3. Pesuññasikkhāpadaṃ
36. Tena
T2.183P4.12V0.20 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū bhikkhūnaṃ
M0.20 bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharanti ;imassa sutvā amussa akkhāyanti , imassa bhedāya ;
amussa sutvā imassa akkhāyanti , amussa bhedāya .
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharissanti , imassa sutvā amussa akkhāyissanti , imassa bhedāya ;
amussa sutvā imassa akkhāyissanti , amussa bhedāya !
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattantī ’’ ti .
Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ … pe …‘‘ saccaṃ kira tumhe , bhikkhave , bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharatha , imassa sutvā amussa akkhāyatha , imassa bhedāya , amussa sutvā imassa akkhāyatha , amussa bhedāya ?
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattantī ’’ ti ?
‘‘ Saccaṃ
T2.184 , bhagavā ’’ ti .Vigarahi buddho bhagavā … pe … kathañhi nāma tumhe , moghapurisā , bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharissatha !
Imassa sutvā amussa akkhāyissatha , imassa bhedāya !
Amussa sutvā imassa akkhāyissatha , amussa bhedāya !
Tena anuppannāni ceva bhaṇḍanāni uppajjanti , uppannāni ca bhaṇḍanāni bhiyyobhāvāya vepullāya saṃvattanti .
Netaṃ , moghapurisā , appasannānaṃ vā pasādāya .
Pasannānaṃ vā bhiyyobhāvāya … pe … evañca pana , bhikkhave , imaṃ sikkhāpadaṃ uddiseyyātha –
37.‘‘ Bhikkhupesuññe pācittiyan ’’ ti .
38. Pesuññaṃ nāma dvīhākārehi pesuññaṃ hoti – piyakamyassa vā bhedādhippāyassa vā .
Dasahākārehi pesuññaṃ upasaṃharati – jātitopi , nāmatopi , gottatopi , kammatopi , sippatopi , ābādhatopi , liṅgatopi , kilesatopi , āpattitopi , akkosatopi .
Jāti
V0.21 nāma dve jātiyo – hīnā ca jāti ukkaṭṭhā ca jāti .Hīnā nāma jāti – caṇḍālajāti venajāti nesādajāti rathakārajāti pukkusajāti
M0.21 .Esā hīnā nāma jāti .
Ukkaṭṭhā nāma jāti – khattiyajāti brāhmaṇajāti .
Esā ukkaṭṭhā nāma jāti … pe ….
Akkoso nāma dve akkosā – hīno ca akkoso ukkaṭṭho ca akkoso .
Hīno nāma akkoso – oṭṭhosi , meṇḍosi , goṇosi , gadrabhosi , tiracchānagatosi , nerayikosi ;
natthi tuyhaṃ sugati ;
duggati yeva tuyhaṃ pāṭikaṅkhāti , yakārena vā bhakārena vā kāṭakoṭacikāya vā .
Eso
T2.185 hīno nāmaP4.13 akkoso .Ukkaṭṭho nāma akkoso – paṇḍitosi , byattosi , medhāvīsi , bahussutosi , dhammakathikosi ;
natthi tuyhaṃ duggati ;
sugati yeva tuyhaṃ pāṭikaṅkhāti .
Eso ukkaṭṭho nāma akkoso .
39. Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ caṇḍālo veno nesādo rathakāro pukkuso ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ khattiyo brāhmaṇo ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ avakaṇṇako javakaṇṇako dhaniṭṭhako saviṭṭhako kulavaḍḍhako ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ buddharakkhito dhammarakkhito saṅgharakkhito ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ kosiyo bhāradvājo ’ ti bhaṇatī ’’ ti .
Āpatti vācāya , vācāya pācittiyassa .
Upasampanno
T2.186V0.22 upasampannassa sutvā upasampannassa pesuññaṃ upasaṃharati –‘‘ itthannāmo taṃ ‘ gotamo moggallāno kaccāno vāsiṭṭho ’ ti bhaṇatī ’’ ti .
Āpatti vācāya , vācāya pācittiyassa .
Upasampanno
M0.22 upasampannassa sutvā upasampannassa pesuññaṃ upasaṃharati –‘‘ itthannāmo taṃ ‘ koṭṭhako pupphachaḍḍako ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ kassako vāṇijo gorakkho ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ naḷakāro kumbhakāro pesakāro cammakāro nahāpito ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ muddiko gaṇako lekhako ’ ti bhaṇatī ’’ ti .
Āpatti vācāya , vācāya pācittiyassa .
40. Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ kuṭṭhiko gaṇḍiko kilāsiko sosiko apamāriko ’ ti bhaṇatī ’’ ti .
Āpatti vācāya , vācāya pācittiyassa .
Upasampanno
T2.187 upasampannassa sutvā upasampannassa pesuññaṃ upasaṃharati –‘‘ itthannāmo taṃ ‘ madhumehiko ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ atidīgho atirasso atikaṇho accodāto ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ nātidīgho
V0.23 nātirasso nātikaṇho nāccodāto ’ ti bhaṇatī ’’ ti .Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ rāgapariyuṭṭhito dosapariyuṭṭhito mohapariyuṭṭhito ’ ti bhaṇatī ’’ ti .
Āpatti vācāya , vācāya pācittiyassa .
Upasampanno
M0.23 upasampannassa sutvā upasampannassa pesuññaṃ upasaṃharati –‘‘ itthannāmo taṃ ‘ vītarāgo vītadoso vītamoho ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ pārājikaṃ ajjhāpanno , saṅghādisesaṃ ajjhāpanno , thullaccayaṃ ajjhāpanno , pācittiyaṃ ajjhāpanno
T2.188 , pāṭidesanīyaṃ ajjhāpanno , dukkaṭaṃ ajjhāpanno , dubbhāsitaṃ ajjhāpanno ’ ti bhaṇatī ’’ ti .Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ sotāpanno ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ oṭṭho meṇḍo goṇo gadrabho tiracchānagato nerayiko , natthi tassa sugati , duggatiyeva tassa pāṭikaṅkhā ’ ti bhaṇatī ’’ ti .
Āpatti vācāya , vācāya pācittiyassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo taṃ ‘ paṇḍito byatto medhāvī bahussuto dhammakathiko , natthi tassa duggati , sugati yeva tassa pāṭikaṅkhā ’ ti bhaṇatī ’’ ti .
Āpatti vācāya , vācāya pācittiyassa .
41. Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo ‘ santi idhekacce caṇḍālā venā nesādā rathakārā , pukkusā ’ ti bhaṇati , na so aññaṃ bhaṇati , taññeva bhaṇatī ’’ ti .
Āpatti vācāya , vācāya dukkaṭassa .
Upasampanno
V0.24 upasampannassa sutvā upasampannassa pesuññaṃ upasaṃharati –‘‘ itthannāmo ‘ santi idhekacce khattiyā brāhmaṇā ’ ti bhaṇati , na so aññaṃ bhaṇati , taññeva bhaṇatī ’ ti .
Āpatti
T2.189 vācāya , vācāya dukkaṭassa … pe ….Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo ‘ santi idhekacce paṇḍitā byattā medhāvī bahussutā dhammakathikā , natthi tesaṃ duggati , sugati yeva tesaṃ pāṭikaṅkhā ’ ti bhaṇati , na
M0.24 so aññaṃ bhaṇati , taññeva bhaṇatī ’’ ti .Āpatti vācāya , vācāya dukkaṭassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo ‘ ye nūna caṇḍālā venā nesādā rathakārā pukkusā ’ ti bhaṇati , na so aññaṃ bhaṇati , taññeva bhaṇatī ’’ ti .
Āpatti vācāya , vācāya dukkaṭassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo ‘ ye nūna paṇḍitā byattā medhāvī bahussutā dhammakathikā ’ ti bhaṇati , na so aññaṃ bhaṇati , taññeva bhaṇatī ’’ ti .
Āpatti vācāya , vācāya dukkaṭassa .
Upasampanno upasampannassa sutvā upasampannassa pesuññaṃ upasaṃharati –
‘‘ itthannāmo ‘ na mayaṃ caṇḍālā venā nesādā rathakārā pukkusā ’ ti bhaṇati , na so aññaṃ bhaṇati , taññeva bhaṇatī ’’ ti .
Āpatti vācāya , vācāya dukkaṭassa .
Upasampanno upasampannassa sutvā upasampannassa pesuññaṃ upasaṃharati
T2.190 –‘‘ itthannāmo ‘ na mayaṃ paṇḍitā byattā medhāvī bahussutā dhammakathikā , natthamhākaṃ duggati , sugati yeva amhākaṃ pāṭikaṅkhā ’ ti bhaṇati , na so aññaṃ
P4.14 bhaṇati , taññeva bhaṇatī ’’ ti .Āpatti vācāya , vācāya dukkaṭassa .
42. Upasampanno upasampannassa sutvā upasampannassa pesuññaṃ upasaṃharati ;
āpatti vācāya , vācāya pācittiyassa .
Upasampanno
V0.25 upasampannassa sutvā anupasampannassa pesuññaṃ upasaṃharati , āpatti dukkaṭassa .Upasampanno anupasampannassa sutvā upasampannassa pesuññaṃ upasaṃharati , āpatti dukkaṭassa .
Upasampanno anupasampannassa sutvā anupasampannassa pesuññaṃ upasaṃharati , āpatti dukkaṭassa .
43. Anāpatti napiyakamyassa , nabhedādhippāyassa , ummattakassa , ādikammikassāti .
Pesuññasikkhāpadaṃ niṭṭhitaṃ tatiyaṃ .