7. Pādukavaggo
638. Tena
T2.561 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū pādukāruḷhassa dhammaṃ desenti … pe ….
‘‘ Na
V0.274 pādukāruḷhassa agilānassa dhammaṃ desessāmīti sikkhā karaṇīyā ’’ ti .Na pādukāruḷhassa agilānassa dhammo desetabbo .
Yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Paṭhamasikkhāpadaṃ niṭṭhitaṃ .
639. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū upāhanāruḷhassa dhammaṃ desenti … pe ….
‘‘ Na upāhanāruḷhassa agilānassa dhammaṃ desessāmīti sikkhākaraṇīyā ’’ ti .
Na upāhanāruḷhassa agilānassa dhammo desetabbo .
Yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Dutiyasikkhāpadaṃ niṭṭhitaṃ .
640. Tena
M0.265 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū yānagatassa dhammaṃ desenti … pe ….
‘‘ Na yānagatassa agilānassa dhammaṃ desessāmīti sikkhā karaṇīyā ’’ ti .
Yānaṃ
T2.562 nāma vayhaṃ ratho sakaṭaṃ sandamānikā sivikā pāṭaṅkī .Na yānagatassa agilānassa dhammo desetabbo .
Yo anādariyaṃ paṭicca yānagatassa agilānassa dhammaṃ deseti , āpatti dukkaṭassa .
Anāpatti
V0.275 asañcicca … pe … ādikammikassāti .Tatiyasikkhāpadaṃ niṭṭhitaṃ .
641. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho
P4.202 pana samayena chabbaggiyā bhikkhū sayanagatassa dhammaṃ desenti … pe ….‘‘ Na sayanagatassa agilānassa dhammaṃ desessāmīti sikkhā karaṇīyā ’’ ti .
Na sayanagatassa agilānassa dhammo desetabbo .
Yo anādariyaṃ paṭicca antamaso chamāyampi nipannassa sayanagatassa agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Catutthasikkhāpadaṃ niṭṭhitaṃ .
642. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū pallatthikāya nisinnassa dhammaṃ desenti … pe ….
‘‘ Na pallatthikāya nisinnassa agilānassa dhammaṃ desessāmīti sikkhā karaṇīyā ’’ ti .
Na
M0.266 pallatthikāya nisinnassa agilānassa dhammo desetabbo .Yo anādariyaṃ paṭicca hatthapallatthikāya vā dussapallatthikāya vā nisinnassa agilānassa dhammaṃ deseti , āpatti dukkaṭassa .
Anāpatti
T2.563 asañcicca … pe … ādikammikassāti .Pañcamasikkhāpadaṃ niṭṭhitaṃ .
643. Tena
V0.276 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū veṭhitasīsassa dhammaṃ desenti … pe ….
‘‘ Na veṭhitasīsassa agilānassa dhammaṃ desessāmīti sikkhā karaṇīyā ’’ ti .
Veṭhitasīso nāma kesantaṃ na dassāpetvā veṭhito hoti .
Na veṭhitasīsassa agilānassa dhammo desetabbo .
Yo anādariyaṃ paṭicca veṭhitasīsassa agilānassa dhammaṃ deseti , āpatti dukkaṭassa .
Anāpatti asañcicca , assatiyā , ajānantassa , gilānassa , kesantaṃ vivarāpetvā deseti , āpadāsu , ummattakassa , ādikammikassāti .
Chaṭṭhasikkhāpadaṃ niṭṭhitaṃ .
644. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū oguṇṭhitasīsassa dhammaṃ desenti … pe ….
‘‘ Na oguṇṭhitasīsassa agilānassa dhammaṃ desessāmīti sikkhā karaṇīyā ’’ ti .
Oguṇṭhitasīso
P4.203 nāma sasīsaṃ pāruto vuccati .Na oguṇṭhitasīsassa agilānassa dhammo desetabbo .
Yo anādariyaṃ paṭicca oguṇṭhitasīsassa agilānassa dhammaṃ deseti , āpatti dukkaṭassa .
Anāpatti asañcicca , assatiyā , ajānantassa , gilānassa , sīsaṃ vivarāpetvā deseti , āpadāsu , ummattakassa , ādikammikassāti .
Sattamasikkhāpadaṃ niṭṭhitaṃ .
645. Tena
M0.267V0.277 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū
T2.564 chamāya nisīditvā āsane nisinnassa dhammaṃ desenti … pe ….‘‘ Na chamāyaṃ nisīditvā āsane nisinnassa agilānassa dhammaṃ desessāmīti sikkhā karaṇīyā ’’ ti .
Na chamāyaṃ nisīditvā [ nisinnena ( aṭṭhakathā )] āsane nisinnassa agilānassa dhammo desetabbo .
Yo anādariyaṃ paṭicca chamāyaṃ nisīditvā āsane nisinnassa agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Aṭṭhamasikkhāpadaṃ niṭṭhitaṃ .
646. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū nīce āsane nisīditvā ucce āsane nisinnassa dhammaṃ desenti .
Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū nīce āsane nisīditvā ucce āsane nisinnassa dhammaṃ desessantī ’’ ti … pe … saccaṃ kira tumhe , bhikkhave , nīce āsane nisīditvā ucce āsane nisinnassa dhammaṃ desethāti ?
‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma tumhe , moghapurisā , nīce āsane nisīditvā ucce āsane nisinnassa dhammaṃ desessatha !
Netaṃ , moghapurisā , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –
647.‘‘ Bhūtapubbaṃ
T2.565 , bhikkhave , bārāṇasiyaṃ aññatarassa chapakassa [ chavakassa ( syā .)] pajāpati gabbhinī ahosi .Atha kho , bhikkhave , sā chapakī taṃ chapakaṃ etadavoca –
‘ gabbhinīmhi , ayyaputta !
Icchāmi ambaṃ khāditun ’ ti .
‘ Natthi ambaṃ [ ambo ( syā .)], akālo ambassā ’ ti .
‘ Sace na labhissāmi marissāmī ’ ti .
Tena kho pana samayena , rañño ambo dhuvaphalo hoti .
Atha kho , bhikkhave , so chapako yena so ambo tenupasaṅkami ;
upasaṅkamitvā taṃ ambaṃ abhiruhitvā nilīno acchi
V0.278 .Atha kho , bhikkhave , rājā purohitena brāhmaṇena saddhiṃ yena so ambo tenupasaṅkami ;
upasaṅkamitvā ucce āsane nisīditvā mantaṃ pariyāpuṇāti
P4.204 .Atha kho , bhikkhave
M0.268 , tassa chapakassa etadahosi –‘ yāva adhammiko ayaṃ rājā , yatra hi nāma ucce āsane nisīditvā mantaṃ pariyāpuṇissati .
Ayañca brāhmaṇo adhammiko , yatra hi nāma nīce āsane nisīditvā ucce āsane nisinnassa mantaṃ vācessati .
Ahañcamhi adhammiko , yohaṃ itthiyā kāraṇā rañño ambaṃ avaharāmi .
Sabbamidaṃ carimaṃ katan ’ ti tattheva paripati .
[ imā gāthāyo jā .1.4.33-35 jātake aññathā dissanti ]‘‘ Ubho atthaṃ na jānanti , ubho dhammaṃ na passare ;
Yo cāyaṃ mantaṃ vāceti , yo cādhammenadhīyati .
‘‘ Sālīnaṃ odano bhutto , sucimaṃsūpasecano ;
Tasmā dhamme na vattāmi , dhammo ariyebhi vaṇṇito .
‘‘ Dhiratthu
T2.566 taṃ dhanalābhaṃ , yasalābhañca brāhmaṇa ;Yā vutti vinipātena , adhammacaraṇena vā .
‘‘ Paribbaja mahābrahme , pacantaññepi pāṇino ;
Mā tvaṃ adhammo ācarito , asmā kumbhamivābhidā ’’ ti .
‘‘ Tadāpi me , bhikkhave , amanāpā nīce āsane nisīditvā ucce āsane nisinnassa mantaṃ vācetuṃ , kimaṅga pana etarahi na amanāpā bhavissati nīce āsane nisīditvā ucce āsane nisinnassa dhammaṃ desetuṃ .
Netaṃ , bhikkhave , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
‘‘ Na nīce āsane nisīditvā ucce āsane nisinnassa agilānassa dhammaṃ desessāmīti sikkhā karaṇīyā ’’ ti .
Na nīce āsane nisīditvā ucce āsane nisinnassa agilānassa dhammo desetabbo .
Yo anādariyaṃ paṭicca nīce āsane nisīditvā ucce āsane nisinnassa agilānassa dhammaṃ deseti , āpatti dukkaṭassa .
Anāpatti
V0.279 asañcicca … pe … ādikammikassāti .Navamasikkhāpadaṃ niṭṭhitaṃ .
648. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū ṭhitā nisinnassa dhammaṃ desenti … pe ….
‘‘ Na
M0.269 ṭhito nisinnassa agilānassa dhammaṃ desessāmīti sikkhā karaṇīyā ’’ ti .Na
T2.567 ṭhitena nisinnassa agilānassa dhammo desetabbo .Yo anādariyaṃ paṭicca ṭhito nisinnassa agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Dasamasikkhāpadaṃ niṭṭhitaṃ .
649. Tena
P4.205 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū pacchato gacchantā purato gacchantassa dhammaṃ desenti … pe ….
‘‘ Na pacchato gacchanto purato gacchantassa agilānassa dhammaṃ desessāmīti sikkhā karaṇīyā ’’ ti .
Na pacchato gacchantena purato gacchantassa agilānassa dhammo desetabbo .
Yo anādariyaṃ paṭicca pacchato gacchanto purato gacchantassa agilānassa dhammaṃ deseti , āpatti dukkaṭassa .
Anāpatti asañcicca … pe … ādikammikassāti .
Ekādasamasikkhāpadaṃ niṭṭhitaṃ .
650. Tena
V0.280 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū uppathena gacchantā pathena gacchantassa dhammaṃ desenti … pe ….
‘‘ Na uppathena gacchanto pathena gacchantassa agilānassa dhammaṃ desessāmīti sikkhā karaṇīyā ’’ ti .
Na uppathena gacchantena pathena gacchantassa agilānassa dhammo desetabbo .
Yo anādariyaṃ paṭicca uppathena gacchanto pathena gacchantassa
T2.568 agilānassa dhammaṃ deseti , āpatti dukkaṭassa .Anāpatti asañcicca … pe … ādikammikassāti .
Dvādasamasikkhāpadaṃ niṭṭhitaṃ .
651. Tena
M0.270 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena chabbaggiyā bhikkhū ṭhitā uccārampi passāvampi karonti … pe ….
‘‘ Na ṭhito agilāno uccāraṃ vā passāvaṃ vā karissāmīti sikkhā karaṇīyā ’’ ti .
Na ṭhitena agilānena uccāro vā passāvo vā kātabbo .
Yo anādariyaṃ paṭicca ṭhito agilāno uccāraṃ vā passāvaṃ vā karoti , āpatti dukkaṭassa .
Anāpatti asañcicca … pe … ādikammikassāti .
Terasamasikkhāpadaṃ niṭṭhitaṃ .
652. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū harite uccārampi passāvampi kheḷampi karonti … pe ….
‘‘ Na
V0.281 harite agilāno uccāraṃ vā passāvaṃ vā kheḷaṃ vā karissāmīti sikkhā karaṇīyā ’’ ti .Na harite agilānena uccāro vā passāvo vā kheḷo vā kātabbo .
Yo anādariyaṃ paṭicca harite agilāno uccāraṃ vā passāvaṃ vā kheḷaṃ vā karoti , āpatti dukkaṭassa .
Anāpatti
T2.569 asañcicca , assatiyā , ajānantassa , gilānassa , appaharite kato haritaṃ ottharati , āpadāsu , ummattakassa , ādikammikassāti .Cuddasamasikkhāpadaṃ niṭṭhitaṃ .
653. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena chabbaggiyā bhikkhū udake uccārampi passāvampi kheḷampi karonti .
Manussā ujjhāyanti khiyyanti vipācenti
P4.206 –‘‘ kathañhi nāma samaṇā sakyaputtiyā udake uccārampi passāvampi kheḷampi karissanti , seyyathāpi gihī kāmabhogino ’’ ti !
Assosuṃ
M0.271 kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ .Ye te bhikkhū appicchā … pe … te ujjhāyanti khiyyanti vipācenti –
‘‘ kathañhi nāma chabbaggiyā bhikkhū udake uccārampi passāvampi kheḷampi karissantī ’’ ti … pe … saccaṃ kira tumhe , bhikkhave , udake uccārampi passāvampi kheḷampi karothāti ?
‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma tumhe , moghapurisā , udake uccārampi passāvampi kheḷampi karissatha !
Netaṃ , moghapurisā , appasannānaṃ vā pasādāya … pe … evañca pana , bhikkhave , imaṃ sikkhāpadaṃ uddiseyyātha –
‘‘ Na udake uccāraṃ vā passāvaṃ vā kheḷaṃ vā karissāmīti sikkhā karaṇīyā ’’ ti .
Evañcidaṃ bhagavatā bhikkhūnaṃ sikkhāpadaṃ paññattaṃ hoti .
654. Tena kho pana samayena gilānā bhikkhū udake uccārampi passāvampi
T2.570 kheḷampi kātuṃ kukkuccāyanti .Bhagavato etamatthaṃ ārocesuṃ .
Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –
‘‘ anujānāmi , bhikkhave , gilānena bhikkhunā
V0.282 udake uccārampi passāvampi kheḷampi kātuṃ .Evañca pana , bhikkhave , imaṃ sikkhāpadaṃ uddiseyyātha –
‘‘ Na udake agilāno uccāraṃ vā passāvaṃ vā kheḷaṃ vā karissāmīti sikkhā karaṇīyā ’’ ti .
Na udake agilānena uccāro vā passāvo vā kheḷo vā kātabbo .
Yo anādariyaṃ paṭicca udake agilāno uccāraṃ vā passāvaṃ vā kheḷaṃ vā karoti , āpatti dukkaṭassa .
Anāpatti asañcicca , assatiyā , ajānantassa , gilānassa , thale kato udakaṃ ottharati , āpadāsu , ummattakassa , khittacittassa , vedanāṭṭassa , ādikammikassāti .
Pannarasamasikkhāpadaṃ niṭṭhitaṃ .
Pādukavaggo sattamo .
Uddiṭṭhā
M0.272 kho , āyasmanto , sekhiyā dhammā .Tatthāyasmante pucchāmi –
‘‘ kaccittha parisuddhā ’’?
Dutiyampi pucchāmi –
‘‘ kaccittha parisuddhā ’’?
Tatiyampi pucchāmi –
‘‘ kaccittha parisuddhā ’’?
Parisuddhetthāyasmanto , tasmā tuṇhī , evametaṃ dhārayāmīti .
Sekhiyā niṭṭhitā .
Sekhiyakaṇḍaṃ niṭṭhitaṃ .