1. Kasibhāradvājasuttaṃ
197. Evaṃ
T1.253V1.201P1.172 me sutaṃ – ekaṃ samayaṃ bhagavā magadhesu viharati dakkhiṇāgirismiṃ ekanāḷāyaṃ brāhmaṇagāme .Tena kho pana samayena kasibhāradvājassa [ kasikabhāradvājassa ( ka .)] brāhmaṇassa pañcamattāni naṅgalasatāni payuttāni honti vappakāle .
Atha kho bhagavā pubbaṇhasamayaṃ nivāsetvā pattacīvaramādāya yena kasibhāradvājassa brāhmaṇassa kammanto tenupasaṅkami .
Tena kho pana samayena kasibhāradvājassa brāhmaṇassa parivesanā vattati .
Atha kho bhagavā yena parivesanā tenupasaṅkami ;
upasaṅkamitvā ekamantaṃ aṭṭhāsi .
Addasā kho kasibhāradvājo brāhmaṇo bhagavantaṃ piṇḍāya ṭhitaṃ .
Disvā bhagavantaṃ etadavoca –
‘‘ ahaṃ kho , samaṇa , kasāmi ca vapāmi ca , kasitvā ca vapitvā ca bhuñjāmi .
Tvampi , samaṇa , kasassu ca vapassu ca , kasitvā ca vapitvā ca bhuñjassū ’’ ti .
‘‘ Ahampi kho , brāhmaṇa , kasāmi ca vapāmi ca , kasitvā ca vapitvā ca bhuñjāmī ’’ ti .
Na kho mayaṃ passāma bhoto gotamassa yugaṃ vā naṅgalaṃ vā phālaṃ vā pācanaṃ vā balībadde vā , atha ca pana
T1.254 bhavaṃ gotamo evamāha –‘‘ ahampi kho , brāhmaṇa , kasāmi ca vapāmi ca , kasitvā ca vapitvā ca bhuñjāmī ’’ ti
M1.175 .Atha kho kasibhāradvājo brāhmaṇo bhagavantaṃ gāthāya ajjhabhāsi –
‘‘ Kassako paṭijānāsi , na ca passāmi te kasiṃ ;
Kassako pucchito brūhi , kathaṃ jānemu taṃ kasin ’’ ti .
‘‘ Saddhā bījaṃ tapo vuṭṭhi , paññā me yuganaṅgalaṃ ;
Hirī īsā mano yottaṃ , sati me phālapācanaṃ .
‘‘ Kāyagutto
V1.202 vacīgutto , āhāre udare yato ;Saccaṃ karomi niddānaṃ , soraccaṃ me pamocanaṃ .
‘‘ Vīriyaṃ
P1.173 me dhuradhorayhaṃ , yogakkhemādhivāhanaṃ ;Gacchati anivattantaṃ , yattha gantvā na socati .
‘‘ Evamesā kasī kaṭṭhā , sā hoti amatapphalā ;
Etaṃ kasiṃ kasitvāna , sabbadukkhā pamuccatī ’’ ti .
‘‘ Bhuñjatu bhavaṃ gotamo .
Kassako bhavaṃ .
Yañhi bhavaṃ gotamo amatapphalampi kasiṃ kasatī ’’ ti [ bhāsatīti ( ka .)].
‘‘ Gāthābhigītaṃ me abhojaneyyaṃ ,
Sampassataṃ brāhmaṇa nesa dhammo ;
Gāthābhigītaṃ panudanti buddhā ,
Dhamme sati brāhmaṇa vuttiresā .
‘‘ Aññena
T1.255 ca kevalinaṃ mahesiṃ ,Khīṇāsavaṃ kukkuccavūpasantaṃ ;
Annena pānena upaṭṭhahassu ,
Khettañhi taṃ puññapekkhassa hotī ’’ ti .
Evaṃ vutte , kasibhāradvājo brāhmaṇo bhagavantaṃ etadavoca –
‘‘ abhikkantaṃ , bho gotama … pe … ajjatagge pāṇupetaṃ saraṇaṃ gatan ’’ ti .