4. Mahāsālasuttaṃ

Author： _System_Pali_VRI_ @ Administrator

4. Mahāsālasuttaṃ

200. SāvatthinidānaṃM1.178 .

Atha kho aññataro brāhmaṇamahāsālo lūkho lūkhapāvuraṇoP1.176 [ lūkhapāpuraṇo ( sī . syā . kaṃ . pī .)] yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinnaṃ kho taṃ brāhmaṇamahāsālaṃ bhagavāT1.259 etadavoca –

‘‘ kinnu tvaṃ , brāhmaṇa , lūkho lūkhapāvuraṇo ’’ ti ?

‘‘ Idha me , bho gotama , cattāro puttā .

Te maṃ dārehi saṃpuccha gharā nikkhāmentī ’’ ti .

‘‘ Tena hi tvaṃ , brāhmaṇa , imā gāthāyo pariyāpuṇitvā sabhāyaṃ mahājanakāye sannipatite puttesu ca sannisinnesu bhāsassu –

‘‘ Yehi jātehi nandissaṃ , yesañca bhavamicchisaṃ ;

Te maṃ dārehi saṃpuccha , sāva vārenti sūkaraṃ .

‘‘ Asantā kira maṃ jammā , tāta tātāti bhāsare ;

Rakkhasā puttarūpena , te jahanti vayogataṃ .

‘‘ Assova jiṇṇo nibbhogo , khādanā apanīyati ;

Bālakānaṃ pitā thero , parāgāresu bhikkhati .

‘‘ Daṇḍova kira me seyyo , yañce puttā anassavā ;

Caṇḍampi goṇaṃ vāreti , atho caṇḍampi kukkuraṃ .

‘‘ AndhakāreV1.206 pure hoti , gambhīre gādhamedhati ;

Daṇḍassa ānubhāvena , khalitvā patitiṭṭhatī ’’ ti .

Atha kho so brāhmaṇamahāsālo bhagavato santike imā gāthāyo pariyāpuṇitvā sabhāyaṃ mahājanakāye sannipatite puttesu ca sannisinnesu abhāsi –

‘‘ Yehi jātehi nandissaṃ , yesañca bhavamicchisaṃ ;

TeT1.260 maṃ dārehi saṃpuccha , sāva vārenti sūkaraṃ .

‘‘ Asantā kira maṃ jammā , tāta tātāti bhāsare ;

Rakkhasā puttarūpena , te jahanti vayogataṃ .

‘‘ AssovaM1.179 jiṇṇo nibbhogo , khādanā apanīyati ;

Bālakānaṃ pitā thero , parāgāresu bhikkhati .

‘‘ Daṇḍova kira me seyyo , yañce puttā anassavā ;

Caṇḍampi goṇaṃ vāreti , atho caṇḍampi kukkuraṃ .

‘‘ Andhakāre pure hoti , gambhīre gādhamedhati ;

Daṇḍassa ānubhāvena , khalitvā patitiṭṭhatī ’’ ti .

AthaP1.177 kho naṃ brāhmaṇamahāsālaṃ puttā gharaṃ netvā nhāpetvā paccekaṃ dussayugena acchādesuṃ .

Atha kho so brāhmaṇamahāsālo ekaṃ dussayugaṃ ādāya yena bhagavā tenupasaṅkami ;

upasaṅkamitvā bhagavatā saddhiṃ sammodi .

Sammodanīyaṃ kathaṃ sāraṇīyaṃ vītisāretvā ekamantaṃ nisīdi .

Ekamantaṃ nisinno kho brāhmaṇamahāsālo bhagavantaṃ etadavoca –

‘‘ mayaṃ , bho gotama , brāhmaṇā nāma ācariyassa ācariyadhanaṃ pariyesāma .

Paṭiggaṇhatu me bhavaṃ gotamo ācariyadhanan ’’ ti .

Paṭiggahesi bhagavā anukampaṃ upādāya .

Atha kho so brāhmaṇamahāsālo bhagavantaṃV1.207 etadavoca –

‘‘ abhikkantaṃ , bho gotama … pe … upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gatan ’’ ti .

Issues

Select Version

Sagāthāvaggo

Sagāthāvaggo