10. Rajjasuttaṃ

Author： _System_Pali_VRI_ @ Administrator

10. Rajjasuttaṃ

156. Ekaṃ samayaṃ bhagavā kosalesu viharati himavantapadese [ himavantapasse ( sī .)] araññakuṭikāyaṃ .

Atha kho bhagavato rahogatassa paṭisallīnassa evaṃ cetasoT1.170 parivitakko udapādi –

‘‘ sakkā nu kho rajjaṃ kāretuṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā ’’ ti ?

Atha kho māro pāpimā bhagavato cetasā cetoparivitakkamaññāya yena bhagavā tenupasaṅkami ;

upasaṅkamitvā bhagavantaṃ etadavoca –

‘‘ kāretu , bhante , bhagavā rajjaṃ , kāretu , sugato , rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃ dhammenā ’’ ti .

‘‘ Kiṃ pana me tvaṃ , pāpima , passasi yaṃ maṃ tvaṃ evaṃ vadesi –

‘ kāretu , bhante , bhagavā rajjaṃ , kāretu sugatoV1.138 , rajjaṃ ahanaṃ aghātayaṃ ajinaṃ ajāpayaṃ asocaṃ asocāpayaṃM1.118 dhammenā ’’’ ti ?

‘‘ Bhagavatā kho , bhante , cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā .

Ākaṅkhamāno ca , bhante , bhagavā himavantaṃ pabbatarājaṃ suvaṇṇaṃ tveva adhimucceyya suvaṇṇañca panassā ’’ ti [ suvaṇṇapabbatassāti ( sī . syā . kaṃ .), suvaṇṇañca pabbatassāti ( pī .)].

‘‘ PabbatassaP1.117 suvaṇṇassa , jātarūpassa kevalo ;

Dvittāva nālamekassa , iti vidvā samañcare .

‘‘ Yo dukkhamaddakkhi yatonidānaṃ ,

Kāmesu so jantu kathaṃ nameyya ;

Upadhiṃ viditvā saṅgoti loke ,

Tasseva jantu vinayāya sikkhe ’’ ti .

Atha khoT1.171 māro pāpimā ‘‘ jānāti maṃ bhagavā , jānāti maṃ sugato ’’ ti dukkhī dummano tatthevantaradhāyīti .

Dutiyo vaggo .

Tassuddānaṃ –

Pāsāṇo sīho sakalikaṃ [ sakkhalikaṃ ( ka .)], patirūpañca mānasaṃ ;

Pattaṃ āyatanaṃ piṇḍaṃ , kassakaṃ rajjena te dasāti .

Issues

Select Version

Sagāthāvaggo

Sagāthāvaggo