Pubbenivāsānussatiñāṇaṃ
244.‘‘ So
T1.107 evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhinīharati abhininnāmeti .So anekavihitaṃ pubbenivāsaṃ anussarati , seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe ,‘ amutrāsiṃ evaṃnāmo evaṃgotto
M1.77 evaṃvaṇṇo evamāhāro evaṃsukhadukkhappaṭisaṃvedīV1.72 evamāyupariyanto , so tato cuto amutra udapādiṃ ;tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto , so tato cuto idhūpapanno ’ ti .
Iti sākāraṃ sauddesaṃ anekavihitaṃ pubbenivāsaṃ anussarati .
245.‘‘ Seyyathāpi , mahārāja , puriso sakamhā gāmā aññaṃ gāmaṃ gaccheyya , tamhāpi gāmā aññaṃ gāmaṃ gaccheyya .
So tamhā gāmā sakaṃyeva gāmaṃ paccāgaccheyya .
Tassa evamassa –
‘ ahaṃ kho sakamhā gāmā amuṃ gāmaṃ agacchiṃ [ agañchiṃ ( syā . kaṃ .)], tatrāpi evaṃ aṭṭhāsiṃ , evaṃ nisīdiṃ , evaṃ
T1.108 abhāsiṃ , evaṃ tuṇhī ahosiṃ , tamhāpi gāmā amuṃ gāmaṃ agacchiṃ , tatrāpi evaṃ aṭṭhāsiṃ , evaṃ nisīdiṃ , evaṃ abhāsiṃ , evaṃ tuṇhī ahosiṃ , somhi tamhā gāmāP1.82 sakaṃyeva gāmaṃ paccāgato ’ ti .Evameva kho , mahārāja , bhikkhu evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte pubbenivāsānussatiñāṇāya cittaṃ abhinīharati abhininnāmeti .
So anekavihitaṃ pubbenivāsaṃ anussarati , seyyathidaṃ – ekampi jātiṃ dvepi jātiyo tissopi jātiyo catassopi jātiyo pañcapi jātiyo dasapi jātiyo vīsampi jātiyo tiṃsampi jātiyo cattālīsampi jātiyo paññāsampi jātiyo jātisatampi jātisahassampi jātisatasahassampi anekepi saṃvaṭṭakappe anekepi vivaṭṭakappe anekepi saṃvaṭṭavivaṭṭakappe ,‘ amutrāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto , so tato cuto amutra udapādiṃ ;
tatrāpāsiṃ evaṃnāmo evaṃgotto evaṃvaṇṇo evamāhāro evaṃsukhadukkhappaṭisaṃvedī evamāyupariyanto , so tato cuto idhūpapanno ’ ti , iti sākāraṃ sauddesaṃ anekavihitaṃ pubbenivāsaṃ anussarati .
Idampi kho , mahārāja , sandiṭṭhikaṃ sāmaññaphalaṃ purimehi sandiṭṭhikehi sāmaññaphalehi abhikkantatarañca paṇītatarañca .