa .
Dhammakamme adhammakammasaññī ukkoṭeti , anāpatti .
Adhammakamme dhammakammasaññī , āpatti dukkaṭassa .
Adhammakamme vematiko , āpatti dukkaṭassa .
Adhammakamme adhammakammasaññī , anāpatti .
396. Anāpatti
V0.171 ‘‘ adhammena vā vaggena vā na kammārahassa vā kammaṃ katan ’’ ti jānanto ukkoṭeti , ummattakassa , ādikammikassāti .Ukkoṭanasikkhāpadaṃ niṭṭhitaṃ tatiyaṃ .