37. Sallekhaṭṭhañāṇaniddeso
88. Kathaṃ
T1.151 puthunānattekattatejapariyādāne paññā sallekhaṭṭhe [ puthunānattekattatejapariyādāne ( ka .)] ñāṇaṃ ?Puthūti – rāgo puthu , doso puthu , moho puthu , kodho … pe … upanāho … makkho … paḷāso … issā … macchariyaṃ … māyā … sāṭheyyaṃ … thambho … sārambho … māno … atimāno … mado … pamādo … sabbe kilesā … sabbe duccaritā … sabbe abhisaṅkhārā … sabbe bhavagāmikammā .
Nānattekattan ti
V0.95P1.103 kāmacchando nānattaṃ , nekkhammaṃ ekattaṃ .Byāpādo nānattaṃ , abyāpādo ekattaṃ .
Thinamiddhaṃ nānattaṃ , ālokasaññā ekattaṃ .
Uddhaccaṃ nānattaṃ , avikkhepo ekattaṃ .
Vicikicchā nānattaṃ , dhammavavatthānaṃ ekattaṃ .
Avijjā nānattaṃ , ñāṇaṃ ekattaṃ .
Arati nānattaṃ , pāmojjaṃ ekattaṃ .
Nīvaraṇā nānattaṃ , paṭhamaṃ jhānaṃ ekattaṃ … pe … sabbe kilesā nānattaṃ , arahattamaggo ekattaṃ .
Tejoti pañca tejā – caraṇatejo , guṇatejo , paññātejo , puññatejo , dhammatejo .
Caraṇatejena tejitattā dussīlyatejaṃ pariyādiyati .
Guṇatejena tejitattā aguṇatejaṃ pariyādiyati .
Paññātejena tejitattā duppaññatejaṃ pariyādiyati .
Puññatejena tejitattā
M0.100 apuññatejaṃ pariyādiyati .Dhammatejena tejitattā adhammatejaṃ pariyādiyati .
Sallekhoti kāmacchando asallekho , nekkhammaṃ sallekho
T1.152 .Byāpādo asallekho , abyāpādo sallekho .
Thinamiddhaṃ asallekho , ālokasaññā sallekho .
Uddhaccaṃ asallekho , avikkhepo sallekho .
Vicikicchā asallekho , dhammavavatthānaṃ sallekho .
Avijjā asallekho , ñāṇaṃ sallekho .
Arati asallekho , pāmojjaṃ sallekho .
Nīvaraṇā asallekho , paṭhamaṃ jhānaṃ sallekho … pe … sabbakilesā asallekho , arahattamaggo sallekho .
Taṃ ñātaṭṭhena ñāṇaṃ , pajānanaṭṭhena paññā .
Tena vuccati –
‘‘ puthunānattatejapariyādāne paññā sallekhaṭṭhe ñāṇaṃ ’’.
Sallekhaṭṭhañāṇaniddeso sattatiṃsatimo .