1. Sabbhisuttaṃ

Author： _System_Pali_VRI_ @ Administrator

31. EvaṃT1.24V1.20 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Atha kho sambahulā satullapakāyikā devatāyo abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkamiṃsu ;

upasaṅkamitvā bhagavantaṃ abhivādetvā ekamantaṃ aṭṭhaṃsu .

EkamantaṃP1.17 ṭhitā kho ekā devatā bhagavato santike imaṃ gāthaṃ abhāsi –

‘‘ Sabbhireva samāsetha , sabbhi kubbetha [ krubbetha ( ka .)] santhavaṃ ;

Sataṃ saddhammamaññāya , seyyo hoti na pāpiyo ’’ ti .

Atha kho aparā devatā bhagavato santike imaṃ gāthaṃ abhāsi –

‘‘ Sabbhireva samāsetha , sabbhi kubbetha santhavaṃ ;

Sataṃ saddhammamaññāya , paññā labbhati [ paññaṃ labhati ( syā . kaṃ .)] nāññato ’’ ti .

Atha kho aparā devatā bhagavato santike imaṃ gāthaṃ abhāsi –

‘‘ Sabbhireva samāsetha , sabbhi kubbetha santhavaṃ ;

Sataṃ saddhammamaññāya , sokamajjhe na socatī ’’ ti .

AthaM1.17 kho aparā devatā bhagavato santike imaṃ gāthaṃ abhāsi –

‘‘ SabbhirevaT1.25 samāsetha , sabbhi kubbetha santhavaṃ ;

Sataṃ saddhammamaññāya , ñātimajjhe virocatī ’’ ti .

AthaV1.21 kho aparā devatā bhagavato santike imaṃ gāthaṃ abhāsi –

‘‘ Sabbhireva samāsetha , sabbhi kubbetha santhavaṃ ;

Sataṃ saddhammamaññāya , sattā gacchanti suggatin ’’ ti .

Atha kho aparā devatā bhagavato santike imaṃ gāthaṃ abhāsi –

‘‘ Sabbhireva samāsetha , sabbhi kubbetha santhavaṃ ;

Sataṃ saddhammamaññāya , sattā tiṭṭhanti sātatan ’’ ti .

Atha kho aparā devatā bhagavantaṃ etadavoca –

‘‘ kassa nu kho , bhagavā , subhāsitan ’’ ti ?

Sabbāsaṃ vo subhāsitaṃ pariyāyena , api ca mamapi suṇātha –

‘‘ SabbhirevaP1.18 samāsetha , sabbhi kubbetha santhavaṃ ;

Sataṃ saddhammamaññāya , sabbadukkhā pamuccatī ’’ ti .

Idamavoca bhagavā .

Attamanā tā devatāyo bhagavantaṃ abhivādetvā padakkhiṇaṃ katvā tatthevantaradhāyiṃsūti .