7. Nadubbhiyasuttaṃ
253. Sāvatthiyaṃ .
‘‘ Bhūtapubbaṃ , bhikkhave , sakkassa devānamindassa rahogatassa paṭisallīnassa evaṃ cetaso parivitakko udapādi –
‘ yopi me assa supaccatthiko tassapāhaṃ na dubbheyyan ’ ti .
Atha kho , bhikkhave , vepacitti asurindo sakkassa devānamindassa cetasā cetoparivitakkamaññāya
T1.330 yena sakko devānamindo tenupasaṅkami .Addasā
M1.227 kho , bhikkhave , sakko devānamindo vepacittiṃ asurindaṃ dūratova āgacchantaṃ .Disvāna vepacittiṃ asurindaṃ etadavoca –
‘ tiṭṭha , vepacitti , gahitosī ’’’ ti .
‘‘ Yadeva te , mārisa , pubbe cittaṃ , tadeva tvaṃ mā pajahāsī ’’ ti [ tadeva tvaṃ mārisa pahāsīti ( sī . syā . kaṃ .)].
‘‘ Sapassu ca me , vepacitti , adubbhāyā ’’ ti [ adrubbhāya ( ka .)].
‘‘ Yaṃ musā bhaṇato pāpaṃ , yaṃ pāpaṃ ariyūpavādino ;
Mittadduno ca yaṃ pāpaṃ , yaṃ pāpaṃ akataññuno ;
Tameva pāpaṃ phusatu [ phusati ( sī . pī .)], yo te dubbhe sujampatī ’’ ti .