1. Naḷavaggo
1. Oghataraṇasuttaṃ
1. Evaṃ
T1.1V1.1P1.1M1.1 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ aṭṭhāsi .
Ekamantaṃ ṭhitā kho sā devatā bhagavantaṃ etadavoca –
‘‘‘ kathaṃ nu tvaṃ , mārisa , oghamatarī ’ ti ?
‘ Appatiṭṭhaṃ khvāhaṃ , āvuso , anāyūhaṃ
V1.2 oghamatarin ’ ti .‘ Yathā kathaṃ pana tvaṃ , mārisa , appatiṭṭhaṃ anāyūhaṃ oghamatarī ’ ti ?
‘ Yadākhvāhaṃ , āvuso , santiṭṭhāmi tadāssu saṃsīdāmi
T1.2 ;yadākhvāhaṃ , āvuso , āyūhāmi tadāssu nibbuyhāmi [ nivuyhāmi ( syā . kaṃ . ka .)].
Evaṃ khvāhaṃ , āvuso , appatiṭṭhaṃ anāyūhaṃ oghamatarin ’’’ ti .
‘‘ Cirassaṃ vata passāmi , brāhmaṇaṃ parinibbutaṃ ;
Appatiṭṭhaṃ anāyūhaṃ , tiṇṇaṃ loke visattikan ’’ ti .
–
Idamavoca
M1.2 sā devatā .Samanuñño satthā ahosi .
Atha kho sā devatā –
‘‘ samanuñño me satthā ’’ ti bhagavantaṃ abhivādetvā padakkhiṇaṃ katvā tatthevantaradhāyīti .
2. Nimokkhasuttaṃ
2. Sāvatthinidānaṃ
P1.2 .Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami ;
upasaṅkamitvā bhagavantaṃ abhivādetvā ekamantaṃ aṭṭhāsi .
Ekamantaṃ ṭhitā kho sā devatā bhagavantaṃ etadavoca –
‘‘ Jānāsi no tvaṃ , mārisa , sattānaṃ nimokkhaṃ pamokkhaṃ vivekan ’’ ti ?
‘‘ Jānāmi khvāhaṃ , āvuso , sattānaṃ nimokkhaṃ pamokkhaṃ vivekan ’’ ti .
‘‘ Yathā kathaṃ pana tvaṃ , mārisa , jānāsi sattānaṃ nimokkhaṃ pamokkhaṃ vivekan ’’ ti ?
‘‘ Nandībhavaparikkhayā
T1.3 [ nandibhavaparikkhayā ( syā . kaṃ .)], saññāviññāṇasaṅkhayā , vedanānaṃ nirodhā upasamā – evaṃ khvāhaṃ , āvuso , jānāmi sattānaṃ nimokkhaṃ pamokkhaṃ vivekan ’’ ti .3. Upanīyasuttaṃ
3. Sāvatthinidānaṃ
V1.3 .Ekamantaṃ ṭhitā kho sā devatā bhagavato santike imaṃ gāthaṃ abhāsi –
‘‘ Upanīyati jīvitamappamāyu ,
Jarūpanītassa na santi tāṇā ;
Etaṃ bhayaṃ maraṇe pekkhamāno ,
Puññāni kayirātha sukhāvahānī ’’ ti .
‘‘ Upanīyati jīvitamappamāyu ,
Jarūpanītassa na santi tāṇā ;
Etaṃ bhayaṃ maraṇe pekkhamāno ,
Lokāmisaṃ pajahe santipekkho ’’ ti .
4. Accentisuttaṃ
4. Sāvatthinidānaṃ
M1.3 .Ekamantaṃ
T1.4P1.3 ṭhitā kho sā devatā bhagavato santike imaṃ gāthaṃ abhāsi –‘‘ Accenti kālā tarayanti rattiyo ,
Vayoguṇā anupubbaṃ jahanti ;
Etaṃ bhayaṃ maraṇe pekkhamāno ,
Puññāni kayirātha sukhāvahānī ’’ ti .
‘‘ Accenti kālā tarayanti rattiyo ,
Vayoguṇā anupubbaṃ jahanti ;
Etaṃ bhayaṃ maraṇe pekkhamāno ,
Lokāmisaṃ pajahe santipekkho ’’ ti .
5. Katichindasuttaṃ
5. Sāvatthinidānaṃ
V1.4 .Ekamantaṃ ṭhitā kho sā devatā bhagavato santike imaṃ gāthaṃ abhāsi –
‘‘ Kati chinde kati jahe , kati cuttari bhāvaye ;
Kati saṅgātigo bhikkhu , oghatiṇṇoti vuccatī ’’ ti .
‘‘ Pañca chinde pañca jahe , pañca cuttari bhāvaye ;
Pañca saṅgātigo bhikkhu , oghatiṇṇoti vuccatī ’’ ti .
6. Jāgarasuttaṃ
6. Sāvatthinidānaṃ .
Ekamantaṃ
T1.5 ṭhitā kho sā devatā bhagavato santike imaṃ gāthaṃ abhāsi –‘‘ Kati jāgarataṃ suttā , kati suttesu jāgarā ;
Katibhi [ katīhi ( sī .)] rajamādeti , katibhi [ katīhi ( sī .)] parisujjhatī ’’ ti .
‘‘ Pañca jāgarataṃ suttā , pañca suttesu jāgarā ;
Pañcabhi [ pañcahi ( sī .)] rajamādeti , pañcabhi [ pañcahi ( sī .)] parisujjhatī ’’ ti .
7. Appaṭividitasuttaṃ
7. Sāvatthinidānaṃ
M1.4 .Ekamantaṃ
P1.4 ṭhitā kho sā devatā bhagavato santike imaṃ gāthaṃ abhāsi –‘‘ Yesaṃ dhammā appaṭividitā , paravādesu nīyare [ niyyare ( ka .)];
Suttā te nappabujjhanti , kālo tesaṃ pabujjhitun ’’ ti .
‘‘ Yesaṃ dhammā suppaṭividitā , paravādesu na nīyare ;
Te sambuddhā sammadaññā , caranti visame saman ’’ ti .
8. Susammuṭṭhasuttaṃ
8. Sāvatthinidānaṃ .
Ekamantaṃ ṭhitā kho sā devatā bhagavato santike imaṃ gāthaṃ abhāsi –
‘‘ Yesaṃ
T1.6 dhammā susammuṭṭhā , paravādesu nīyare ;Suttā te nappabujjhanti , kālo tesaṃ pabujjhitun ’’ ti .
‘‘ Yesaṃ
V1.5 dhammā asammuṭṭhā , paravādesu na nīyare ;Te sambuddhā sammadaññā , caranti visame saman ’’ ti .
9. Mānakāmasuttaṃ
9. Sāvatthinidānaṃ .
Ekamantaṃ ṭhitā kho sā devatā bhagavato santike imaṃ gāthaṃ abhāsi –
‘‘ Na mānakāmassa damo idhatthi ,
Na monamatthi asamāhitassa ;
Eko araññe viharaṃ pamatto ,
Na maccudheyyassa tareyya pāran ’’ ti .
‘‘ Mānaṃ pahāya susamāhitatto ,
Sucetaso sabbadhi vippamutto ;
Eko araññe viharaṃ appamatto ,
Sa maccudheyyassa tareyya pāran ’’ ti .
10. Araññasuttaṃ
10. Sāvatthinidānaṃ
V1.6M1.5 .Ekamantaṃ
P1.5 ṭhitā kho sā devatā bhagavantaṃ gāthāya ajjhabhāsi –‘‘ Araññe
T1.7 viharantānaṃ , santānaṃ brahmacārinaṃ ;Ekabhattaṃ bhuñjamānānaṃ , kena vaṇṇo pasīdatī ’’ ti .
‘‘ Atītaṃ nānusocanti , nappajappanti nāgataṃ ;
Paccuppannena yāpenti , tena vaṇṇo pasīdati ’’.
‘‘ Anāgatappajappāya , atītassānusocanā ;
Etena bālā sussanti , naḷova harito luto ’’ ti .
Naḷavaggo paṭhamo .
Tassuddānaṃ –
Oghaṃ nimokkhaṃ upaneyyaṃ , accenti katichindi ca ;
Jāgaraṃ appaṭividitā , susammuṭṭhā mānakāminā ;
Araññe dasamo vutto , vaggo tena pavuccati .