8. Gahaṭṭhavandanāsuttaṃ
264. Sāvatthiyaṃ .
Tatra … pe … etadavoca –
‘‘ bhūtapubbaṃ , bhikkhave , sakko devānamindo mātaliṃ saṅgāhakaṃ āmantesi –
‘ yojehi , samma mātali , sahassayuttaṃ
M1.236 ājaññarathaṃ .Uyyānabhūmiṃ gacchāma subhūmiṃ dassanāyā ’ ti .
‘ Evaṃ bhaddantavā ’ ti kho , bhikkhave , mātali saṅgāhako sakkassa devānamindassa paṭissutvā sahassayuttaṃ ājaññarathaṃ yojetvā sakkassa devānamindassa paṭivedesi –
‘ yutto kho te , mārisa , sahassayutto ājaññaratho .
Yassa dāni kālaṃ maññasī ’’’ ti .
Atha kho , bhikkhave , sakko devānamindo vejayantapāsādā orohanto
V1.271 añjaliṃ katvā [ pañjaliko ( pī .), pañjaliṃ katvā ( ka .)] sudaṃ puthuddisā namassati .Atha
T1.344 kho , bhikkhave , mātali saṅgāhako sakkaṃ devānamindaṃ gāthāya ajjhabhāsi –‘‘ Taṃ namassanti tevijjā , sabbe bhummā ca khattiyā ;
Cattāro ca mahārājā , tidasā ca yasassino ;
Atha ko nāma so yakkho , yaṃ tvaṃ sakka namassasī ’’ ti .
‘‘ Maṃ namassanti tevijjā , sabbe bhummā ca khattiyā ;
Cattāro ca mahārājā , tidasā ca yasassino .
‘‘ Ahañca sīlasampanne , cirarattasamāhite ;
Sammāpabbajite vande , brahmacariyaparāyane .
‘‘ Ye gahaṭṭhā puññakarā , sīlavanto upāsakā ;
Dhammena dāraṃ posenti , te namassāmi mātalī ’’ ti .
‘‘ Seṭṭhā hi kira lokasmiṃ , ye tvaṃ sakka namassasi ;
Ahampi te namassāmi , ye namassasi vāsavā ’’ ti .
‘‘ Idaṃ vatvāna maghavā , devarājā sujampati ;
Puthuddisā namassitvā , pamukho rathamāruhī ’’ ti .