10. Dutiyaāyusuttaṃ

Author： _System_Pali_VRI_ @ Administrator

146. EvaṃV1.129M1.110 me sutaṃ – ekaṃ samayaṃ bhagavā rājagahe viharati veḷuvane kalandakanivāpe .

Tatra kho bhagavā … pe … etadavoca –

‘‘ Appamidaṃ , bhikkhave , manussānaṃ āyu .

Gamanīyo samparāyo , kattabbaṃ kusalaṃ , caritabbaṃ brahmacariyaṃ .

Natthi jātassa amaraṇaṃ .

Yo , bhikkhave , ciraṃ jīvati , so vassasataṃ appaṃ vā bhiyyo ’’ ti .

Atha kho māro pāpimā yena bhagavā tenupasaṅkami ;

upasaṅkamitvāT1.159 bhagavantaṃ gāthāya ajjhabhāsi –

‘‘ NāccayantiP1.109 ahorattā , jīvitaṃ nūparujjhati ;

Āyu anupariyāyati , maccānaṃ nemīva rathakubbaran ’’ ti .

‘‘ Accayanti ahorattā , jīvitaṃ uparujjhati ;

Āyu khīyati maccānaṃ , kunnadīnaṃva odakan ’’ ti .

Atha kho māro pāpimā ‘‘ jānāti maṃ bhagavā , jānāti maṃ sugato ’’ ti dukkhī dummano tatthevantaradhāyīti .

Paṭhamo vaggo .

Tassuddānaṃ –

Tapokammañca nāgo ca , subhaṃ pāsena te duve ;

Sappo supati nandanaṃ , āyunā apare duveti .