8. Piṇḍasuttaṃ
154. Ekaṃ samayaṃ bhagavā magadhesu viharati pañcasālāyaṃ brāhmaṇagāme .
Tena
P1.114 kho pana samayena pañcasālāyaṃ brāhmaṇagāme kumārikānaṃT1.167 pāhunakāni bhavanti .Atha kho bhagavā pubbaṇhasamayaṃ nivāsetvā pattacīvaramādāya pañcasālaṃ brāhmaṇagāmaṃ piṇḍāya pāvisi .
Tena kho pana samayena pañcasāleyyakā brāhmaṇagahapatikā mārena pāpimatā anvāviṭṭhā bhavanti – mā samaṇo gotamo piṇḍamalatthāti .
Atha kho bhagavā yathādhotena pattena pañcasālaṃ brāhmaṇagāmaṃ piṇḍāya pāvisi tathādhotena [ yathādhotena (?)] pattena paṭikkami .
Atha kho māro pāpimā yena bhagavā tenupasaṅkami ;
upasaṅkamitvā bhagavantaṃ etadavoca –
‘‘ api
M1.116 tvaṃ , samaṇa , piṇḍamalatthā ’’ ti ?‘‘ Tathā nu tvaṃ , pāpima , akāsi yathāhaṃ piṇḍaṃ
V1.136 na labheyyan ’’ ti .‘‘ Tena hi , bhante , bhagavā dutiyampi pañcasālaṃ brāhmaṇagāmaṃ piṇḍāya pavisatu .
Tathāhaṃ karissāmi yathā bhagavā piṇḍaṃ lacchatī ’’ ti .
‘‘ Apuññaṃ pasavi māro , āsajja naṃ tathāgataṃ ;
Kiṃ nu maññasi pāpima , na me pāpaṃ vipaccati .
‘‘ Susukhaṃ vata jīvāma , yesaṃ no natthi kiñcanaṃ ;
Pītibhakkhā bhavissāma , devā ābhassarā yathā ’’ ti .
Atha kho māro pāpimā ‘‘ jānāti maṃ bhagavā , jānāti maṃ sugato ’’ ti dukkhī dummano tatthevantaradhāyīti .