3. Devahitasuttaṃ

Author： _System_Pali_VRI_ @ Administrator

199. SāvatthinidānaṃT1.257 .

Tena kho pana samayena bhagavā vātehābādhiko hoti ;

āyasmā ca upavāṇo bhagavato upaṭṭhāko hoti .

Atha kho bhagavā āyasmantaṃ upavāṇaṃ āmantesi –

‘‘ iṅgha me tvaṃ , upavāṇa , uṇhodakaṃ jānāhī ’’ ti .

‘‘ Evaṃ , bhante ’’ ti kho āyasmā upavāṇo bhagavato paṭissutvā nivāsetvā pattacīvaramādāya yena devahitassa brāhmaṇassa nivesanaṃ tenupasaṅkami ;

upasaṅkamitvā tuṇhībhūto ekamantaṃ aṭṭhāsi .

Addasā kho devahito brāhmaṇo āyasmantaṃV1.204 upavāṇaṃ tuṇhībhūtaṃ ekamantaṃ ṭhitaṃ .

Disvāna āyasmantaṃ upavāṇaṃ gāthāya ajjhabhāsi –

‘‘ TuṇhībhūtoM1.177P1.175 bhavaṃ tiṭṭhaṃ , muṇḍo saṅghāṭipāruto ;

Kiṃ patthayāno kiṃ esaṃ , kiṃ nu yācitumāgato ’’ ti .

‘‘ Arahaṃ sugato loke , vātehābādhiko muni ;

Sace uṇhodakaṃ atthi , munino dehi brāhmaṇa .

‘‘ Pūjito pūjaneyyānaṃ , sakkareyyāna sakkato ;

Apacito apaceyyānaṃ [ apacineyyānaṃ ( sī . syā . kaṃ .) ṭīkā oloketabbā ], tassa icchāmi hātave ’’ ti .

Atha kho devahito brāhmaṇo uṇhodakassa kājaṃ purisena gāhāpetvā phāṇitassa ca puṭaṃ āyasmato upavāṇassa pādāsi .

Atha kho āyasmā upavāṇo yena bhagavā tenupasaṅkami ;

upasaṅkamitvā bhagavantaṃT1.258 uṇhodakena nhāpetvā [ nahāpetvā ( sī . pī .)] uṇhodakena phāṇitaṃ āloletvā bhagavato pādāsi .

Atha kho bhagavato ābādho paṭippassambhi .

Atha kho devahito brāhmaṇo yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho devahito brāhmaṇo bhagavantaṃ gāthāya ajjhabhāsi –

‘‘ Kattha dajjā deyyadhammaṃ , kattha dinnaṃ mahapphalaṃ ;

Kathañhi yajamānassa , kathaṃ ijjhati dakkhiṇā ’’ ti .

‘‘ Pubbenivāsaṃ yo vedī , saggāpāyañca passati ;

Atho jātikkhayaṃ patto , abhiññāvosito muni .

‘‘ EtthaV1.205 dajjā deyyadhammaṃ , ettha dinnaṃ mahapphalaṃ ;

Evañhi yajamānassa , evaṃ ijjhati dakkhiṇā ’’ ti .

Evaṃ vutte , devahito brāhmaṇo bhagavantaṃ etadavoca –

‘‘ abhikkantaṃ bho gotama … pe … upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatan ’’ ti .