Issues
Editor
Settings
Versions
Select Version
နိဿယ
မြန်မာဘာသာ
Sagāthāvaggo
Sagāthāvaggo

7. Addhavaggo

Author： _System_Pali_VRI_ @ Administrator

7. Addhavaggo

1. Nāmasuttaṃ

61.
‘‘ KiṃsuT1.54P1.39 sabbaṃ addhabhavi [ anvabhavi ( sī .)], kismā bhiyyo na vijjati ;
Kissassu ekadhammassa , sabbeva vasamanvagū ’’ ti [ vasamaddhagū ( ka .)].
‘‘ Nāmaṃ sabbaṃ addhabhavi , nāmā bhiyyo na vijjati ;
Nāmassa ekadhammassa , sabbeva vasamanvagū ’’ ti .

2. Cittasuttaṃ

62.
‘‘ Kenassu nīyati loko , kenassu parikassati ;
Kissassu ekadhammassa , sabbeva vasamanvagū ’’ ti .
‘‘ Cittena nīyati loko , cittena parikassati ;
Cittassa ekadhammassa , sabbeva vasamanvagū ’’ ti .

3. Taṇhāsuttaṃ

63.
‘‘ Kenassu nīyati loko , kenassu parikassati ;
Kissassu ekadhammassa , sabbeva vasamanvagū ’’ ti .
‘‘ TaṇhāyaV1.46 nīyati loko , taṇhāya parikassati ;
Taṇhāya ekadhammassa , sabbeva vasamanvagū ’’ ti .

4. Saṃyojanasuttaṃ

64.
‘‘ KiṃsuT1.55M1.37 saṃyojano loko , kiṃsu tassa vicāraṇaṃ ;
Kissassu vippahānena , nibbānaṃ iti vuccatī ’’ ti .
‘‘ Nandīsaṃyojano [ nandisaṃyojano ( sī . syā . kaṃ .)] loko , vitakkassa vicāraṇaṃ ;
Taṇhāya vippahānena , nibbānaṃ iti vuccatī ’’ ti .

5. Bandhanasuttaṃ

65.
‘‘ Kiṃsu sambandhano loko , kiṃsu tassa vicāraṇaṃ ;
Kissassu vippahānena , sabbaṃ chindati bandhanan ’’ ti .
‘‘ NandīsambandhanoP1.40 loko , vitakkassa vicāraṇaṃ ;
Taṇhāya vippahānena , sabbaṃ chindati bandhanan ’’ ti .

6. Attahatasuttaṃ

66.
‘‘ Kenassubbhāhato loko , kenassu parivārito ;
Kena sallena otiṇṇo , kissa dhūpāyito sadā ’’ ti .
‘‘ Maccunābbhāhato loko , jarāya parivārito ;
Taṇhāsallena otiṇṇo , icchādhūpāyito sadā ’’ ti .

7. Uḍḍitasuttaṃ

67.
‘‘ KenassuV1.47 uḍḍito loko , kenassu parivārito ;
Kenassu pihito loko , kismiṃ loko patiṭṭhito ’’ ti .
‘‘ Taṇhāya uḍḍito loko , jarāya parivārito ;
Maccunā pihito loko , dukkhe loko patiṭṭhito ’’ ti .

8. Pihitasuttaṃ

68.
‘‘ KenassuT1.56 pihito loko , kismiṃ loko patiṭṭhito ;
Kenassu uḍḍito loko , kenassu parivārito ’’ ti .
‘‘ MaccunāM1.38 pihito loko , dukkhe loko patiṭṭhito ;
Taṇhāya uḍḍito loko , jarāya parivārito ’’ ti .

9. Icchāsuttaṃ

69.
‘‘ Kenassu bajjhatī loko , kissa vinayāya muccati ;
Kissassu vippahānena , sabbaṃ chindati bandhanan ’’ ti .
‘‘ Icchāya bajjhatī loko , icchāvinayāya muccati ;
Icchāya vippahānena , sabbaṃ chindati bandhanan ’’ ti .

10. Lokasuttaṃ

70.
‘‘ KismiṃP1.41 loko samuppanno , kismiṃ kubbati santhavaṃ ;
Kissa loko upādāya , kismiṃ loko vihaññatī ’’ ti .
‘‘ ChasuV1.48 loko samuppanno , chasu kubbati santhavaṃ ;
Channameva upādāya , chasu loko vihaññatī ’’ ti .
Addhavaggo [ anvavaggo ( sī .)] sattamo .
Tassuddānaṃ –
Nāmaṃ cittañca taṇhā ca , saṃyojanañca bandhanā ;
Abbhāhatuḍḍito pihito , icchā lokena te dasāti .