2. Omasavādasikkhāpadaṃ

12. TenaT2.162 samayena buddho bhagavā sāvatthiyaṃ viharati jetavane anāthapiṇḍikassa ārāmeV0.7 .

Tena kho pana samayena chabbaggiyā bhikkhū pesalehi bhikkhūhi saddhiṃ bhaṇḍantā [ bhaṇḍentā ( itipi )] pesale bhikkhū omasanti – jātiyāpi , nāmenapi , gottenapi , kammenapi , sippenapi , ābādhenapi , liṅgenapi , kilesenapi , āpattiyāpi ;

hīnenapi akkosena khuṃsenti vambhenti .

Ye te bhikkhū appicchā … pe … te ujjhāyanti khiyyanti vipācenti –

‘‘ kathañhi nāma chabbaggiyā bhikkhū pesalehi bhikkhūhi saddhiṃ bhaṇḍantā pesale bhikkhūP4.5 omasissanti – jātiyāpi , nāmenapi , gottenapi , kammenapi , sippenapi , ābādhenapi , liṅgenapi , kilesenapi , āpattiyāpi ;

hīnenapi akkosena khuṃsessanti vambhessantī ’’ ti !

Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ … pe … saccaṃ kira tumhe , bhikkhave , pesalehiM0.7 bhikkhūhi saddhiṃ bhaṇḍantā pesale bhikkhū omasatha – jātiyāpi … pe … hīnenapi akkosena khuṃsetha vambhethāti ?

‘‘ Saccaṃ , bhagavā ’’ ti .

Vigarahi buddho bhagavā … pe … kathañhi nāma tumhe , moghapurisā , pesalehi bhikkhūhi saddhiṃ bhaṇḍantā pesale bhikkhū omasissatha – jātiyāpi … pe … hīnenapi akkosena khuṃsessatha vambhessathaT2.163 !

Netaṃ , moghapurisā , appasannānaṃ vā pasādāya … pe … vigarahitvā … pe … dhammiṃ kathaṃ katvā bhikkhū āmantesi –

13.‘‘ Bhūtapubbaṃ , bhikkhave , takkasilāyaṃ [ takkasīlāyaṃ ( ka .)] aññatarassa brāhmaṇassa nandivisālo nāma balībaddo [ balivaddo ( sī .), balibaddo ( syā .)] ahosi .

Atha kho , bhikkhave , nandivisālo balībaddo taṃ brāhmaṇaṃ etadavoca –

‘‘ gaccha tvaṃ , brāhmaṇa , seṭṭhinā saddhiṃ sahassena abbhutaṃ karohi – mayhaṃ balībaddo sakaṭasataṃ atibaddhaṃ pavaṭṭessatī ’’ ti .

Atha kho , bhikkhave , so brāhmaṇo seṭṭhinā saddhiṃ sahassena abbhutaṃ akāsi – mayhaṃ balībaddo sakaṭasataṃ atibaddhaṃ pavaṭṭessatīti .

Atha kho , bhikkhave , so brāhmaṇo sakaṭasataṃ atibandhitvā nandivisālaṃ balībaddaṃ yuñjitvā etadavoca –

‘‘ gaccha , kūṭa [ añcha kūṭa ( sī . syā .)], vahassu , kūṭā ’ ti .

Atha kho , bhikkhave , nandivisālo balībaddo tattheva aṭṭhāsi .

Atha kho , bhikkhave , so brāhmaṇo sahassena parājito pajjhāyi .

Atha kho , bhikkhave , nandivisālo balībaddo taṃ brāhmaṇaṃ etadavoca –

‘‘ kissa tvaṃ , brāhmaṇa , pajjhāyasī ’’ ti ?

‘ Tathā hi panāhaṃ , bho , tayā sahassena parājito ’’ ti .

‘ Kissa pana maṃ tvaṃ , brāhmaṇa , akūṭaṃ kūṭavādena pāpesi ?

Gaccha tvaṃ , brāhmaṇa , seṭṭhinā saddhiṃ dvīhi sahassehi abbhutaṃ karohi –

‘‘ mayhaṃ balībaddo sakaṭasataṃ atibaddhaṃ pavaṭṭessatī ’’ ti .

‘‘ Mā ca maṃ akūṭaṃ kūṭavādena pāpesī ’’ ti .

Atha kho , bhikkhave , so brāhmaṇo seṭṭhināT2.164 saddhiṃ dvīhi sahassehi abbhutaṃ akāsi –

‘‘ mayhaṃ balībaddo sakaṭasataṃ atibaddhaṃ pavaṭṭessatī ’’ ti .

Atha kho , bhikkhave , so brāhmaṇoV0.8 sakaṭasataṃ atibandhitvā nandivisālaṃ balībaddaṃ yuñjitvā etadavoca –

‘‘ accha , bhadra , vahassu , bhadrā ’’ ti .

Atha kho , bhikkhave , nandivisālo balībaddo sakaṭasataṃ atibaddhaṃ pavaṭṭesi .

[ jā .1.1.28 nandivisālajātakepi , tattha pana manuññasaddo dissati ]‘‘ ManāpamevaM0.8 bhāseyya , nā , manāpaṃ kudācanaṃ ;

Manāpaṃ bhāsamānassa , garuṃ bhāraṃ udabbahi ;

Dhanañca naṃ alābhesi , tena ca , ttamano ahūti .

‘‘ TadāpiP4.6 me , bhikkhave , amanāpā khuṃsanā vambhanā .

Kimaṅgaṃ pana etarahi manāpā bhavissati khuṃsanā vambhanā ?

Netaṃ , bhikkhave , appasannānaṃ vā pasādāya … pe ….

‘‘ Evañca pana , bhikkhave , imaṃ sikkhāpadaṃ uddiseyyātha –

14.‘‘ Omasavāde pācittiyan ’’ ti .

15. Omasavādo nāma dasahi ākārehi omasati – jātiyāpi , nāmenapi , gottenapi , kammenapi , sippenapi , ābādhenapi , liṅgenapi , kilesenapi , āpattiyāpi , akkosenapi .

Jāti nāma dve jātiyo – hīnā ca jāti ukkaṭṭhā ca jāti .

Hīnā nāma jāti – caṇḍālajāti , venajāti , nesādajāti , rathakārajāti , pukkusajāti .

Esā hīnā nāma jāti .

Ukkaṭṭhā nāma jāti – khattiyajāti , brāhmaṇajāti .

Esā ukkaṭṭhā nāma jāti .

Nāmaṃ nāma dve nāmāni – hīnañca nāmaṃ ukkaṭṭhañca nāmaṃT2.165 .

Hīnaṃ nāma nāmaṃ – avakaṇṇakaṃ , javakaṇṇakaṃ , dhaniṭṭhakaṃ , saviṭṭhakaṃ , kulavaḍḍhakaṃ , tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ , etaṃ hīnaṃ nāma nāmaṃ .

Ukkaṭṭhaṃ nāma nāmaṃ – buddhappaṭisaṃyuttaṃ , dhammappaṭisaṃyuttaṃ , saṅghappaṭisaṃyuttaṃ , tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ , etaṃ ukkaṭṭhaṃ nāma nāmaṃ .

Gottaṃ nāma dve gottāni – hīnañca gottaṃ ukkaṭṭhañca gottaṃ .

Hīnaṃ nāma gottaṃ – kosiyagottaṃ , bhāradvājagottaṃ , tesu tesu vā pana janapadesu oññātaṃ avaññātaṃ hīḷitaṃ paribhūtaṃV0.9 acittīkataṃ , etaṃ hīnaṃ nāma gottaṃ .

Ukkaṭṭhaṃ nāma gottaṃ – gotamagottaṃ , moggallānagottaṃ , kaccānagottaṃ , vāsiṭṭhagottaṃ , tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ , etaṃ ukkaṭṭhaṃ nāma gottaṃ .

Kammaṃ nāma dve kammāni – hīnañca kammaṃ ukkaṭṭhañca kammaṃ .

Hīnaṃ nāma kammaṃ – koṭṭhakakammaṃ , pupphachaḍḍakakammaṃ , tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ , etaṃ hīnaṃ nāma kammaṃ .

Ukkaṭṭhaṃ nāma kammaṃ – kasi ,M0.9 vaṇijjā , gorakkhā , tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ .

Etaṃ ukkaṭṭhaṃ nāma kammaṃ .

Sippaṃ nāma dve sippāni – hīnañca sippaṃ ukkaṭṭhañcaP4.7 sippaṃT2.166 .

Hīnaṃ nāma sippaṃ – naḷakārasippaṃ , kumbhakārasippaṃ , pesakārasippaṃ , cammakārasippaṃ , nahāpitasippaṃ , tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ .

Etaṃ hīnaṃ nāma sippaṃ .

Ukkaṭṭhaṃ nāma sippaṃ – muddā , gaṇanā , lekhā , tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ , etaṃ ukkaṭṭhaṃ nāma sippaṃ .

Sabbepi ābādhā hīnā , apica madhumeho ābādho ukkaṭṭho .

Liṅgaṃ nāma dve liṅgāni – hīnañca liṅgaṃ ukkaṭṭhañca liṅgaṃ .

Hīnaṃ nāma liṅgaṃ – atidīghaṃ , atirassaṃ , atikaṇhaṃ , accodātaṃ , etaṃ hīnaṃ nāma liṅgaṃ .

Ukkaṭṭhaṃ nāma liṅgaṃ – nātidīghaṃ , nātirassaṃ , nātikaṇhaṃ , nāccodātaṃ .

Etaṃ ukkaṭṭhaṃ nāma liṅgaṃ .

Sabbepi kilesā hīnā .

Sabbāpi āpattiyo hīnā .

Apica , sotāpattisamāpatti ukkaṭṭhā .

Akkoso nāma dve akkosā – hīno ca akkoso ukkaṭṭho ca akkoso .

Hīno nāma akkoso – oṭṭhosi , meṇḍosi , goṇosi , gadrabhosi , tiracchānagatosi , nerayikosi ;

natthi tuyhaṃ sugati , duggati yeva tuyhaṃ pāṭikaṅkhāti , yakārena vā bhakārena vā , kāṭakoṭacikāya vā , eso hīno nāma akkoso .

UkkaṭṭhoT2.167 nāma akkoso – paṇḍitosi , byattosiV0.10 , medhāvīsi , bahussutosi , dhammakathikosi , natthi tuyhaṃ duggati , sugatiyeva tuyhaṃ pāṭikaṅkhāti , eso ukkaṭṭho nāma akkoso .

16. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , caṇḍālaṃ venaṃ nesādaṃ rathakāraṃ pukkusaṃ –

‘‘ caṇḍālosi , venosi , nesādosi , rathakārosi , pukkusosī ’’ ti bhaṇati [ vadetīti uddeso . bhaṇatīti vitthāro ( vajirabuddhi )], āpatti vācāya , vācāya pācittiyassa .

UpasampannoM0.10 upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , khattiyaṃ brāhmaṇaṃ –

‘‘ caṇḍālosi , venosi , nesādosi , rathakārosi , pukkusosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , caṇḍālaṃ venaṃ nesādaṃ rathakāraṃ pukkusaṃ –

‘‘ khattiyosi , brāhmaṇosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , khattiyaṃ brāhmaṇaṃ –

‘‘ khattiyosi ,P4.8 brāhmaṇosī ’’ ti bhaṇati , āpatti vācāya , vācāya pācittiyassa .

17. UpasampannoT2.168 upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , avakaṇṇakaṃV0.11 javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ –

‘‘ avakaṇṇakosi , javakaṇṇakosi , dhaniṭṭhakosi , saviṭṭhakosi , kulavaḍḍhakosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , buddharakkhitaṃ dhammarakkhitaṃ saṅgharakkhitaṃ –

‘‘ avakaṇṇakosi , javakaṇṇakosi , dhaniṭṭhakosi , saviṭṭhakosi , kulavaḍḍhakosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ –

‘‘ buddharakkhitosi , dhammarakkhitosi , saṅgharakkhitosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukaṭṭhaṃ vadeti , buddharakkhitaṃ dhammarakkhitaṃ saṅgharakkhitaṃ –

‘‘ buddharakkhitosi , dhammarakkhitosi , saṅgharakkhitosī ’’ ti bhaṇati , āpatti vācāya , vācāya pācittiyassa .

18. UpasampannoT2.169M0.11 upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , kosiyaṃ bhāradvājaṃ –

‘‘ kosiyosi , bhāradvājosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , gotamaṃ moggallānaṃ kaccānaṃ vāsiṭṭhaṃ –

‘‘ kosiyosi , bhāradvājosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , kosiyaṃ bhāradvājaṃ –

‘‘ gotamosi , moggallānosi , kaccānosi , vāsiṭṭhosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , gotamaṃ moggallānaṃ kaccānaṃ vāsiṭṭhaṃ –

‘‘ gotamosi , moggallānosi , kaccānosi , vāsiṭṭhosī ’’ ti bhaṇati , āpatti vācāya , vācāya pācittiyassa .

19. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , koṭṭhakaṃ pupphachaḍḍakaṃ –

‘‘ koṭṭhakosi , pupphachaḍḍakosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , kassakaṃ vāṇijaṃ gorakkhaṃ –

‘‘ koṭṭhakosi , pupphachaḍḍakosī ’’ ti bhaṇati , āpatti vācāya , vācāya pācittiyassa .

UpasampannoV0.12 upasampannaṃ khuṃsetukāmo vambhetukāmo maṅkukattukāmoT2.170 ukkaṭṭhena hīnaṃ vadeti , koṭṭhakaṃ pupphachaḍḍakaṃ –

‘‘ kassakosi , vāṇijosi , gorakkhosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , kassakaṃ vāṇijaṃ gorakkhaṃ –

‘‘ kassakosi , vāṇijosi , gorakkhosī ’’ ti bhaṇati , āpatti vācāya , vācāya pācittiyassa .

20. UpasampannoM0.12 upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , naḷakāraṃ kumbhakāraṃ pesakāraṃ cammakāraṃ nahāpitaṃ –

‘‘ naḷakārosi , kumbhakārosi , pesakārosi , cammakārosi , nahāpitosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , muddikaṃ gaṇakaṃ lekhakaṃ –

‘‘ naḷakārosi , kumbhakārosi , pesakārosi , cammakārosi , nahāpitosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , naḷakāraṃ kumbhakāraṃ pesakāraṃ cammakāraṃ nahāpitaṃ –

‘‘ muddikosi , gaṇakosi , lekhakosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmoT2.171 ukkaṭṭhena ukkaṭṭhaṃ vadeti , muddikaṃ gaṇakaṃ lekhakaṃ –

‘‘ muddikosi , gaṇakosi , lekhakosī ’’ ti bhaṇati , āpatti vācāya , vācāya pācittiyassa .

21. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , kuṭṭhikaṃ gaṇḍikaṃ kilāsikaṃ sosikaṃ apamārikaṃ –

‘‘ kuṭṭhikosi , gaṇḍikosi , kilāsikosi , sosikosi , apamārikosī ’’ ti bhaṇati , āpatti vācāya , vācāya pācittiyassa .

UpasampannoV0.13 upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , madhumehikaṃ –

‘‘ kuṭṭhikosi , gaṇḍikosi , kilāsikosi , sosikosi , apamārikosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , kuṭṭhikaṃ gaṇḍikaṃ kilāsikaṃ sosikaṃ apamārikaṃ –

‘‘ madhumehikosī ’’ ti bhaṇati , āpatti vācāya , vācāya pācittiyassa .

UpasampannoM0.13 upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , madhumehikaṃ –

‘‘ madhumehikosī ’’ ti bhaṇati , āpatti vācāya , vācāya pācittiyassa .

22. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , atidīghaṃ atirassaṃ atikaṇhaṃ accodātaṃT2.172 –

‘‘ atidīghosi , atirassosi , atikaṇhosi , accodātosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , nātidīghaṃ nātirassaṃ nātikaṇhaṃ nāccodātaṃ –

‘‘ atidīghosi , atirassosi , atikaṇhosi , accodātosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , atidīghaṃ atirassaṃ atikaṇhaṃ accodātaṃ –

‘‘ nātidīghosi , nātirassosi , nātikaṇhosi , nāccodātosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , nātidīghaṃ nātirassaṃ nātikaṇhaṃP4.9 nāccodātaṃ –

‘‘ nātidīghosi , nātirassosi , nātikaṇhosi , nāccodātosī ’’ ti bhaṇati , āpatti vācāya , vācāya pācittiyassa .

23. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , rāgapariyuṭṭhitaṃ dosapariyuṭṭhitaṃ mohapariyuṭṭhitaṃ –

‘‘ rāgapariyuṭṭhitosi , dosapariyuṭṭhitosi , mohapariyuṭṭhitosī ’’ ti bhaṇati , āpatti vācāya , vācāya pācittiyassa .

UpasampannoV0.14 upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , vītarāgaṃ vītadosaṃ vītamohaṃ –

‘‘ rāgapariyuṭṭhitosiT2.173 , dosapariyuṭṭhitosi , mohapariyuṭṭhitosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , rāgapariyuṭṭhitaṃ dosapariyuṭṭhitaṃ mohapariyuṭṭhitaṃM0.14 –

‘‘ vītarāgosi , vītadososi , vītamohosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , vītarāgaṃ vītadosaṃ vītamohaṃ –

‘‘ vītarāgosi , vītadososi , vītamohosī ’’ ti bhaṇati , āpatti vācāya , vācāya pācittiyassa .

24. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , pārājikaṃ ajjhāpannaṃ saṅghādisesaṃ ajjhāpannaṃ thullaccayaṃ ajjhāpannaṃ pācittiyaṃ ajjhāpannaṃ pāṭidesanīyaṃ ajjhāpannaṃ dukkaṭaṃ ajjhāpannaṃ dubbhāsitaṃ ajjhāpannaṃ –

‘‘ pārājikaṃ ajjhāpannosi , saṅghādisesaṃ ajjhāpannosi , thullaccayaṃ ajjhāpannosi , pācittiyaṃ ajjhāpannosi , pāṭidesanīyaṃ ajjhāpannosi , dukkaṭaṃ ajjhāpannosi , dubbhāsitaṃ ajjhāpannosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , sotāpannaṃ –

‘‘ pārājikaṃ ajjhāpannosi … pe …T2.174 dubbhāsitaṃ ajjhāpannosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti , pārājikaṃ ajjhāpannaṃ … pe … dubbhāsitaṃ ajjhāpannaṃ –

‘‘ sotāpannosī ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , sotāpannaṃ –

‘‘ sotāpannosī ’’ ti bhaṇati , āpatti vācāya , vācāya pācittiyassa .

25. UpasampannoV0.15 upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti , oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ –

‘‘ oṭṭhosi , meṇḍosi , goṇosi , gadrabhosi , tiracchānagatosi , nerayikosi , natthi tuyhaṃ sugati , duggati yeva tuyhaṃ pāṭikaṅkhā ’’ ti bhaṇati , āpatti vācāya , vācāya pācittiyassa .

UpasampannoM0.15 upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti , paṇḍitaṃ byattaṃ medhāvi bahussutaṃ dhammakathikaṃ –

‘‘ oṭṭhosi , meṇḍosi , goṇosi , gadrabhosi , tiracchānagatosi , nerayikosi ;

natthi tuyhaṃ sugati , duggati yeva tuyhaṃ pāṭikaṅkhā ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmoT2.175 ukkaṭṭhena hīnaṃ vadeti , oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ –

‘‘ paṇḍitosi , byattosi , medhāvīsi , bahussutosi , dhammakathikosi , natthi tuyhaṃ duggati , sugati yeva tuyhaṃ pāṭikaṅkhā ’’ ti bhaṇati , āpatti vācāya , vācāya pācittiyassa .

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti , paṇḍitaṃ byattaṃ medhāviṃ bahussutaṃ dhammakathikaṃ –

26. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ santi idhekacce caṇḍālā venā nesādā rathakārā pukkusā ’’ ti bhaṇati , āpatti vācāya , vācāya dukkaṭassa .

Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ santi idhekacce khattiyā , brāhmaṇā ’’ ti bhaṇati , āpatti vācāya , vācāya dukkaṭassa .

27. Upasampanno upasampannaṃ khuṃsetukāmo vambhetukāmo maṅkukattukāmo evaṃP4.10 vadeti ,‘‘ santi idhekacce avakaṇṇakā javakaṇṇakā dhaniṭṭhakā saviṭṭhakā kulavaḍḍhakā ’’ ti bhaṇati … pe ….

‘‘ Santi idhekacce buddharakkhitā dhammarakkhitāT2.176 saṅgharakkhitā ’’ ti bhaṇatiV0.16 … pe ….

‘‘ Santi idhekacce kosiyā bhāradvājā ’’ ti bhaṇati … pe ….

‘‘ Santi idhekacce gotamā moggallānā kaccānā vāsiṭṭhā ’’ ti bhaṇati … pe ….

‘‘ Santi idhekacce koṭṭhakā pupphachaḍḍakā ’’ ti bhaṇati … pe ….

‘‘ Santi idhekacce kassakā vāṇijā gorakkhā ’’ ti bhaṇati … pe ….

‘‘ Santi idhekacce naḷakārā kumbhakārāM0.16 pesakārā cammakārā nahāpitā ’’ ti bhaṇati … pe ….

‘‘ Santi idhekacce muddikā gaṇakā lekhakā ’’ ti bhaṇati … pe ….

‘‘ Santi idhekacce kuṭṭhikā gaṇḍikā kilāsikā sosikā apamārikā ’’ ti bhaṇati … pe ….

‘‘ Santi idhekacce madhumehikā ’’ ti bhaṇati … pe ….

‘‘ Santi idhekacce atidīghā atirassā atikaṇhā accodātā ’’ ti bhaṇati … pe ….

‘‘ Santi idhekacce nātidīghā nātirassā nātikaṇhā nāccodātā ’’ ti bhaṇati … pe ….

‘‘ Santi idhekacce rāgapariyuṭṭhitā dosapariyuṭṭhitā mohapariyuṭṭhitā ’’ ti bhaṇati … pe ….

‘‘ Santi idhekacce vītarāgā vītadosā vītamohā ’’ ti bhaṇati … pe ….

‘‘ Santi idhekacce pārājikaṃ ajjhāpannā … pe … dubbhāsitaṃ ajjhāpannā ’’ ti bhaṇati … pe ….

‘‘ Santi idhekacce sotāpannā ’’ ti bhaṇati … pe ….

‘‘ Santi idhekacce oṭṭhā meṇḍā goṇā gadrabhā tiracchānagatā nerayikā , natthi tesaṃ sugati , duggatiyeva tesaṃ pāṭikaṅkhā ’’ ti bhaṇati , āpatti vācāya , vācāya dukkaṭassa .

28. Upasampanno upasampannaṃ khuṃsetukāmo vambhetukāmo maṅkukattukāmoT2.177 evaṃ vadeti ,‘‘ santi idhekacce paṇḍitā byattā , medhāvī bahussutā dhammakathikā , natthi tesaṃ duggati , sugatiyeva tesaṃ pāṭikaṅkhā ’’ ti bhaṇati , āpatti vācāya , vācāya dukkaṭassa .

29. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ ye nūna caṇḍālā venā nesādā rathakārā pukkusā ’’ ti bhaṇati , āpatti vācāya , vācāya dukkaṭassa … pe ….

Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ ye nūna paṇḍitā byattā medhāvī bahussutā dhammakathikā ’’ ti bhaṇati , āpatti vācāya , vācāya dukkaṭassa .

30. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ na mayaṃ caṇḍālā venā nesādā rathakārā pukkusā ’’ ti bhaṇati … pe ….

‘‘ Na mayaṃ paṇḍitā byattāV0.17 medhāvī bahussutā dhammakathikā , natthamhākaṃ duggati , sugatiyeva amhākaṃ pāṭikaṅkhā ’’ ti bhaṇati .

Āpatti vācāya , vācāya dukkaṭassa .

31. UpasampannoM0.17 anupasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti ,… pe … hīnena ukkaṭṭhaṃ vadeti … pe … ukkaṭṭhena hīnaṃ vadeti … pe … ukkaṭṭhena ukkaṭṭhaṃ vadeti , paṇḍitaṃ byattaṃ medhāviṃ bahussutaṃ dhammakathikaṃ –

‘‘ paṇḍitosi , byattosi , medhāvīsi , bahussutosi , dhammakathikosi , natthi tuyhaṃ duggati , sugatiyeva tuyhaṃ pāṭikaṅkhā ’’ tiT2.178 bhaṇati , āpatti vācāya , vācāya dukkaṭassa .

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ santi idhekacce caṇḍālā venā nesādā rathakārā pukkusā ’’ ti bhaṇati … pe ….

‘‘ Santi idhekacce paṇḍitā byattā medhāvī bahussutā dhammakathikā , natthi tesaṃ duggati , sugatiyeva tesaṃ pāṭikaṅkhā ’’ ti bhaṇati , āpatti vācāya , vācāya dukkaṭassa .

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ ye nūna caṇḍālā venā nesādā rathakārā pukkusā ’’ ti bhaṇati … pe ….

‘‘ Ye nūna paṇḍitā byattā medhāvī bahussutā dhammakathikā ’’ ti bhaṇati , āpatti vācāya , vācāya dukkaṭassa .

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti ,‘‘ na mayaṃ caṇḍālā venā nesādā rathakārā pukkusā ’’ ti bhaṇati … pe ….

‘‘ Na mayaṃ paṇḍitā byattā medhāvī bahussutā dhammakathikā , natthamhākaṃP4.11 duggati , sugatiyeva amhākaṃ pāṭikaṅkhā ’’ ti bhaṇati .

Āpatti vācāya , vācāya dukkaṭassa .

32. Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā hīnena hīnaṃ vadeti , caṇḍālaṃ venaṃ nesādaṃ rathakāraṃ pukkusaṃ –

‘‘ caṇḍālosi , venosi , nesādosi , rathakārosiT2.179 , pukkusosī ’’ ti bhaṇati , āpatti vācāya , vācāya dubbhāsitassa .

Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā hīnenaV0.18 ukkaṭṭhaṃ vadeti , khattiyaṃ brāhmaṇaṃ –

‘‘ caṇḍālosi , venosi , nesādosi , rathakārosi , pukkusosī ’’ ti bhaṇati , āpatti vācāya , vācāya dubbhāsitassa .

UpasampannoM0.18 upasampannaṃ na khuṃsetukāmo na vambhetukāmo na maṅkukattukāmo , davakamyatā ukkaṭṭhena hīnaṃ vadeti , caṇḍālaṃ venaṃ nesādaṃ rathakāraṃ pukkusaṃ –

‘‘ khattiyosi , brāhmaṇosī ’’ ti bhaṇati , āpatti vācāya , vācāya dubbhāsitassa .

Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā ukkaṭṭhena ukkaṭṭhaṃ vadeti , khattiyaṃ brāhmaṇaṃ –

‘‘ khattiyosi , brāhmaṇosī ’’ ti bhaṇati , āpatti vācāya , vācāya dubbhāsitassa .

Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā hīnena hīnaṃ vadeti … pe … hīnena ukkaṭṭhaṃ vadeti … pe … ukkaṭṭhena hīnaṃ vadeti … pe … ukkaṭṭhena ukkaṭṭhaṃ vadeti , paṇḍitaṃ byattaṃ medhāviṃ bahussutaṃ dhammakathikaṃ –

‘‘ paṇḍitosi , byattosi , medhāvīsi , bahussutosi , dhammakathikosi , natthi tuyhaṃ duggati , sugati yeva tuyhaṃ pāṭikaṅkhā ’’ ti bhaṇati , āpatti vācāya , vācāya dubbhāsitassa .

33. Upasampanno upasampannaṃ na khuṃsetukāmo na vambhetukāmo naT2.180 maṅkukattukāmo , davakamyatā evaṃ vadeti ,‘‘ santi idhekacce caṇḍālā venā nesādā rathakārā pukkusā ’’ ti bhaṇati … pe ….

‘‘ Santi idhekacce paṇḍitā byattā medhāvī bahussutā dhammakathikā , natthi tesaṃ duggati , sugati yeva tesaṃ pāṭikaṅkhā ’’ ti bhaṇati , āpatti vācāya , vācāya dubbhāsitassa .

Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā evaṃ vadeti ,‘‘ ye nūna caṇḍālā venā nesādā rathakārā pukkusā ’’ ti bhaṇati … pe ….

‘‘ Ye nūna paṇḍitā byattā medhāvī bahussutā dhammakathikā ’’ ti bhaṇati , āpatti vācāya , vācāya dubbhāsitassa .

Upasampanno upasampannaṃ na khuṃsetukāmo na vambhetukāmo na maṅkukattukāmo , davakamyatā evaṃ vadeti ,‘‘ na mayaṃ caṇḍālā venā nesādā rathakārā pukkusā ’’ ti bhaṇati … pe ….

‘‘ Na mayaṃ paṇḍitāV0.19 byattā medhāvī bahussutā dhammakathikā , natthamhākaṃ duggati , sugatiyeva amhākaṃ pāṭikaṅkhā ’’ ti bhaṇati .

Āpatti vācāya , vācāya dubbhāsitassa .

34. UpasampannoM0.19 anupasampannaṃ na khuṃsetukāmo na vambhetukāmo na maṅkukattukāmo , davakamyatā hīnena hīnaṃ vadeti … pe … hīnena ukkaṭṭhaṃ vadeti … pe … ukkaṭṭhena hīnaṃ vadeti … pe … ukkaṭṭhena ukkaṭṭhaṃ vadeti , paṇḍitaṃ byattaṃ medhāviṃ bahussutaṃ dhammakathikaṃ –

‘‘ paṇḍitosiT2.181 , byattosi , medhāvīsi , bahussutosi dhammakathikosi , natthi tuyhaṃ duggati ;

sugati yeva tuyhaṃ pāṭikaṅkhā ’’ ti bhaṇati , āpatti vācāya , vācāya dubbhāsitassa .

Upasampanno anupasampannaṃ na khuṃsetukāmo na vambhetukāmo na maṅkukattukāmo , davakamyatā evaṃ vadeti ,‘‘ santi idhekacce caṇḍālā venā nesādā rathakārā pukkusā ’’ ti bhaṇati … pe ….

Upasampanno anupasampannaṃ na khuṃsetukāmo na vambhetukāmo na maṅkukattukāmo , davakamyatā evaṃ vadeti ,‘‘ ye nūna caṇḍālā venā nesādā rathakārā pukkusā ’’ ti bhaṇati … pe ….

‘‘ Ye nūna paṇḍitā byattā medhāvī bahussutā dhammakathikā ’’ ti bhaṇati , āpatti vācāya , vācāya dubbhāsitassa .

Upasampanno anupasampannaṃ na khuṃsetukāmo na vambhetukāmo na maṅkukattukāmo , davakamyatā evaṃ vadeti ,‘‘ na mayaṃ caṇḍālā venā nesādā rathakārā pukkusā ’’ ti bhaṇati … pe ….

‘‘ Na mayaṃ paṇḍitā byattā medhāvī bahussutā dhammakathikā , natthamhākaṃ duggati , sugati yeva amhākaṃ pāṭikaṅkhā ’’ ti bhaṇati , āpatti vācāya , vācāya dubbhāsitassa .

35. AnāpattiT2.182 atthapurekkhārassa , dhammapurekkhārassa , anusāsanipurekkhārassa , ummattakassa , khittacittassa , vedanāṭṭassa , ādikammikassāti .

Omasavādasikkhāpadaṃ niṭṭhitaṃ dutiyaṃ .

Issues

Select Version

Pācittiyapāḷi

Pācittiyapāḷi