5. Subhāsitasuttaṃ

Author： _System_Pali_VRI_ @ Administrator

5. Subhāsitasuttaṃ

213. Sāvatthinidānaṃ .

Tatra kho bhagavā bhikkhū āmantesi –

‘‘ bhikkhavo ’’ ti .

‘‘ Bhadante ’’ ti te bhikkhū bhagavato paccassosuṃ .

Bhagavā etadavoca –

‘‘ Catūhi , bhikkhave , aṅgehi samannāgatā vācā subhāsitā hoti , no dubbhāsitā ;

anavajjā ca ananuvajjā ca viññūnaṃ .

Katamehi catūhi ?

Idha , bhikkhave , bhikkhuV1.219 subhāsitaṃyeva bhāsati no dubbhāsitaṃ , dhammaṃyeva bhāsati no adhammaṃ , piyaṃyevaP1.189 bhāsati no appiyaṃ , saccaṃyeva bhāsati no alikaṃ .

Imehi kho , bhikkhave , catūhi aṅgehi samannāgatā vācā subhāsitā hoti , no dubbhāsitā , anavajjā ca ananuvajjā ca viññūnan ’’ ti .

Idamavoca bhagavā , idaṃ vatvāna sugato athāparaṃ etadavoca satthā –

‘‘ SubhāsitaṃT1.278 uttamamāhu santo ,

Dhammaṃ bhaṇe nādhammaṃ taṃ dutiyaṃ ;

Piyaṃ bhaṇe nāppiyaṃ taṃ tatiyaṃ ,

Saccaṃ bhaṇe nālikaṃ taṃ catutthan ’’ ti .

Atha kho āyasmā vaṅgīso uṭṭhāyāsanā ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca –

‘‘ paṭibhāti maṃ bhagavā , paṭibhāti maṃ sugatā ’’ ti .

‘‘ Paṭibhātu taṃ vaṅgīsā ’’ ti bhagavā avoca .

Atha kho āyasmā vaṅgīso bhagavantaṃ sammukhā sāruppāhi gāthāhi abhitthavi –

‘‘ Tameva vācaṃ bhāseyya , yāyattānaṃ na tāpaye ;

Pare ca na vihiṃseyya , sā ve vācā subhāsitā .

‘‘ Piyavācaṃva bhāseyya , yā vācā paṭinanditā ;

Yaṃ anādāya pāpāni , paresaṃ bhāsate piyaṃ .

‘‘ SaccaṃM1.191 ve amatā vācā , esa dhammo sanantano ;

Sacce atthe ca dhamme ca , āhu santo patiṭṭhitā .

‘‘ Yaṃ buddho bhāsate vācaṃ , khemaṃ nibbānapattiyā ;

Dukkhassantakiriyāya , sā ve vācānamuttamā ’’ ti .

Issues

Select Version

Sagāthāvaggo

Sagāthāvaggo