9. Duṭṭhullārocanasikkhāpadaṃ
78. Tena
T2.225 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena āyasmā upanando sakyaputto chabbaggiyehi bhikkhūhi saddhiṃ bhaṇḍanakato hoti .
So sañcetanikaṃ sukkavissaṭṭhiṃ āpattiṃ āpajjitvā saṅghaṃ tassā āpattiyā parivāsaṃ yāci .
Tassa saṅgho tassā āpattiyā parivāsaṃ adāsi .
Tena kho pana samayena sāvatthiyaṃ aññatarassa pūgassa saṅghabhattaṃ hoti .
So parivasanto bhattagge āsanapariyante nisīdi .
Chabbaggiyā bhikkhū te upāsake etadavocuṃ –
‘‘ eso , āvuso , āyasmā upanando sakyaputto tumhākaṃ sambhāvito kulūpako ;
yeneva hatthena saddhādeyyaṃ bhuñjati teneva hatthena upakkamitvā asuciṃ mocesi .
So sañcetanikaṃ sukkavissaṭṭhiṃ āpattiṃ
P4.31 āpajjitvā saṅghaṃ tassā āpattiyā parivāsaṃ yāci .Tassa saṅgho tassā āpattiyā parivāsaṃ adāsi
M0.47 .So parivasanto āsanapariyante nisinno ’’ ti .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū bhikkhussa duṭṭhullaṃ āpattiṃ anupasampannassa ārocessantī ’’ ti … pe …‘‘ saccaṃ kira tumhe , bhikkhave , bhikkhussa duṭṭhullaṃ āpattiṃ anupasampannassa ārocethā ’’ ti ?
‘‘ Saccaṃ
T2.226 , bhagavā ’’ ti .Vigarahi buddho bhagavā … pe … kathañhi nāma tumhe , moghapurisā , bhikkhussa duṭṭhullaṃ āpattiṃ anupasampannassa ārocessatha !
Netaṃ , moghapurisā , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
79.‘‘ Yo pana bhikkhu bhikkhussa duṭṭhullaṃ āpattiṃ anupasampannassa āroceyya , aññatra bhikkhusammutiyā [ bhikkhusammatiyā ( syā .)], pācittiyan ’’ ti .
80. Yo panāti yo yādiso … pe … bhikkhūti … pe … ayaṃ imasmiṃ atthe adhippeto bhikkhūti .
Bhikkhussāti aññassa bhikkhussa .
Duṭṭhullā
V0.48 nāma āpatti – cattāri ca pārājikāni , terasa ca saṅghādisesā .Anupasampanno nāma bhikkhuñca bhikkhuniñca ṭhapetvā avaseso anupasampanno nāma .
Āroceyyāti āroceyya itthiyā vā purisassa vā gahaṭṭhassa vā pabbajitassa vā .
Aññatra bhikkhusammutiyāti ṭhapetvā bhikkhusammutiṃ .
Atthi bhikkhusammuti āpattipariyantā , na kulapariyantā .
Atthi bhikkhusammuti kulapariyantā , na āpattipariyantā , atthi bhikkhusammuti āpattipariyantā ca kulapariyantā ca , atthi bhikkhusammuti neva āpattipariyantā na kulapariyantā .
Āpattipariyantā nāma āpattiyo pariggahitāyo honti –
‘‘ ettakāhi āpattīhi ārocetabbo ’’ ti .
Kulapariyantā
M0.48 nāma kulāni pariggahitāni honti –‘‘ ettakesu kulesu ārocetabbo ’’ ti .
Āpattipariyantā ca kulapariyantā ca nāma āpattiyo
T2.227 ca pariggahitāyo honti , kulāni ca pariggahitāni honti –‘‘ ettakāhi āpattīhi ettakesu kulesu ārocetabbo ’’ ti .
Neva āpattipariyantā na kulapariyantā nāma āpattiyo ca apariggahitāyo honti , kulāni ca apariggahitāni honti –
‘‘ ettakāhi āpattīhi ettakesu kulesu ārocetabbo ’’ ti .
81. Āpattipariyante yā āpattiyo pariggahitāyo honti , tā āpattiyo ṭhapetvā aññāhi āpattīhi āroceti , āpatti pācittiyassa .
Kulapariyante yāni kulāni pariggahitāni honti ,
P4.32 tāni kulāni ṭhapetvā aññesu kulesu āroceti , āpatti pācittiyassa .Āpattipariyante ca kulapariyante ca yā āpattiyo pariggahitāyo honti , tā āpattiyo
V0.49 ṭhapetvā yāni kulāni pariggahitāni honti , tāni kulāni ṭhapetvā aññāhi āpattīhi aññesu kulesu āroceti , āpatti pācittiyassa .Neva āpattipariyante na kulapariyante , anāpatti .
82. Duṭṭhullāya āpattiyā duṭṭhullāpattisaññī anupasampannassa āroceti , aññatra bhikkhusammutiyā , āpatti pācittiyassa .
Duṭṭhullāya āpattiyā vematiko anupasampannassa āroceti , aññatra bhikkhusammutiyā , āpatti pācittiyassa .
Duṭṭhullāya āpattiyā aduṭṭhullāpattisaññī anupasampannassa āroceti , aññatra bhikkhusammutiyā , āpatti pācittiyassa .
Aduṭṭhullaṃ
T2.228 āpattiṃ āroceti , āpatti dukkaṭassa .Anupasampannassa duṭṭhullaṃ vā aduṭṭhullaṃ vā ajjhācāraṃ āroceti , āpatti dukkaṭassa .
Aduṭṭhullāya
M0.49 āpattiyā duṭṭhullāpattisaññī , āpatti dukkaṭassa .Aduṭṭhullāya āpattiyā vematiko , āpatti dukkaṭassa .
Aduṭṭhullāya āpattiyā aduṭṭhullāpattisaññī , āpatti dukkaṭassa .
83. Anāpatti vatthuṃ āroceti no āpattiṃ , āpattiṃ āroceti no vatthuṃ , bhikkhusammutiyā , ummattakassa , ādikammikassāti .
Duṭṭhullārocanasikkhāpadaṃ niṭṭhitaṃ navamaṃ .