Pūraṇakassapavādo
165.‘‘ Ekamidāhaṃ , bhante , samayaṃ yena pūraṇo kassapo tenupasaṅkami ;
upasaṅkamitvā pūraṇena kassapena saddhiṃ sammodiṃ .
Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃ .
Ekamantaṃ nisinno kho ahaṃ , bhante , pūraṇaṃ kassapaṃ etadavocaṃ –
‘ yathā nu kho imāni , bho kassapa , puthusippāyatanāni , seyyathidaṃ – hatthārohā assārohā rathikā dhanuggahā
M1.49 celakā calakā piṇḍadāyakā uggā rājaputtā pakkhandino mahānāgā sūrā cammayodhino dāsikaputtā āḷārikā kappakā nhāpakā sūdā mālākārā rajakā pesakārā naḷakārā kumbhakārā gaṇakā muddikā , yāni vā panaññānipi evaṃgatāni puthusippāyatanāni- te diṭṭheva dhamme sandiṭṭhikaṃ sippaphalaṃ upajīvanti ;te tena attānaṃ sukhenti pīṇenti , mātāpitaro sukhenti pīṇenti , puttadāraṃ sukhenti pīṇenti , mittāmacce sukhenti pīṇenti , samaṇabrāhmaṇesu uddhaggikaṃ dakkhiṇaṃ patiṭṭhapenti sovaggikaṃ sukhavipākaṃ saggasaṃvattanikaṃ .
Sakkā nu kho , bho kassapa , evameva diṭṭheva dhamme sandiṭṭhikaṃ sāmaññaphalaṃ
T1.68 paññapetun ’ ti ? 166.‘‘ Evaṃ vutte , bhante , pūraṇo kassapo maṃ etadavoca –
‘ karoto kho , mahārāja , kārayato , chindato chedāpayato , pacato pācāpayato socayato , socāpayato , kilamato kilamāpayato , phandato phandāpayato , pāṇamatipātāpayato , adinnaṃ ādiyato , sandhiṃ chindato , nillopaṃ harato , ekāgārikaṃ karoto , paripanthe tiṭṭhato , paradāraṃ gacchato , musā bhaṇato , karoto na karīyati pāpaṃ .
Khurapariyantena cepi cakkena yo imissā pathaviyā pāṇe ekaṃ maṃsakhalaṃ ekaṃ maṃsapuñjaṃ kareyya , natthi tatonidānaṃ pāpaṃ , natthi pāpassa āgamo .
Dakkhiṇaṃ cepi
V1.47 gaṅgāya tīraṃ gaccheyya hananto ghātento chindanto chedāpento pacanto pācāpento , natthi tatonidānaṃ pāpaṃ , natthi pāpassa āgamo .Uttarañcepi gaṅgāya tīraṃ gaccheyya dadanto dāpento yajanto yajāpento , natthi tatonidānaṃ puññaṃ , natthi puññassa āgamo .
Dānena
P1.53 damena saṃyamena saccavajjena natthi puññaṃ , natthi puññassa āgamo ’ ti .Itthaṃ kho me , bhante , pūraṇo kassapo sandiṭṭhikaṃ sāmaññaphalaṃ puṭṭho samāno akiriyaṃ byākāsi .
‘‘ Seyyathāpi , bhante , ambaṃ vā puṭṭho labujaṃ byākareyya
T1.69 , labujaṃ vā puṭṭho ambaṃ byākareyya ;evameva kho me , bhante , pūraṇo kassapo sandiṭṭhikaṃ sāmaññaphalaṃ puṭṭho samāno akiriyaṃ byākāsi .
Tassa mayhaṃ , bhante , etadahosi –
‘ kathañhi nāma mādiso samaṇaṃ vā brāhmaṇaṃ vā vijite vasantaṃ apasādetabbaṃ maññeyyā ’ ti .
So kho ahaṃ , bhante , pūraṇassa kassapassa bhāsitaṃ neva abhinandiṃ nappaṭikkosiṃ .
Anabhinanditvā appaṭikositvā
M1.50 anattamano , anattamanavācaṃ anicchāretvā , tameva vācaṃ anuggaṇhanto anikkujjanto [ anikkujjento ( syā . kaṃ . ka .)] uṭṭhāyāsanā pakkamiṃ [ pakkāmiṃ ( sī . syā . kaṃ . pī .)].