4. Sattavassānubandhasuttaṃ

Author： _System_Pali_VRI_ @ Administrator

4. Sattavassānubandhasuttaṃ

160. Evaṃ me sutaṃ – ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe .

Tena kho pana samayena māro pāpimā sattavassāni bhagavantaṃ anubandho hoti otārāpekkho otāraṃ alabhamāno .

Atha kho māro pāpimā yena bhagavā tenupasaṅkami ;

upasaṅkamitvā bhagavantaṃ gāthāya ajjhabhāsi –

‘‘ SokāvatiṇṇoP1.123 nu vanamhi jhāyasi ,

Vittaṃ nu jīno uda patthayāno ;

Āguṃ nu gāmasmimakāsi kiñci ,

KasmāT1.180 janena na karosi sakkhiṃ ;

Sakkhī na sampajjati kenaci te ’’ ti .

‘‘ SokassaM1.124 mūlaṃ palikhāya sabbaṃ ,

Anāgu jhāyāmi asocamāno ;

Chetvāna sabbaṃ bhavalobhajappaṃ ,

Anāsavo jhāyāmi pamattabandhū ’’ ti .

‘‘ Yaṃ vadanti mama yidanti , ye vadanti mamanti ca ;

Ettha ce te mano atthi , na me samaṇa mokkhasī ’’ ti .

‘‘ YaṃV1.145 vadanti na taṃ mayhaṃ , ye vadanti na te ahaṃ ;

Evaṃ pāpima jānāhi , na me maggampi dakkhasī ’’ ti .

‘‘ Sace maggaṃ anubuddhaṃ , khemaṃ amatagāminaṃ ;

Apehi gaccha tvameveko , kimaññamanusāsasī ’’ ti .

‘‘ Amaccudheyyaṃ pucchanti , ye janā pāragāmino ;

Tesāhaṃ puṭṭho akkhāmi , yaṃ saccaṃ taṃ nirūpadhin ’’ ti .

‘‘ Seyyathāpi , bhante , gāmassa vā nigamassa vā avidūre pokkharaṇī .

Tatrassa kakkaṭako .

Atha kho , bhante , sambahulā kumārakā vā kumārikāyo vā tamhā gāmā vā nigamā vā nikkhamitvā yena sā pokkharaṇī tenupasaṅkameyyuṃ ;

upasaṅkamitvā taṃ kakkaṭakaṃ udakā uddharitvā thale patiṭṭhapeyyuṃ .

Yaṃ yadeva hi so , bhante , kakkaṭako aḷaṃ abhininnāmeyya taṃ tadeva te kumārakā vāT1.181 kumārikāyo vā kaṭṭhena vā kathalāya vā sañchindeyyuṃ sambhañjeyyuṃ sampalibhañjeyyuṃ .

Evañhi so , bhante , kakkaṭako sabbehi aḷehi sañchinnehi sambhaggehi sampalibhaggehi abhabbo taṃ pokkharaṇiṃ otarituṃ .

Evameva kho , bhante , yāni kānici visūkāyikāni [ yāni visukāyikāni ( sī . pī . ka .)] visevitāni vipphanditāni , sabbāni tāni [ kānici kānici sabbāni ( sī . pī . ka .)] bhagavatā sañchinnāni sambhaggāniP1.124 sampalibhaggāni .

Abhabbo dānāhaṃ , bhante , puna bhagavantaṃ upasaṅkamituṃ yadidaṃ otārāpekkho ’’ ti .

Atha kho māro pāpimā bhagavato santike imā nibbejanīyā gāthāyo abhāsi –

‘‘ Medavaṇṇañca pāsāṇaṃ , vāyaso anupariyagā ;

Apettha muduṃ vindema , api assādanā siyā .

‘‘ AladdhāM1.125 tattha assādaṃ , vāyasetto apakkame ;

Kākova selamāsajja , nibbijjāpema gotamā ’’ ti .

Issues

Select Version

Sagāthāvaggo

Sagāthāvaggo