Samanuyuñjāpanakathā
385.‘‘ Tyāhaṃ upasaṅkamitvā evaṃ vadāmi – yesu no , āvuso , ṭhānesu na sameti , tiṭṭhantu tāni ṭhānāni .
Yesu ṭhānesu sameti , tattha viññū samanuyuñjantaṃ samanugāhantaṃ samanubhāsantaṃ satthārā vā satthāraṃ saṅghena vā saṅghaṃ –
‘ ye imesaṃ bhavataṃ dhammā akusalā akusalasaṅkhātā , sāvajjā sāvajjasaṅkhātā , asevitabbā asevitabbasaṅkhātā , na alamariyā na alamariyasaṅkhātā , kaṇhā kaṇhasaṅkhātā .
Ko ime dhamme anavasesaṃ pahāya vattati , samaṇo vā gotamo , pare vā pana bhonto gaṇācariyā ’ ti ?
386.‘‘ Ṭhānaṃ kho panetaṃ , kassapa , vijjati , yaṃ viññū samanuyuñjantā samanugāhantā samanubhāsantā evaṃ vadeyyuṃ –
‘ ye imesaṃ bhavataṃ dhammā akusalā akusalasaṅkhātā , sāvajjā sāvajjasaṅkhātā , asevitabbā asevitabbasaṅkhātā , na alamariyā na alamariyasaṅkhātā , kaṇhā kaṇhasaṅkhātā
V1.148 .Samaṇo gotamo ime dhamme anavasesaṃ pahāya vattati , yaṃ vā pana bhonto pare gaṇācariyā ’ ti .
Itiha , kassapa , viññū
M1.155 samanuyuñjantā samanugāhantā samanubhāsantā amheva tattha yebhuyyena pasaṃseyyuṃ . 387.‘‘ Aparampi no , kassapa , viññū samanuyuñjantaṃ samanugāhantaṃ samanubhāsantaṃ satthārā vā satthāraṃ saṅghena vā saṅghaṃ –
‘ ye imesaṃ bhavataṃ
T1.208 dhammā kusalā kusalasaṅkhātā , anavajjā anavajjasaṅkhātā , sevitabbā sevitabbasaṅkhātā , alamariyā alamariyasaṅkhātā , sukkā sukkasaṅkhātā .Ko ime dhamme anavasesaṃ samādāya vattati , samaṇo vā gotamo , pare vā pana bhonto gaṇācariyā ’ ti ?
388.‘‘ Ṭhānaṃ kho panetaṃ , kassapa , vijjati , yaṃ viññū samanuyuñjantā samanugāhantā samanubhāsantā evaṃ vadeyyuṃ
P1.164 –‘ ye imesaṃ bhavataṃ dhammā kusalā kusalasaṅkhātā , anavajjā anavajjasaṅkhātā , sevitabbā sevitabbasaṅkhātā , alamariyā alamariyasaṅkhātā , sukkā sukkasaṅkhātā .
Samaṇo gotamo ime dhamme anavasesaṃ samādāya vattati , yaṃ vā pana bhonto pare gaṇācariyā ’ ti .
Itiha , kassapa , viññū samanuyuñjantā samanugāhantā samanubhāsantā amheva tattha yebhuyyena pasaṃseyyuṃ .
389.‘‘ Aparampi no , kassapa , viññū samanuyuñjantaṃ samanugāhantaṃ samanubhāsantaṃ satthārā vā satthāraṃ saṅghena vā saṅghaṃ –
‘ ye imesaṃ bhavataṃ dhammā akusalā akusalasaṅkhātā , sāvajjā sāvajjasaṅkhātā , asevitabbā asevitabbasaṅkhātā
T1.209 , na alamariyā na alamariyasaṅkhātā , kaṇhā kaṇhasaṅkhātā .Ko ime dhamme anavasesaṃ pahāya vattati , gotamasāvakasaṅgho vā , pare vā pana bhonto gaṇācariyasāvakasaṅghā ’ ti ?
390.‘‘ Ṭhānaṃ kho panetaṃ , kassapa , vijjati , yaṃ viññū samanuyuñjantā samanugāhantā samanubhāsantā evaṃ vadeyyuṃ –
‘ ye imesaṃ bhavataṃ dhammā akusalā akusalasaṅkhātā , sāvajjā sāvajjasaṅkhātā , asevitabbā asevitabbasaṅkhātā , na alamariyā na alamariyasaṅkhātā , kaṇhā kaṇhasaṅkhātā .
Gotamasāvakasaṅgho ime dhamme anavasesaṃ pahāya vattati , yaṃ vā pana bhonto pare gaṇācariyasāvakasaṅghā ’ ti .
Itiha , kassapa , viññū samanuyuñjantā samanugāhantā samanubhāsantā amheva tattha yebhuyyena pasaṃseyyuṃ .
391.‘‘ Aparampi
M1.156V1.149 no , kassapa , viññū samanuyuñjantaṃ samanugāhantaṃP1.165 samanubhāsantaṃ satthārā vā satthāraṃ saṅghena vā saṅghaṃ .‘ Ye imesaṃ bhavataṃ dhammā kusalā kusalasaṅkhātā , anavajjā anavajjasaṅkhātā , sevitabbā sevitabbasaṅkhātā , alamariyā alamariyasaṅkhātā , sukkā sukkasaṅkhātā .
Ko ime dhamme anavasesaṃ samādāya vattati , gotamasāvakasaṅgho vā , pare vā pana bhonto gaṇācariyasāvakasaṅghā ’ ti ?
392.‘‘ Ṭhānaṃ kho panetaṃ , kassapa , vijjati , yaṃ viññū samanuyuñjantā samanugāhantā samanubhāsantā evaṃ vadeyyuṃ –
‘ ye imesaṃ bhavataṃ dhammā kusalā kusalasaṅkhātā , anavajjā anavajjasaṅkhātā , sevitabbā sevitabbasaṅkhātā , alamariyā alamariyasaṅkhātā , sukkā sukkasaṅkhātā .
Gotamasāvakasaṅgho ime dhamme anavasesaṃ samādāya vattati , yaṃ vā pana bhonto pare gaṇācariyasāvakasaṅghā ’ ti .
Itiha , kassapa , viññū samanuyuñjantā samanugāhantā samanubhāsantā amheva tattha yebhuyyena pasaṃseyyuṃ .