Soḷasa ākārā
344.‘‘ Atha kho , brāhmaṇa , purohito brāhmaṇo rañño mahāvijitassa mahāyaññaṃ yajamānassa soḷasahākārehi cittaṃ sandassesi samādapesi samuttejesi sampahaṃsesi siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati , no ca kho tassa āmantitā khattiyā ānuyantā negamā ceva jānapadā ca ;
atha ca pana bhavaṃ rājā evarūpaṃ mahāyaññaṃ yajatī ’ ti
T1.179 .Evampi bhoto rañño vattā dhammato natthi .
Bhotā kho pana raññā āmantitā khattiyā ānuyantā negamā ceva jānapadā ca
V1.124 .Imināpetaṃ bhavaṃ rājā jānātu , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .
‘‘ Siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati , no ca kho tassa āmantitā amaccā pārisajjā negamā ceva jānapadā ca … pe … brāhmaṇamahāsālā negamā ceva jānapadā ca … pe … gahapatinecayikā negamā ceva jānapadā ca , atha ca pana bhavaṃ rājā evarūpaṃ mahāyaññaṃ yajatī ’ ti .
Evampi bhoto rañño vattā dhammato natthi .
Bhotā kho pana raññā āmantitā gahapatinecayikā negamā ceva jānapadā ca .
Imināpetaṃ bhavaṃ rājā jānātu , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .
‘‘ Siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati , no ca kho ubhato
M1.133 sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena , atha ca pana bhavaṃ rājā evarūpaṃ mahāyaññaṃ yajatī ’ ti .Evampi bhoto rañño vattā dhammato natthi .
Bhavaṃ kho pana rājā ubhato sujāto mātito ca pitito ca saṃsuddhagahaṇiko yāva sattamā pitāmahayugā
P1.140T1.180 akkhitto anupakkuṭṭho jātivādena .Imināpetaṃ bhavaṃ rājā jānātu , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .
‘‘ Siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati no ca kho abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya … pe … no ca kho aḍḍho mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro … pe … no ca kho balavā caturaṅginiyā senāya samannāgato assavāya ovādapaṭikarāya sahati maññe paccatthike yasasā … pe … no ca kho saddho dāyako dānapati anāvaṭadvāro samaṇabrāhmaṇakapaṇaddhikavaṇibbakayācakānaṃ opānabhūto puññāni karoti … pe … no ca kho bahussuto tassa tassa sutajātassa … pe … no ca kho tassa tasseva kho pana bhāsitassa atthaṃ jānāti ‘‘ ayaṃ imassa bhāsitassa attho , ayaṃ imassa bhāsitassa attho ’’ ti … pe … no ca kho paṇḍito viyatto medhāvī paṭibalo atītānāgatapaccuppanne atthe cintetuṃ , atha ca pana bhavaṃ rājā evarūpaṃ mahāyaññaṃ yajatī ’ ti
V1.125 .Evampi bhoto rañño vattā dhammato natthi .
Bhavaṃ kho pana rājā paṇḍito viyatto medhāvī paṭibalo atītānāgatapaccuppanne atthe cintetuṃ .
Imināpetaṃ bhavaṃ rājā jānātu
T1.181 , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .‘‘ Siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati .
No ca khvassa purohito brāhmaṇo ubhato sujāto mātito ca pitito ca saṃsuddhagahaṇiko
M1.134 yāva sattamā pitāmahayugā akkhitto anupakkuṭṭho jātivādena ;atha ca pana bhavaṃ rājā evarūpaṃ mahāyaññaṃ yajatī ’ ti .
Evampi
P1.141 bhoto rañño vattā dhammato natthi .Bhoto kho pana rañño purohito brāhmaṇo ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena .
Imināpetaṃ bhavaṃ rājā jānātu , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetu .
‘‘ Siyā kho pana bhoto rañño mahāyaññaṃ yajamānassa kocideva vattā –
‘ rājā kho mahāvijito mahāyaññaṃ yajati .
No ca khvassa purohito brāhmaṇo ajjhāyako mantadharo tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo … pe … no ca khvassa purohito brāhmaṇo sīlavā vuddhasīlī vuddhasīlena samannāgato … pe … no ca khvassa purohito brāhmaṇo paṇḍito viyatto medhāvī paṭhamo vā dutiyo vā sujaṃ paggaṇhantānaṃ , atha ca pana bhavaṃ rājā
T1.182 evarūpaṃ mahāyaññaṃ yajatī ’ ti .Evampi bhoto rañño vattā dhammato natthi .
Bhoto kho pana rañño purohito brāhmaṇo paṇḍito viyatto medhāvī paṭhamo vā dutiyo vā sujaṃ paggaṇhantānaṃ .
Imināpetaṃ bhavaṃ rājā jānātu , yajataṃ bhavaṃ , sajjataṃ bhavaṃ , modataṃ bhavaṃ , cittameva bhavaṃ antaraṃ pasādetūti .
Imehi kho , brāhmaṇa , purohito brāhmaṇo rañño mahāvijitassa mahāyaññaṃ yajamānassa soḷasahi ākārehi cittaṃ sandassesi samādapesi samuttejesi sampahaṃsesi .
345.‘‘ Tasmiṃ kho , brāhmaṇa , yaññe neva gāvo haññiṃsu , na ajeḷakā haññiṃsu , na kukkuṭasūkarā haññiṃsu , na vividhā pāṇā saṃghātaṃ āpajjiṃsu , na rukkhā chijjiṃsu yūpatthāya , na dabbhā lūyiṃsu barihisatthāya [ parihiṃsatthāya ( syā . ka . sī . ka .), parahiṃsatthāya ( ka .)].
Yepissa ahesuṃ dāsāti vā pessāti vā kammakarāti vā , tepi na daṇḍatajjitā na
M1.135 bhayatajjitā na assumukhā rudamānā parikammāniV1.126 akaṃsu .Atha kho ye icchiṃsu , te akaṃsu , ye na icchiṃsu , na te akaṃsu ;
yaṃ icchiṃsu , taṃ akaṃsu , yaṃ na icchiṃsu , na taṃ akaṃsu .
Sappitelanavanītadadhimadhuphāṇitena ceva so yañño niṭṭhānamagamāsi .
346.‘‘ Atha
P1.142 kho , brāhmaṇa , khattiyā ānuyantā negamā ceva jānapadā ca , amaccā pārisajjā negamā ceva jānapadā ca , brāhmaṇamahāsālā negamā ceva jānapadā ca , gahapatinecayikā negamāT1.183 ceva jānapadā ca pahūtaṃ sāpateyyaṃ ādāya rājānaṃ mahāvijitaṃ upasaṅkamitvā evamāhaṃsu –‘ idaṃ , deva , pahūtaṃ sāpateyyaṃ devaññeva uddissābhataṃ , taṃ devo paṭiggaṇhātū ’ ti .
‘ Alaṃ , bho , mamāpidaṃ pahūtaṃ sāpateyyaṃ dhammikena balinā abhisaṅkhataṃ ;
tañca vo hotu , ito ca bhiyyo harathā ’ ti .
Te raññā paṭikkhittā ekamantaṃ apakkamma evaṃ samacintesuṃ –
‘ na kho etaṃ amhākaṃ patirūpaṃ , yaṃ mayaṃ imāni sāpateyyāni punadeva sakāni gharāni paṭihareyyāma .
Rājā kho mahāvijito mahāyaññaṃ yajati , handassa mayaṃ anuyāgino homā ’ ti .
347.‘‘ Atha kho , brāhmaṇa , puratthimena yaññavāṭassa [ yaññāvāṭassa ( sī . pī . ka .)] khattiyā ānuyantā negamā ceva jānapadā ca dānāni paṭṭhapesuṃ .
Dakkhiṇena yaññavāṭassa amaccā pārisajjā negamā ceva jānapadā ca dānāni paṭṭhapesuṃ .
Pacchimena yaññavāṭassa brāhmaṇamahāsālā negamā ceva jānapadā ca dānāni paṭṭhapesuṃ .
Uttarena yaññavāṭassa gahapatinecayikā negamā ceva jānapadā ca dānāni paṭṭhapesuṃ .
‘‘ Tesupi kho , brāhmaṇa , yaññesu neva gāvo haññiṃsu , na ajeḷakā haññiṃsu , na kukkuṭasūkarā haññiṃsu , na vividhā pāṇā saṃghātaṃ āpajjiṃsu , na rukkhā chijjiṃsu yūpatthāya , na dabbhā lūyiṃsu barihisatthāya .
Yepi nesaṃ ahesuṃ dāsāti vā pessāti vā kammakarāti vā , tepi na daṇḍatajjitā na bhayatajjitā na assumukhā rudamānā parikammāni
T1.184 akaṃsu .Atha kho ye icchiṃsu , te akaṃsu , ye na icchiṃsu , na te akaṃsu ;
yaṃ icchiṃsu , taṃ akaṃsu , yaṃ na icchiṃsu na taṃ akaṃsu .
Sappitelanavanītadadhimadhuphāṇitena ceva te yaññā niṭṭhānamagamaṃsu .
‘‘ Iti
M1.136P1.143 cattāro ca anumatipakkhā , rājā mahāvijito aṭṭhahaṅgehi samannāgato , purohitoV1.127 brāhmaṇo catūhaṅgehi samannāgato ;tisso ca vidhā ayaṃ vuccati brāhmaṇa tividhā yaññasampadā soḷasaparikkhārā ’’ ti .
348. Evaṃ vutte , te brāhmaṇā unnādino uccāsaddamahāsaddā ahesuṃ –
‘‘ aho yañño , aho yaññasampadā ’’ ti !
Kūṭadanto pana brāhmaṇo tūṇhībhūtova nisinno hoti .
Atha kho te brāhmaṇā kūṭadantaṃ brāhmaṇaṃ etadavocuṃ –
‘‘ kasmā pana bhavaṃ kūṭadanto samaṇassa gotamassa subhāsitaṃ subhāsitato nābbhanumodatī ’’ ti ?
‘‘ Nāhaṃ , bho , samaṇassa gotamassa subhāsitaṃ subhāsitato nābbhanumodāmi .
Muddhāpi tassa vipateyya , yo samaṇassa gotamassa subhāsitaṃ subhāsitato nābbhanumodeyya .
Api ca me , bho , evaṃ hoti – samaṇo gotamo na evamāha –
‘ evaṃ me sutan ’ ti vā ‘ evaṃ arahati bhavitun ’ ti vā ;
api ca samaṇo gotamo –
‘ evaṃ tadā āsi , itthaṃ tadā āsi ’ tveva bhāsati .
Tassa mayhaṃ bho evaṃ hoti –
‘ addhā samaṇo gotamo tena samayena rājā vā ahosi mahāvijito yaññassāmi purohito vā brāhmaṇo tassa yaññassa yājetā ’ ti .
Abhijānāti pana bhavaṃ gotamo evarūpaṃ yaññaṃ yajitvā vā
T1.185 yājetvā vā kāyassa bhedā paraṃ maraṇā sugatiṃ saggaṃ lokaṃ upapajjitāti ’’?‘‘ Abhijānāmahaṃ , brāhmaṇa , evarūpaṃ yaññaṃ yajitvā vā yājetvā vā kāyassa bhedā paraṃ maraṇā sugatiṃ saggaṃ lokaṃ upapajjitā , ahaṃ tena samayena purohito brāhmaṇo ahosiṃ tassa yaññassa yājetā ’’ ti .