Cittahatthisāriputtaupasampadā
442. Citto
M1.187 pana hatthisāriputto bhagavantaṃ etadavoca –‘‘ abhikkantaṃ , bhante ;
abhikkantaṃ , bhante !
Seyyathāpi , bhante , nikkujjitaṃ vā ukkujjeyya , paṭicchannaṃ vā vivareyya , mūḷhassa vā maggaṃ ācikkheyya , andhakāre vā telapajjotaṃ dhāreyya –
‘ cakkhumanto rūpāni dakkhantī ’ ti .
Evamevaṃ bhagavatā anekapariyāyena dhammo pakāsito .
Esāhaṃ , bhante , bhagavantaṃ
V1.179 saraṇaṃ gacchāmi dhammañca bhikkhusaṅghañca .Labheyyāhaṃ , bhante , bhagavato santike pabbajjaṃ , labheyyaṃ upasampadan ’’ ti .
443. Alattha kho citto hatthisāriputto bhagavato santike pabbajjaṃ , alattha upasampadaṃ .
Acirūpasampanno kho panāyasmā citto hatthisāriputto eko vūpakaṭṭho appamatto ātāpī pahitatto viharanto na cirasseva – yassatthāya kulaputtā sammadeva agārasmā anagāriyaṃ
P1.203 pabbajanti , tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi .‘ Khīṇā jāti , vusitaṃ brahmacariyaṃ , kataṃ karaṇīyaṃ , nāparaṃ itthattāyā ’ ti – abbhaññāsi .
Aññataro kho panāyasmā citto hatthisāriputto arahataṃ ahosīti .
Poṭṭhapādasuttaṃ niṭṭhitaṃ navamaṃ .