Tatiyajjhānaṃ
230.‘‘ Puna caparaṃ , mahārāja , bhikkhu pītiyā ca virāgā upekkhako ca viharati sato sampajāno , sukhañca kāyena paṭisaṃvedeti , yaṃ taṃ ariyā ācikkhanti –
‘ upekkhako satimā sukhavihārī ’ ti , tatiyaṃ jhānaṃ upasampajja viharati .
So imameva kāyaṃ nippītikena sukhena abhisandeti parisandeti paripūreti parippharati , nāssa kiñci sabbāvato kāyassa nippītikena sukhena apphuṭaṃ hoti .
231.‘‘ Seyyathāpi , mahārāja , uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā
T1.100 udake jātāni udake saṃvaḍḍhāni udakānuggatāni antonimuggaposīni , tāni yāva caggā yāva ca mūlā sītena vārinā abhisannāni parisannāni [ abhisandāni parisandāni ( ka .)] paripūrāni paripphuṭāni [ paripphuṭṭhāni ( pī .)], nāssa kiñci sabbāvataṃ uppalānaṃ vā padumānaṃ vā puṇḍarīkānaṃ vā sītena vārinā apphuṭaṃ assa ;evameva kho , mahārāja , bhikkhu imameva kāyaṃ nippītikena sukhena abhisandeti parisandeti paripūreti parippharati , nāssa kiñci sabbāvato kāyassa nippītikena sukhena apphuṭaṃ hoti .
Idampi kho , mahārāja , sandiṭṭhikaṃ
V1.67 sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca .