6. Sappasuttaṃ
142. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe .
Tena kho pana samayena bhagavā rattandhakāratimisāyaṃ abbhokāse nisinno hoti , devo ca ekamekaṃ phusāyati .
Atha
T1.155V1.126 kho māro pāpimā bhagavato bhayaṃ chambhitattaṃ lomahaṃsaṃ uppādetukāmo mahantaṃ sapparājavaṇṇaṃ abhinimminitvā yena bhagavā tenupasaṅkami .Seyyathāpi nāma mahatī ekarukkhikā nāvā , evamassa kāyo hoti .
Seyyathāpi nāma mahantaṃ soṇḍikākiḷañjaṃ , evamassa phaṇo hoti .
Seyyathāpi nāma mahatī kosalikā kaṃsapāti , evamassa akkhīni bhavanti .
Seyyathāpi nāma deve gaḷagaḷāyante vijjullatā niccharanti , evamassa mukhato jivhā niccharati .
Seyyathāpi nāma kammāragaggariyā dhamamānāya saddo hoti , evamassa assāsapassāsānaṃ saddo hoti .
Atha kho bhagavā ‘‘ māro ayaṃ pāpimā ’’ iti viditvā māraṃ pāpimantaṃ gāthāhi ajjhabhāsi –
‘‘ Yo suññagehāni sevati ,
Seyyo so muni attasaññato ;
Vossajja careyya tattha so ,
Patirūpañhi tathāvidhassa taṃ .
‘‘ Carakā
M1.108 bahū bheravā bahū ,Atho ḍaṃsasarīsapā [ ḍaṃsa siriṃsapā ( sī . syā . kaṃ . pī .)] bahū ;
Lomampi
P1.107 na tattha iñjaye ,Suññāgāragato mahāmuni .
‘‘ Nabhaṃ
T1.156 phaleyya pathavī caleyya ,Sabbepi pāṇā uda santaseyyuṃ ;
Sallampi ce urasi pakappayeyyuṃ ,
Upadhīsu tāṇaṃ na karonti buddhā ’’ ti .
Atha kho māro pāpimā ‘‘ jānāti maṃ bhagavā , jānāti maṃ sugato ’’ ti dukkhī dummano tatthevantaradhāyīti .